Qubada abadlıq işləri səngimir
Regionlarda reallaşdırılan vacib layihələr arasında müxtəlif sahələr üzrə müasir infrastrukturun yaradılması, genişmiqyaslı tikinti-quruculuq və abadlıq işlərinin xüsusi çəkisi daha çoxdur. Bu hesaba şimal bölgəsinin seçilən rayonu Quba özünün davamlı inkişaf mərhələsini yaşayır.
Təbii gözəllikləri ilə fərqlənən rayonda fəaliyyət göstərən təşkilatların demək olar ki, hamısının bu inkişafda payı var. Bu sırada rayonun yol-nəqliyyat infrastrukturunun müasirləşdirilməsi xüsusi qeyd olunmalıdır. Qısa zamanda Quba şəhərinin küçələri yenidən qurulmuş, asfaltlanmış, əsaslı və ya cari təmir olunmuşdur. Yaxşı hal odur ki, bu sahədə işlər səngimir, həcmi və coğrafiyası genişlənir. Bundan əlavə, Nizami adına Mədəniyyət və İstirahət parkında, Dədə Qorqud parkında daxili imkanlar hesabına əsaslı təmir işlərinə başlanılmışdır. Ətraf mühitin qorunması və ekoloji vəziyyətin daha da yaxşılaşdırılması üçün rayon ərazisində tədbirlər görülür, o cümlədən yeni yaşıllıqlar salınır, ağacəkmə aksiyaları keçirilir.
Əhalinin kommunal xidmətlərlə - elektrik enerjisi, qaz və su ilə təchizatı sahəsində də ciddi problemlər yaşanmır. Problemin yaşanmadığı sahələrdən biri də təqaüdçülərin pensiyalarını vaxtında almaları üçün əlavə bankomatların qoyulmasıdır. İndi rayonun hətta bir neçə ucqar kəndində belə ödəmə terminalları və bankomatlar fəaliyyət göstərir.
Təhsil müəssisələrinin tikintisi istiqamətində də tədbirlər həyata keçirilir. Vəlvələ, Çiçi kəndlərində yeni məktəb binaları inşa olunaraq müəllim və şagirdlərin ixtiyarına verilib. Müasir tələblərə cavab verən bu təhsil müəssisələri bütün ləvazimatlarla təmin edilib. Hazırda daha bir neçə kənd məktəbi üçün yeni binaların inşası gözlənilir.
Qubanın kəndlərinin yolları da təmir edilir. Özü də təkcə təmir olunmur, həm də yolboyu abadlıq işləri aparılır. Məsələn, Bakı-Quba avtomobil yolunun Alekseyevka kəndi ərazisindən keçən hissəsində, İdrisiqışlaq-Qasımqışlaq-Xaspolad-Zərqava-Aspərəsti-Çayqışlaq yolunun ətrafında yaşıllıq zolaqları salınıb.
Bu il də Quba şəhərində və rayonun digər ərazilərində yenidənqurma və abadlıq işlərinin, eləcə də digər istiqamətlərdə yeni layihələrin həyata keçirilməsi nəzərdə tutulur. Çünki qarşıdan yaz və yay ayları gəlir. Həmin aylarda isə Quba daha çox qonaq-qaralı olur.
Akif ƏLİYEV,
"Azərbaycan"
