AŞPA prezidentinin ifadələri isə siyasi əxlaqsızlığın nümunəsidir
"Ölkəmizin beynəlxalq aləmdə nüfuzunun artması, dünyada söz sahibinə çevrilməsi bir sıra böyük beynəlxalq iqtisadi layihələrdə vacib tərəf kimi çıxış etməsi Azərbaycana düşmən qüvvələri, dövlətləri, xüsusilə, erməni lobbisini çox narahat edir. Korrupsiya və rüşvətxorluğa qurşanmış AŞPA beynəlxalq təşkilat statusundan çıxaraq müəyyən dövlətlərin, qüvvələrin əlində alətə çevrilib".
Bu sözləri "Azərbaycan" qəzetinə Bakı Dövlət Universitetinin kafedra müdiri Kamilə Əliyeva deyib. Bu qurumun mütəmadi olaraq Azərbaycana qarşı qərəzli, böhtan xarakterli qərar və qətnamələr qəbul etdiyini vurğulayan ekspert bildirib ki, bu qərəzli sənədlərin qəbul edilməsinin arxasında Azərbaycana qarşı düşmən qüvvələrin dayandığı heç kimə sirr deyil: "AŞPA-nın başıpozuq bir quruma çevrilməsinə səbəb ona yarıtmaz, başqalarının əlində oyuncaq olan insanın rəhbərlik etməsidir. AŞPA Prezidenti Teodoros Rusopulosun "Alpha News" qəzetinə müsahibəsi zamanı ölkəmizə qarşı səsləndirdiyi fikirlər bu şəxsin nadanlığından, beynəlxalq siyasətdən anlayışı olmamasından xəbər verir. Azərbaycanla bağlı işlətdiyi ifadələr heç bir çərçivəyə sığmır, mədəniyyətsizliyin, siyasi əxlaqsızlığın nümunəsidir. Hazırda AŞPA-nın fəaliyyətı acınacaqlı vəziyyətdədir. Bu, ona rəhbərlik edən şəxsin diktator təfəkkürlü olmasından, eləcə də siyasi əqidəsizliyindən irəli gəlir. Avropa Şurası nizanaməsinin pozulması, AŞPA-nın səlahiyyətlərini aşması nəticəsində Azərbaycan əleyhinə addımlar atılır. Azərbaycan tərəfinin dialoqa açıqlıq nümayiş etdirməsinə baxmayaraq, Rusopulos, Şvabe və bir sıra şəxslər ölkəmizə qarşı düşmən mövqe nümayiş etdirir, dövlətimizin beynəlxalq hüququn norma və prinsiplərinə və ədalətə söykənən mövqeyinə kölgə salmağa çalışırlar".
K.Əliyeva xatırladıb ki, AŞPA-nın Azərbaycan nümayəndə heyətinin səlahiyyətlərinin dayandırılması barədə ədalətsiz və siyasi cəhətdən heç bir əsası olmayan qərarının qəbul edilməsinin lehinə səs vermiş 76 üzvünün, o cümlədən Teodoros Rusopulosun adları haqlı olaraq qara siyahıya salınıb və onların Azərbaycana gəlməsi mümkün deyil. Kimliyindən, hansı təşkilatı təmsil etməsindən asılı olmayaraq, Azərbaycana qarşı haqsız, ədalətsiz, eləcə də düşmən mövqe nümayiş etdirən hər kəs dövlətimiz tərəfindən layiqli cavab alacaq.
Əsmər QARDAŞXANOVA,
"Azərbaycan"
