Azərbaycanın müstəqilliyini bərpa etdiyi son otuz beş il ərzində keçdiyi yol həm keşməkeşli, həm də olduqca qürurvericidir. Ötən əsrin 90-cı illərinin əvvəllərində ağır iqtisadi böhran, daxili xaos və torpaqlarının işğalı ilə üz-üzə qalan gənc respublika bu gün dünyanın tam müstəqil, sözü imzası qədər keçərli olan nüfuzlu dövlətlərindən birinə çevrilib.
Uğurlu və sabit inkişafın təməli
Bu möhtəşəm inkişaf yolunun təməli Ulu Öndər Heydər Əliyevin qətiyyətli siyasəti sayəsində qoyulub. Qurtuluş missiyasını həyata keçirən Ulu Öndər dövləti məhv olmaq təhlükəsindən qurtardı, daxili sabitliyi bərpa etdi və “Əsrin müqaviləsi” kimi tarixi layihələrlə gələcək tərəqqi platformasını yaratdı. Bu möhkəm təməl ötən dövr ərzində Prezident İlham Əliyevin uzaqgörən siyasəti, güclü iradəsi və sistemli islahatları ilə daha da zənginləşərək öz zirvəsinə - ərazi bütövlüyümüzün və suverenliyimizin tam bərpasına çatdı.
Azərbaycanın qət etdiyi inkişaf yolu barədə Bakıda “Ortaq gələcək naminə dialoq” mövzusunda VII Ümumdünya Mədəniyyətlərarası Dialoq Forumunun açılış mərasimində söz açan Prezident İlham Əliyev vurğuladı ki, əldə olunan bütün bu uğurların arxasında məhz Azərbaycan xalqının gərgin zəhməti dayanır: “Azərbaycanda bu 35 il ərzində əldə olunan bütün nailiyyətlər Azərbaycan xalqının öz zəhməti sayəsində mümkün olmuşdur. Biz heç bir beynəlxalq yardım almamışıq. Dağıntılardan, işğaldan, geniş yayılmış yoxsulluqdan tərəqqiyə, inkişafa və uğurlara doğru yol keçmişik”.
Müasir dünyada baş verən mürəkkəb geopolitik proseslər, güc mərkəzlərinin toqquşması və ikili standartların hökm sürdüyü bir dövrdə hər bir dövlətin ən böyük sərvəti onun daxili sabitliyi, sarsılmaz milli birliyi və aydın inkişaf strategiyasıdır. Bu gün Azərbaycan dünyada həm də formalaşdırdığı unikal dövlətçilik və həmrəylik modeli ilə seçilən, sözü ilə əməli bir olan müstəqil respublikadır
VII Ümumdünya Mədəniyyətlərarası Dialoq Forumunun açılış mərasimindəki çıxışında dövlətimizin rəhbəri onu da bildirdi ki, multikulturalizm ənənələri, dini və etnik dözümlülük xalqımızın əsrlər boyu yaşatdığı meyarlar olub və biz onları yüksək dəyərləndiririk: “Azərbaycanın uğurlu və sabit inkişafının təməlində dayanan əsas səbəblərdən biri isə cəmiyyətimizdəki ahəngdarlıqdır. Bütün etnik qrupların, dinlərin nümayəndələrinin Konstitusiyamıza uyğun olaraq, nəinki bərabər hüquqları var, onlar, həmçinin bir ailə kimi yaşayırlar. Biz həmrəylik, qarşılıqlı hörmət və anlaşmanın ən yüksək səviyyəsini həqiqətən hiss edirik. Hamımız milli ideyalar ətrafında birləşirik”.
Dövlət başçısının bu sözləri sübut edir ki, Azərbaycanın gücü həm də onun multikultural ənənələrində, bu müxtəlifliyi vahid milli ideologiya ətrafında birləşdirə bilməsindədir. Ölkə daxilində hər hansı ideoloji və ya sosial riskin olmaması məhz bu rəngarənglikdən doğan ahəngdarlıqdan qaynaqlanır.
Bu gün cəmiyyətimizin malik olduğu harmoniya hər cür kənar təsirlərə qarşı ən güclü qalxandır. Əsrlər boyu müxtəlif mədəniyyətlərin qovuşuğunda yaşayan xalqımız üçün multikulturalizm, tolerantlıq gündəlik həyat tərzidir. Ancaq qloballaşan dünyada məlumat axınının sürətləndiyi və müxtəlif ideoloji manipulyasiyaların artdığı bir dövrdə bu birliyi qorumaq üçün hər bir vətəndaşdan yüksək mənəvi yetkinlik tələb olunur. Azərbaycanın gücü ondadır ki, xalq ilə dövlət arasındakı etimad bağı heç bir kənar qüvvəyə bu ahəngdarlığı pozmağa imkan vermir.
“Sənin müstəqil bir ölkəyə necə yaşamalı olduğunu diktə etməyə mənəvi haqqın varmı?”
Bu gün dünyada dövlətlərin təhlükəsizliyi yalnız fiziki sərhədlərin qorunması ilə bitmir. Ən ciddi təhdidlərdən biri isə daxili işlərə qarışmaq və cəmiyyətin tarazlığını pozmağa hesablanan ideoloji müdaxilələrdir. Bəzi dairələr başqalarına “ağıl öyrətməyə”, necə yaşamaq lazımdırsa onu diktə etməyə çalışırlar. Halbuki bu, beynəlxalq hüququn təməl prinsiplərinə ziddir və ikili standartların təzahürüdür.
Prezident İlham Əliyev forum iştirakçıları qarşısında bu yanaşmaya qarşı çox kəskin çıxış etdi: “İkili standart həm də kiminsə sənə necə yaşamağı öyrətmək istəməsidir. Halbuki bunu etməzdən əvvəl güzgüyə baxıb özündən soruşmalısan: sənin kiməsə ağıl öyrətməyə, müstəqil bir ölkəyə necə yaşamalı olduğunu, nə etməli və nə etməməli olduğunu diktə etməyə mənəvi haqqın varmı?”
Başqa ölkələrə yuxarıdan aşağı baxaraq dərs keçməyə çalışanlara qarşı Azərbaycanın mövqeyi prinsipialdır və hər hansı üstünlük hissindən doğan belə diktələri qətiyyətlə rədd edir. Ölkəmiz heç kimin daxili işinə qarışmır, başqalarına “məsləhət vermir” və təbii olaraq özünə qarşı da eyni dürüst münasibəti tələb edir.
Prezident İlham Əliyevin söylədiyi kimi: “Biz heç vaxt bunu etmirik. Biz diqqətimizi öz daxili işlərimizə yönəldirik. Başqa ölkələrdə baş verənlər isə həmin ölkələrin xalqlarının işidir. Bu, bizim işimiz deyil. Biz də özümüzə qarşı eyni münasibəti gözləyirik və buna nail oluruq.
Hər hansı hörmətsizlik əlaməti, əsassız üstünlük hissinin istənilən təzahürü, həmçinin kiminsə bizə nə isə diktə edə biləcəyi barədə əsassız düşüncələr tərəfimizdən müqavimətlə və çox qətiyyətli mövqe ilə qarşılanıb, bundan sonra da belə olacaqdır”.
Azərbaycanın son illərdə dünyaya göstərdiyi ən böyük örnəklərdən biri otuz illik münaqişəni məhz öz gücü ilə həll etməsidir. Beynəlxalq vasitəçilərin münaqişəni dondurmaq cəhdlərinə baxmayaraq, xalqımız haqq mübarizəsindən vaz keçmədi. Beynəlxalq hüququn təqdim etdiyi qanuni özünümüdafiə hüququndan istifadə edərək tarixi ədaləti bərpa etdi. Bu gün müharibə girdabında çabalayan və çıxış yolu tapa bilməyən bir çox ölkələr üçün Azərbaycanın bu təcrübəsi real və əməli sülh nümunəsidir.
Azərbaycanın birgəyaşayış, müharibələri sonlandırmaq və beynəlxalq hüququ bərpa etmək, qısa zamanda böyük tərəqqi keçərək dünyanın sayılıb-seçilən dövlətinə çevrilmək yolu, dövlət-xalq birliyi modellərinin hər biri ayrıca uğur hekayəsidir.
Bu nümunələr aydın şəkildə göstərir ki, Azərbaycan öz taleyinin tam sahibidir. Daxili həmrəyliyi və milli ideologiyası ilə sarsılmaz olan ölkəmiz öz yolu ilə inamla irəliləyərək qlobal miqyasda ləyaqətli dövlətçilik standartı müəyyən edir.
Yasəmən MUSAYEVA,
“Azərbaycan”
