Səhiyyə Nazirliyində Amerika Birləşmiş Ştatlarının (ABŞ) Azərbaycandakı Müvəqqəti işlər vəkili Emi Karlon ilə görüş keçirilib.
Görüş zamanı səhiyyə naziri Teymur Musayev Vaşinqtonda imzalanmış Azərbaycan və ABŞ hökumətlərarası Anlaşma Memorandumunun ikitərəfli tərəfdaşlığın yeni strateji mərhələsinin təməlini qoyduğunu bildirib.
Nazirliyin mətbuat xidmətindən AZƏRTAC-a verilən məlumata görə, Azərbaycanda şəhid ailələri və müharibə veteranlarına diqqət və qayğının dövlət siyasətinin əsas prioritet istiqamətlərindən biri olduğu bildirilib. Nazir səhiyyə sisteminin rəqəmsallaşdırılmasının əhəmiyyətini vurğulayaraq, bu sahədə ölkələrimiz arasında əməkdaşlığın qurulmasının əhəmiyyətini qeyd edib. Eyni zamanda, tibb təhsili, həkimlərin təkmilləşdirilməsi, səhiyyə idarəçiliyi sahəsində təcrübə mübadiləsinin vacibliyi diqqətə çatdırılıb.
Həmçinin Vətən müharibəsi nəticəsində işğaldan azad olunmuş ərazilərdə tibb müəssisələrinin yaradılması sahəsində aparılan işlər barədə məlumat verilib və gələcəkdə əməkdaşlığın daha da inkişaf etdiriləcəyinə əminliyini ifadə edib.
Səmimi qarşılanmaya görə minnətdarlığını bildirən Emi Karlon Prezident İlham Əliyevin tarixi səfərinin və səfər zamanı Azərbaycan və ABŞ hökumətləri arasında imzalanan Anlaşma Memorandumunun mahiyyətini xüsusi olaraq vurğulayıb.
O, Azərbaycanda şəhid ailələri və müharibə veteranlarına göstərilən qayğını yüksək qiymətləndirərək, təmsil etdiyi ölkənin bu sahədə dəstəyini əsirgəməyəcəyini diqqətə çatdırıb, ABŞ-ın Azərbaycan ilə səhiyyə və tibb elmi sahəsində əməkdaşlığın genişləndirilməsində maraqlı olduğunu ifadə edib.
Görüşdə qarşılıqlı maraq doğuran digər məsələlər ətrafında da fikir mübadiləsi aparılıb.
19 (1)jpg_1771885865.jpg)
jpg_1772216033.jpg)
