Samuxda rayon icra hakimiyyətinin 2025-ci ilin sosial-iqtisadi inkişafının yekunları və 2026-cı ildə qarşıda duran vəzifələrə həsr edilmiş hesabat yığıncağı keçirilmişdir.
RİH-in başçısı yanında şura üzvlərinin, xidmət sahələri rəhbərlərinin, inzibati ərazi dairələri üzrə nümayəndələrin və bələdiyyə üzvlərinin iştirakı ilə keçirilən yığıncaqdan əvvəl iştirakçılar Ümummilli Lider Heydər Əliyevin abidəsini ziyarət etmiş, abidə önünə gül dəstələri düzərək xatirəsinə ehtiramlarını bildirmişlər.
Heydər Əliyev Mərkəzində keçirilən yığıncaq Azərbaycanın ərazi bütövlüyü və suverenliyi uğrunda canlarını qurban vermiş şəhidlərin xatirəsinin birdəqiqəlik sükutla yad edilməsi ilə başlamışdır. Sonra RİH-in başçısı Firdovsi Əliyev bir il ərzində rayonda görülən işlərə dair məruzə ilə çıxış etmişdir. Qeyd edilmişdir ki, Zəfərin beşinci ilini qürurla qeyd etdiyimiz və artıq yola saldığımız 2025-ci il ölkəmizin həyatında bütün sahələr üzrə qazanılan uğurlarla yadda qaldı: "İstər iqtisadi-siyasi və hərbi sahədə, istərsə də diplomatik müstəvidə çoxsaylı əlamətdar hadisələr yaşandı. Söz yox ki, bütün bunlar-Qarabağ və Şərqi Zəngəzurda həyata keçirilən quruculuq işlərindən tutmuş, Azərbaycanın beynəlxalq platformalarda qazandığı nüfuzacan - təməli Ümummilli Lider Heydər Əliyev tərəfindən qoyulmuş və Prezident İlham Əliyev tərəfindən dövrün tələblərinə uyğun uğurla və məqsədyönlü şəkildə davam etdirilən siyasət sayəsində mümkün olmuşdur.
Sonra Azərbaycan Respublikası Prezidenti Administrasiyasının Ərazi-təşkilat məsələləri şöbəsinin sektor müdiri Elvin Azadəliyev çıxış etmişdir. Bildirmişdir ki, müasir Azərbaycan dövləti hazırda Prezident İlham Əliyevin rəhbərliyi ilə tarixinin ən şanlı günlərini, yeni inkişaf dövrünü yaşayır. Azərbaycan dünyada ən sürətlə və dinamik inkişaf edən dövlətlərdən biri kimi nüfuz qazanmışdır.
Sonra YAP rayon təşkilatının sədri Gündüz Bayramov, Samux Su Meliorasiya Sistemləri İstismar İdarəsinin rəisi Məmməd Məmmədov, "Azərişıq" ASC-nin Samux rayon Elektrik Şəbəkəsinin rəisi Yadigar Bağırov və rayon Ağsaqqallar Şurasının sədri Fidayıl Əliyev çıxış edərək Prezident İlham Əliyevin rəhbərliyi ilə daxili və xarici siyasət sahəsində əldə olunmuş uğurlardan, ölkəmizdə həyata keçirilən genişmiqyaslı quruculuq işlərindən, əhalinin sosial rifah halının yüksəldilməsinə yönəlmiş tədbirlərdən söz açmışlar.
Sonda yığıncaq iştirakçıları adından Prezident İlham Əliyevə müraciət qəbul olunmuşdur.
Sabir ƏLİYEV,
"Azərbaycan"
19 (1)jpg_1771885865.jpg)
