COP29-un sədrliyi Birləşmiş Millətlər Təşkilatının Sənaye İnkişafı Təşkilatı (UNIDO) ilə əməkdaşlıq şəraitində Vyana Beynəlxalq Mərkəzində “COP29-un energetika təşəbbüsləri və öhdəlikləri: tərəqqi və növbəti addımlar” mövzusunda hibrid konfrans keçirib.
COP29-un sədrliyindən AZƏRTAC-a bildirilib ki, tədbir iqlim və enerji ilə bağlı beynəlxalq əlaqələrdə davamlılığın təşviqi və COP30-a dəstək və hərəkətlərin səfərbər edilməsi yolu ilə COP29-un impulsunu artırmaq məqsədi daşıyırdı.
Konfrans Vyanadakı diplomatik nümayəndəliklərin, hökumət nümayəndələrinin, beynəlxalq təşkilatların, özəl sektorun və vətəndaş cəmiyyətinin şəxsi və virtual iştirakçılarını bir araya gətirib.
Tədbirin məqsədi qlobal energetika təşəbbüslərində geniş iştirakın təşviqi, çoxtərəfli dialoqun gücləndirilməsi və dayanıqlı enerji sistemlərinə keçidin sürətləndirilməsi istiqamətində növbəti addımların konseptuallaşdırılması olub.
Konfransı UNIDO-nun iqlim və texnologiya tərəfdaşlıqları üzrə baş texniki məsləhətçisi Hen Lyu açıb. O, həm də tədbirin moderatoru olub.
Konfransda UNIDO Baş direktorunun müavini və Qlobal tərəfdaşlıqlar və xarici əlaqələr şöbəsinin icraçı direktoru Fatu Haydara, Azərbaycanın Avstriyadakı səfiri və ölkəmizin UNIDO yanında daimi nümayəndəsi Rövşən Sadıqbəyli çıxış ediblər.
Daha sonra UNIDO-nun Enerji və iqlim üzrə fəaliyyət şöbəsinin rəhbəri Rana Qoneym, COP29-un Fəaliyyət Gündəliyinin Qlobal Təşəbbüslər Qrupunun həmsədrləri Elmar Məmmədov və Jalə İbrahimova, qrupun üzvü Lalə Mehdiyeva və Azərbaycan Energetika Nazirliyinin Beynəlxalq əməkdaşlıq idarəsinin rəisi Əşrəf Şıxəliyev COP29-da energetika təşəbbüsləri ilə bağlı birgə təqdimatla çıxış ediblər.
Vyanada konfransın açılış gününə olan məlumata görə, “Yaşıl enerji zonaları və dəhlizlər üzrə öhdəlik” COP29-da 57 tərəf və 9 qeyri-tərəf ölkə tərəfindən təsdiq edilib.
“Hidrogen Bəyannaməsi” 63 tərəf və 15 qeyri-tərəf ölkə, “Enerji saxlama və şəbəkə öhdəliyi” isə COP29-da 65 tərəf və 42 tərəf olmayan ölkə tərəfindən təsdiqlənib. Eyni zamanda, bütün öhdəliklər təsdiq üçün açıq qalır, tərəf olmayan ölkələr və maraqlı tərəflər [email protected], [email protected] və [email protected] e-poçt ünvanlarına məktub, yaxud verbal nota göndərərək öz dəstəklərini ifadə edə bilər.
jpeg_1765955251.jpeg)
