Son günlər ABŞ administrasiyası ilə münasibətləri gərginləşən milyarder İlon Maska qarşı daha bir ittiham irəli sürülüb.
AZƏRTAC Reuters agentliyinə istinadla xəbər verir ki, ABŞ Konqresinin üç üzvü İlon Maskın “SpaceX” şirkətində əmək təhlükəsizliyi qaydalarının pozulması, istehsal və buraxılış sahələrində yüzlərlə insanın xəsarət alması ilə bağlı məsələ qaldırıb. Onlar iddia ediblər ki, 2014-cü ildən bəri bu şirkətdə ən azı 600 nəfər müxtəlif bədən xəsarətləri alıb, o cümlədən əzilmiş əzalar, amputasiyalar, baş xəsarətləri və bir ölüm qeydə alınıb. Reuters agentliyinin hesabatında da qeyd edilib ki, “SpaceX”in Texas və Kaliforniyadakı üç əsas sənaye obyektində xəsarət nisbətləri kosmik sənaye üçün orta göstəricini xeyli üstələyib.
BU faktları təqdim edən konqresmen Mark Takano federal hökumətin şirkətlə tərəfdaşlığı fonunda zərər çəkənlərə görə məsuliyyəti gündəmə gətirib. O qeyd edib ki, NASA bu günədək “SpaceX”ə özəl kosmik podratçı kimi 11,8 milyard dollar ödəyib.
Konqresmenlər NASA-nın rəhbərliyini İlon Maskın şirkətinə nəzarəti gücləndirməyə çağırıblar. “SpaceX” xəsarətlər və ya qanunvericilərin açıqlamaları ilə bağlı suallara cavab verməyib. NASA isə şirkətin təhlükəsizlik göstəricilərini şərh etməyib, lakin Reuters agentliyinə bildirib ki, onun “SpaceX”dən “sağlam və effektiv təhlükəsizlik proqramı və mədəniyyətinə malik olmasını” tələb edən müqavilə müddəalarını tətbiq etmək imkanı var.
Agentliyin “SpaceX” ilə əlaqələrinin ilk illərinə nəzarət edən NASA rəhbərinin keçmiş müavini Lori Qarver bildirib ki, bu faktlar həyəcan təbili çalmaq üçün əsas verir. Onun sözlərinə görə, heç bir şirkət başqalarından üstün hüquqlara malik ola bilməz.
jpeg_1766065291.jpeg)
