"Dünyanın müxtəlif regionlarında müharibələrin, silahlı münaqişələrin, geosiyasi qarşıdurmaların və təhlükəsizlik risklərinin artdığı, beynəlxalq münasibətlər sistemində qeyri-müəyyənliyin dərinləşdiyi bir dövrdə Azərbaycanın sabitlik və təhlükəsizliyi yüksək səviyyədə təmin etməsi ölkənin güclü dövlətçilik ənənələrinin, düşünülmüş idarəetmə modelinin və milli maraqlara əsaslanan siyasətinin uğurlu nəticəsidir".
Bu fikirləri Kocaeli Heydər Əliyev Mədəniyyət Mərkəzinin sədri, türkiyəli siyasi ekspert Bilal Dündar AZƏRTAC-a açıqlamasında deyib.
Bilal Dündar qeyd edib ki, son illər dünyanın müxtəlif bölgələrində baş verən müharibələr, terror aktları, humanitar böhranlar, qanunsuz miqrasiya axınları, enerji təhlükəsizliyi problemləri və iqtisadi qeyri-sabitlik dövlətlərin milli təhlükəsizlik strategiyalarını yenidən nəzərdən keçirməsinə səbəb olub. Onun sözlərinə görə, belə mürəkkəb geosiyasi şəraitdə Azərbaycanın sabit və təhlükəsiz ölkə kimi mövqeyini qoruyub saxlaması xüsusi diqqət çəkən məqamlardandır: "Təhlükəsizlik anlayışı müasir dövrdə yalnız hərbi güclə məhdudlaşmır. Siyasi sabitlik, iqtisadi dayanıqlılıq, sosial rifah, milli birlik, effektiv dövlət idarəçiliyi, kibertəhlükəsizlik, enerji təhlükəsizliyi və ictimai asayiş bütöv təhlükəsizlik sisteminin əsas elementləridir. Azərbaycan bu istiqamətlərin hər biri üzrə ardıcıl siyasət həyata keçirərək mühüm nəticələr əldə edib. Ölkədə hüquq-mühafizə orqanlarının və digər dövlət institutlarının koordinasiyalı fəaliyyəti, ictimai təhlükəsizliyin etibarlı qorunması və qanunun aliliyinin təmin olunması vətəndaşların dövlətə inamını daha da möhkəmləndirib. Bu isə öz növbəsində cəmiyyətin sabit inkişafına və milli həmrəyliyin güclənməsinə xidmət edir".
Türkiyəli ekspert vurğulayıb ki, Azərbaycanın suverenliyinin tam təmin olunmasından sonra ölkənin təhlükəsizlik sistemi daha da möhkəmlənib. Dövlət idarəçiliyinin bütün ölkə ərazisində vahid prinsiplər əsasında həyata keçirilməsi, sərhədlərin etibarlı mühafizəsi və qanunvericiliyin tam tətbiqi uzunmüddətli sabitlik üçün mühüm zəmin formalaşdırıb.
Onun fikrincə, Azərbaycanın əldə etdiyi sabitlik iqtisadi inkişafın da əsas təminatlarından biridir. Ölkədə həyata keçirilən genişmiqyaslı infrastruktur layihələri, sənayenin inkişafı, rəqəmsal transformasiya, nəqliyyat və logistika imkanlarının genişləndirilməsi təhlükəsiz və proqnozlaşdırılan mühit sayəsində uğurla reallaşdırılır.
Bilal Dündar bildirib ki, Azərbaycan bu gün Avropa ilə Asiyanı birləşdirən əsas nəqliyyat və logistika mərkəzlərindən birinə çevrilib. Orta dəhlizin inkişafı, beynəlxalq yükdaşımaların artması, enerji marşrutlarının təhlükəsiz fəaliyyəti və regionlararası iqtisadi əməkdaşlığın genişlənməsi ölkənin sabitliyinin beynəlxalq əhəmiyyətini daha da artırır.
Ekspert qeyd edib ki, xarici investorların Azərbaycana olan etimadının əsas səbəblərindən biri ölkədə hökm sürən sabitlik və təhlükəsizlik mühitidir. İnvestisiya layihələrinin etibarlı şəkildə həyata keçirilməsi, sahibkarlıq fəaliyyətinin dəstəklənməsi və müasir hüquqi bazanın mövcudluğu Azərbaycanın iqtisadi cəlbediciliyini artıran əsas amillərdəndir.
O vurğulayıb ki, Azərbaycan beynəlxalq münasibətlərdə balanslaşdırılmış və praqmatik siyasət həyata keçirən, sülhü və dialoqu təşviq edən dövlətdir. Rəsmi Bakının regional əməkdaşlığa verdiyi önəm Cənubi Qafqazda etimad mühitinin möhkəmlənməsinə və yeni iqtisadi imkanların yaranmasına xidmət edir.
Bilal Dündar bildirib ki, Türkiyə ilə Azərbaycan arasında mövcud olan strateji müttəfiqlik münasibətləri də regionun təhlükəsizlik arxitekturasının mühüm sütunlarından biridir. Müdafiə sənayesi, hərbi əməkdaşlıq, enerji, nəqliyyat, ticarət və humanitar sahələrdə həyata keçirilən birgə layihələr iki qardaş ölkənin gücünü artırmaqla yanaşı, regional sabitliyə də mühüm töhfə verir.
Ekspert əlavə edib ki, beynəlxalq tədbirlərin Azərbaycanda yüksək səviyyədə təşkili ölkənin təhlükəsizlik sisteminin səmərəliliyini nümayiş etdirir. Dünyanın müxtəlif ölkələrindən gələn dövlət rəsmilərinin, iş adamlarının və beynəlxalq təşkilatların nümayəndələrinin Azərbaycana inamla səfər etməsi ölkənin beynəlxalq nüfuzunun göstəricilərindən biridir.
Bilal Dündar qeyd edib ki, Azərbaycan multikultural dəyərlərin qorunmasına, dini və etnik tolerantlığın inkişafına xüsusi önəm verir. Fərqli mədəniyyətlərin və dinlərin nümayəndələrinin sülh və qarşılıqlı hörmət şəraitində yaşaması da ölkədə sabitliyin möhkəmlənməsinə xidmət edən mühüm amillərdəndir.
Onun sözlərinə görə, milli həmrəylik və vətəndaşların dövlət ətrafında sıx birləşməsi Azərbaycanın ən böyük üstünlüklərindən biridir. Bu birlik ölkənin istənilən daxili və xarici çağırışlara qarşı dayanıqlılığını artırır və inkişaf strategiyasının uğurla həyata keçirilməsini təmin edir.
Türkiyəli siyasi ekspert vurğulayıb ki, qlobal təhlükəsizlik sistemində ciddi dəyişikliklərin baş verdiyi indiki mərhələdə Azərbaycan öz sabitliyi, təhlükəsizliyi və inkişaf modeli ilə fərqlənən dövlətlər sırasında yer alır. Onun fikrincə, bu model milli maraqlara söykənən siyasətin, güclü dövlət institutlarının, peşəkar idarəetmənin və xalq-dövlət birliyinin məntiqi nəticəsidir.
Bilal Dündar əminliyini ifadə edib ki, Azərbaycanın həyata keçirdiyi ardıcıl dövlət siyasəti bundan sonra da ölkədə sabitliyin və təhlükəsizliyin etibarlı şəkildə qorunmasına, iqtisadi inkişafın sürətlənməsinə, beynəlxalq nüfuzun daha da artmasına və Cənubi Qafqazda sülhün, əməkdaşlığın və rifahın möhkəmlənməsinə mühüm töhfə verəcək.
jpg_1782946307.jpg)
