Qərar № 4/16

 

2024-cü il fevralın 7-nə təyin edilmiş növbədənkənar Azərbaycan Respublikası Prezidenti seçkilərində namizədlərin qeydə alınma mərhələsi başa çatmış və nəticədə 7 iddiaçının namizədliyi qeydə alınmışdır. Azərbaycan Respublikası Seçki Məcəlləsinin (bundan sonra - Seçki Məcəlləsi) 75.2-ci maddəsinə uyğun olaraq səsvermə gününə 23 gün qalmış, yəni 2024-cü il yanvarın 15-dən başlayan seçkiqabağı təşviqat mərhələsində qeydə alınmış namizədlər və buna hüququ olan subyektlər qanunvericiliklə müəyyən olunmuş qaydada ödənişli və ödənişsiz əsaslarla təşviqat apara bilərlər.
Seçki Məcəlləsinin 77.1-ci maddəsinin tələblərinə əsasən ictimai teleradio təşkilatları namizədlərə, namizədi qeydə alınmış siyasi partiyalara təşviqat aparmaqdan ötrü bərabər şərait yaradırlar.
2024-cü il fevralın 7-nə təyin edilmiş növbədənkənar Azərbaycan Respublikası Prezidenti seçkilərində seçkiqabağı təşviqat aparmaq üçün İctimai Televiziya və Radio Yayımları Şirkətinin (bundan sonra - İTV) ayırdığı ödənişsiz efir vaxtının prezidentliyə qeydə alınmış namizədlər və namizədi qeydə alınmış siyasi partiyalar arasında bərabər şərtlərlə və bərabər həcmdə bölgüsü məqsədilə Azərbaycan Respublikası Mərkəzi Seçki Komissiyasının (bundan sonra - Mərkəzi Seçki Komissiyası) 2024-cü il 14 yanvar tarixli 3/14 saylı Qərarı ilə püşkatma komissiyası yaradılmış, püşkatmanın yeri və vaxtı müəyyən edilmiş, bu barədə məlumat rəsmi dərc olunmuş və maraqlı subyektlər məlumatlandırılmışdır.
İTV Seçki Məcəlləsinin 80.5-ci maddəsində nəzərdə tutulandan 2 dəfə artıq (həftədə 6 saat olmaqla) ödənişsiz efir vaxtı ayıraraq, həmin vaxtın 3 saatının televiziyada, 3 saatının isə radioda hüququ olan subyektlər tərəfindən "dəyirmi masa" formatına uyğun istifadə edilməsi üçün təqdim etmək öhdəliyini öz üzərinə götürmüşdür. Qeydə alınmış namizədlər və namizədi qeydə alınmış siyasi partiyaların təşəbbüsü ilə Mərkəzi Seçki Komissiyası və İTV arasında əldə edilmiş razılığa əsasən sözügedən efir vaxtı daha geniş auditoriyanın baxması mümkün olan zamanda - həftənin 3 günü hər dəfə 1 saat olmaqla saat 21.00-da televiziya izləyicilərinə, 3 gün isə hər dəfə 1 saat olmaqla saat 21.00-da radio dinləyicilərinə təqdim olunacaq.
Püşkatma komissiyası İTV tərəfindən ayrılmış efir vaxtının bölgüsünü püşkatma yolu ilə müəyyən etməli, püşkatmanın nəticələri protokolla rəsmiləşdirilməli, efir vaxtının bölgüsü barədə cədvəl dərc edilməlidir.
Mərkəzi Seçki Komissiyası yuxarıda qeyd edilənləri əsas götürərək, Seçki Məcəlləsinin 19.4-cü, 19.14-cü, 28.2-ci, 28.4-cü, 74-cü, 75-ci, 80.1-ci və 80.4 - 80.7-ci maddələrinə əsasən qərara alır:
1. 2024-cü il fevralın 7-nə təyin edilmiş növbədənkənar Azərbaycan Respublikası Prezidenti seçkilərində püşkatma komissiyası İTV tərəfindən ayrılmış və həftəlik ümumi həcmi 6 saat olan efir vaxtının (2024-cü il yanvarın 15-dən başlayaraq 3 saat televiziyada hər dəfə 1 saat, saat 21.00-da başlamaqla, 3 saat radioda hər dəfə 1 saat, saat 21.00-da başlamaqla) bölgüsünü püşkatma yolu ilə müəyyən etsin. 
2. Püşkatmanın nəticələri protokolla rəsmiləşdirilsin və efir vaxtının bölgüsü barədə cədvəl dərc edilsin (əlavə olunur). 
3. Ayrılmış efir vaxtının keyfiyyətlə və vaxtında istifadəçilərin sərəncamına verilməsinin təmin edilməsi öz səlahiyyətləri daxilində İTV rəhbərliyinə həvalə edilsin.  
4. Bu Qərar dərc edildiyi gündən qüvvəyə minir.

Sədr     Məzahir Pənahov
Katib    Arifə Muxtarova 
Katib    Mikayıl Rəhimov

15.01.2024

 

 

2024-cü il fevralın 7-nə təyin edilmiş növbədənkənar Azərbaycan Respublikası Prezidenti seçkilərində prezidentliyə qeydə alınmış namizədlər üçün İctimai Televiziya və Radio Yayımları Şirkətinin ayırdığı ödənişsiz efir vaxtının bölgüsü CƏDVƏLİ

 

15 yanvar 2024-cü il
 
Televiziyada dəyirmi masa formatında

 

Həftənin günləri	Efirəçıxma tarixi	Efirəçıxma vaxtı
Bazar ertəsi, çərşənbə və cümə	15.01.2024	21.00
	17.01.2024
	19.01.2024
	22.01.2024
	24.01.2024
	26.01.2024
	29.01.2024
	31.01.2024
	02.02.2024
	05.02.2024

 

 Radioda dəyirmi masa formatında

 

Həftənin günləri	Efirəçıxma tarixi	Efirəçıxma vaxtı
Çərşənbə axşamı, cümə axşamı və şənbə	16.01.2024	21.00
	18.01.2024
	20.01.2024
	23.01.2024
	25.01.2024
	27.01.2024
	30.01.2024
	01.02.2024
	03.02.2024

 

Ayrılmış efir vaxtı istifadəçilərinin masa ətrafında yerləşdirilməsi və aparıcı tərəfindən dəyirmi masanın aparılma ardıcıllığı

 

Namizədin soyadı, adı, atasının adı	Aparıcıdan
	sağda	solda
1. Oruc Zahid Məhərrəm oğlu	1
2. Mustafa Fazil Qəzənfər oğlu		2
3. Əliyev İlham Heydər oğlu	3
4. Musayev Elşad Nəbi oğlu		4
5. Həsənquliyev Qüdrət Müzəffər oğlu	5
6. Nurullayev Razi Qulaməli oğlu		6
7. Əliyev Fuad Ağasi oğlu	7

 

 

 Qeyd:

1. İctimai Televiziya və Radio Yayımları Şirkəti tərəfindən ayrılmış efir vaxtı püşkatma ilə müəyyən edilmiş qaydada və müddətdə (2024-cü il yanvarın 15-dən fevralın 6-dək) dəyirmi masa formatında istifadəçilərin sərəncamına veriləcəkdir.

2. Həftədə 3 dəfə saat 21.00-da başlamaqla televiziyada, 3 dəfə isə saat 21.00-da başlamaqla radioda hər dəfə 1 saat davam edən dəyirmi masada hər bir namizədə 8 dəqiqə 57 saniyə efir vaxtı ayrılacaqdır.

3. İstifadəçi ona ayrılmış efir vaxtından qanunvericiliklə müəyyən edilmış qaydada seçkiqabağı təşviqat məqsədləri üçün və dəyirmi masa formatında öz mülahizəsinə uyğun istifadə edə bilər.