“Yusif Səmədoğlunun 90 illiyinin qeyd edilməsi haqqında” Prezident İlham Əliyevin sərəncamı dəyərli ziyalımıza dövlət səviyyəsində göstərilən ehtiramın, hörmətin bariz nümunəsidir.
Sərəncamda qeyd edildiyi kimi, Yusif Səmədoğlu XX əsr Azərbaycan nəsrinin yetirdiyi nadir istedada malik böyük simalarındandır. Yüksək bədiilik nümunəsi olan, dərin ictimai-mənəvi məzmunlu əsərləri, o cümlədən hekayələri, romanları və film ssenariləri ilə ədəbi prosesdə iz qoymuş yazıçının ötən əsrin 60-70-ci illərində milli nəsrin keyfiyyətcə yeni mərhələyə keçməsində xüsusi xidmətləri olmuşdur.
Xalq yazıçısının 90 illik yubileyi doğma Qazax rayonunda silsilə tədbirlərlə qeyd olunur. Bu günlər Qazax Dövlət Dram Teatrı görkəmli yazıçısının "Simurq quşu" tamaşasını nümayiş etdirmişdir. Tamaşadan əvvəl Qazax Dövlət Dram Teatrının direktor əvəzi Allahverdi Musayev çıxış edərək Yusif Səmədoğlunun XX əsr Azərbaycan nəsrinin yetirdiyi nadir istedada malik simalarından olduğunu qeyd etmişdir. Parlaq mədəniyyət hadisəsinə çevrilən, dünya və insan haqqında məşhur “Qətl günü” romanı ədibə Azərbaycanın hüdudlarından uzaqlarda da şöhrət qazandırmışdır. Qazax Dövlət Dram Teatrının kollektivi olaraq Xalq yazıçısı Yusif Səmədoğlunun 90 illiyinə həsr olunmuş bu tamaşanı hazırlamaqla dəyərli ziyalımıza olan ehtiramı bir daha nümayiş etdirmişdir.
Sonra Azərbaycan Yazıçılar Birliyi Qazax bölməsinin sədri, Əməkdar incəsənət xadimi, şair Barat Vüsal Xalq yazıçısı Yusif Səmədoğlunun 90 illiyinə həsr olunmuş tamaşanın hazırlanmasında əməyi olanlara minnətdarlığını bildirmişdir.
Qeyd edək ki, teatrın əməkdaşı Hikmət Orhun tərəfindən Yusif Səmədoğlunun eyni adlı hekayəsi əsasında səhnələşdirilən əsər tamaşaçılar tərəfindən alqışlarla qarşılanmışdır. Rolları Əməkdar artist Hacı Hacıyev, aktyorlar Elvin Abbasov, Ceyhun Vəlizadə, İlqar Hacəliyev, Kamil Məmmədov ifa etmişlər.
Sabir ƏLİYEV,
“Azərbaycan”
31 - Copyjpg_1766537868.jpg)
