Koreya Respublikasının paytaxtı Seulda Azərbaycanın bu ölkədəki səfirliyi Müstəqillik Günü münasibətilə rəsmi qəbul təşkil edib.
AZƏRTAC xəbər verir ki, tədbirdə Koreya Xarici İşlər Nazirliyi və digər hökumət qurumlarının məsul şəxsləri, ictimai-siyasi, işgüzar, elmi, mədəni dairələrin, mətbuatın təmsilçiləri, diplomatlar, Azərbaycan diasporunun fəalları və Koreyada təhsil alan azərbaycanlı tələbələr iştirak edib.
Ölkəmizin Koreya Respublikasındakı səfiri Ramin Həsənov 107 il əvvəl xalqımızın dövlət müstəqilliyini əldə etməsi barədə danışıb, müsəlman Şərqində ilk respublika olan Azərbaycan Xalq Cümhuriyyətinin demokratik, dünyəvi və mütərəqqi dövlətçiliyin bərqərar olması üçün atdığı addımları, mövcud olduğu cəmi 2 ildə ərzində ölkədə və beynəlxalq aləmdə qazandığı uğurları vurğulayıb. Səfir qeyd edib ki, Azərbaycan Xalq Cümhuriyyəti sovet işğalı ilə əlaqədar süqut etsə də, 1991-ci ildə müstəqilliyini bərpa edən Azərbaycan Respublikası özünü məhz Azərbaycan Xalq Cümhuriyyətinin varisi elan edib və onun əsasını qoyduğu demokratik dəyərləri və ənənələri bərpa edib. Müstəqilliyinin ilk illərindən bəri çoxsaylı çağırışlar və Ermənistanın hərbi təcavüzü ilə üzləşən Azərbaycan Ümummilli Lider Heydər Əliyevin hakimiyyətə qayıtması ilə sabit, güclü və beynəlxalq aləmdə söz sahibi olan dövlətə çevrilib.
Azərbaycanın uğurlu siyasi və iqtisadi inkişaf yolu keçməsi, regionda beynəlxalq əməkdaşlığın əsasını qoyması, nəhəng enerji, nəqliyyat və infrastruktur layihələrini uğurla həyata keçirməsi, beynəlxalq aləmdə etibarlı tərəfdaşa çevrilməsindən bəhs edən diplomat, Azərbaycan Prezidenti, Müzəffər Ali Baş Komandan İlham Əliyevin rəhbərliyi altında Vətən müharibəsində qazanılan Qələbə ilə ölkəmizin Ermənistanın uzunmüddətli işğalına son qoyması, öz ərazi bütövlüyü və suverenliyini bərpa etməsini vurğulayıb. Səfir diqqətə çatdırıb ki, Prezident İlham Əliyevin müvafiq Sərəncamı ilə 2025-ci il Azərbaycanda “Konstitusiya və Suverenlik İli” elan olunub.
Ramin Həsənov, həmçinin Azərbaycanın qlobal məsələlərin həlli üçün göstərdiyi səylərdən, bu xüsusda ölkəmizin ötən il COP29 tədbirinə müvəffəqiyyətlə evsahibliyi etməsindən, Azərbaycanın COP29 sədrliyi altında qlobal iqlim fəaliyyətində əldə olunmuş nailiyyətlərdən danışıb, Koreya Respublikasının sözügedən tədbirdə böyük nümayəndə heyəti ilə iştirak etdiyini diqqətə çatdırıb. Azərbaycan-Koreya əlaqələrinə toxunan səfir qlobal iqlim fəaliyyətinin də bu iki ölkə arasında faydalı əməkdaşlıq üçün böyük potensiala malik olduğunu diqqətə çatdırıb.
Koreya Respublikasının xarici işlər nazirinin müavini Kvon Ki-hvan Koreya hökuməti və xalqı adından Azərbaycanı təbrik edib. O bildirib ki, Azərbaycan Koreyada “Odlar diyarı” kimi tanınır və bu, ölkəmizin zəngin mədəni irsi, eləcə də Azərbaycan xalqının hərarəti ilə bağlıdır.
Azərbaycanın Avropa və Asiya arasında körpü rolunu oynadığını bildirən koreyalı diplomat ölkəmizin üzləşdiyi çətinlikləri arxada qoyaraq, davamlı səy və qətiyyətin sayəsində iqtisadi inkişafa və sosial tərəqqiyə nail olduğunu vurğulayıb.
Nazir müavini 1992-ci ildə Azərbaycan və Koreya arasında diplomatik münasibətlərin qurulmasından bəri iki ölkənin müxtəlif sahələrdə uğurla əməkdaşlıq etməsindən danışıb. Son illərdə baş tutan yüksəksəviyyəli siyasi səfərlərin hər iki ölkənin əməkdaşlıq iradəsinin təcəssümü olduğunu bildirib. Vurğulayıb ki, Altay dil ailəsinə mənsub olan Azərbaycan və Koreya xalqlarını mədəni yaxınlıq və oxşar dəyərlər birləşdirir.
Rəsmi qəbul ziyafətlə davam edib.
Tədbir iştirakçıları azərbaycanlı gənc rəssamların əsərlərindən ibarət sərgi ilə tanış olublar.
jpg_1775472819.jpg)
