Kolumbiyada COP16 - BMT-nin Biomüxtəliflik Konfransının ikinci mərhələsi başlayıb
BMT-nin Kolumbiyada təşkil olunmuş Biomüxtəliflik Konfransı bu həftə başa çatır. Yekun müzakirələrdə 140-a yaxın nazir və 12 dövlət başçısı iştirak edəcək.
Kolumbiyanın Kali şəhərində COP16 - BMT-nin Biomüxtəliflik Konfransının ikinci mərhələsi başlayıb. Müzakirələr noyabrın 1-dək davam edəcək. Amerikadakı yerli icmaların nümayəndələri ölkələri iki il əvvəl götürdükləri öhdəliklərə əməl etməyə çağırıblar.
CECONSEC-in (Perunun Yerli İcmaları Assosiasiyası) başçısı Teddi Sinakay Tomas diskussiyalar zamanı çıxışında deyib: "Hökumətlərimiz qərarlar qəbul etməkdə tələsmirlər, onlar dəyişiklikləri çox ləng həyata keçirirlər. Hakimiyyətlər qanunların icrasına və siyasətlərin standartlaşdırılmasına diqqət yetirirlər, lakin zərərli fəaliyyətlərin dayandırılması, habelə biomüxtəlifliyin bərpası və qorunması üçün tədbirlər görmürlər."
Konfrans iştirakçıları iki il əvvəl qəbul olunmuş Qlobal Biomüxtəliflik Çərçivə Proqramının tətbiqinin nə dərəcədə uğurlu həyata keçirildiyini qiymətləndirməyə çalışırlar. Tərəflərin əsas öhdəliyi 2030-cu ilə qədər quru və dənizlərin ən azı 30 faizini qorumaq və deqradasiyaya uğramış ekosistemlərin 30 faizini bərpa etmək olub.
Kolumbiyanın WWF təşkilatının Baş direktoru Sandra Valenzuela konfransda bildirib: "Bu gün dünyanın quru ərazilərinin 17 faizi qorunur, lakin dəniz və okeanların sahil sularının yalnız 8 faizi qorunur. Buna görə də milli fəaliyyət planları mühafizəni gücləndirmək üçün təcili olaraq zəruri addımların atılmasını tələb edir. Lakin bu plan digər məqsəd, yəni ekosistemin bərpasını təşviq etməli olan 2-ci məqsəd olmadan həyata keçirilə bilməz".
Xatırladaq ki, təxminən 200 ölkə Qlobal Biomüxtəliflik Çərçivə Proqramını imzalayıb. Qarşıya qoyulan vəzifələrin icrasında lider Avropa İttifaqıdır.
Kalidə çıxışında Avropa Komissiyasının Ətraf Mühit Departamentinin Baş Direktoru Florika Fink-Hoyyer nikbin danışıb: "Bizim bir-biri ilə əlaqəli qorunan ərazilərin geniş şəbəkəsi olan "Natura 2000" layihəmiz var. Bunun sayəsində, eləcə də Təbiəti Bərpa Aktına əsaslanaraq tam əminik ki, 2030-cu il torpaq hədəflərinə nisbətən tezliklə çatacağıq. Suya gəlincə, bu, bir az daha mürəkkəbdir. Amma biz çox çalışırıq, su ehtiyatlarının davamlılığını təmin etmək üçün strategiya təqdim edəcəyik".
Qeyd edək ki, Kolumbiyada həm də əsas layihələrin maliyyələşdirilməsi ilə bağlı danışıqlar aparılır. BMT hesab edir ki, "yaşıl investisiya"lar üç dəfə artırılmalıdır.
COP16-nın ikinci həftəsində müzakirələrdə dünyanın müxtəlif ölkələrindən 140-a yaxın nazirin və 12 dövlət başçısının iştirakı gözlənilir. Kolumbiyada qəbul olunacaq mühüm qərarlar təbiətin məhvinin dayandırılması vədinin reallaşdırılmasına kömək edəcək .
Rizvan CƏFƏROV,
"Azərbaycan"
