Pasiyentləri süni zəkanın müalicə etdiyi klinika istifadəyə verilib

Səudiyyə Ərəbistanında dünyada ilk dəfə olaraq diaqnostika və pasiyentlərin müalicəsini süni zəkanın həyata keçirdiyi klinika fəaliyyətə başlayıb. Layihə Çin şirkəti “Synyi AI” tərəfindən yerli “Almoosa Health Group” ilə əməkdaşlıq çərçivəsində həyata keçirilib. Süni zəka həkiminin ixtisaslaşdığı sahə tənəffüs yolları xəstəlikləridir. Onun diaqnostika və müalicə planının seçilməsində səhv ehtimalı 0,3 faizdən aşağıdır. Təcrübənin məqsədi tənzimləyici orqanlar üçün məlumat toplamaq və təxminən 1,5-2 il ərzində bu cür süni zəka həkimlərinin geniş şəkildə tətbiqinə keçid üçün zəmin yaratmaqdır.

Pasiyentlər simptomlarını planşet vasitəsilə təsvir edirlər. Daha sonra Dr. Hua adı verilmiş süni zəka dəqiqləşdirici suallar verir və tibbi assistentlər tərəfindən toplanmış EKQ və rentgen görüntüləri də daxil olmaqla təqdim olunmuş məlumatları təhlil edir. Bu məlumatlara əsaslanaraq süni zəka müalicə planı hazırlayır və bu plan daha sonra real həkim tərəfindən yoxlanılır və təsdiqlənir. Bu yanaşma süni zəkanın səmərəliliyini insan nəzarətinin etibarlılığı ilə birləşdirməyə imkan verir. Hazırda Dr. Hua təxminən 30 tənəffüs yolu xəstəliyinin, o cümlədən astma və faringitin diaqnostikası üzrə ixtisaslaşıb.

Növbəti 1 il ərzində diaqnostika edilən xəstəliklərin spektrinin 50-yə qədər genişləndirilməsi planlaşdırılır. Buraya həmçinin qastroenteroloji və dermatoloji vəziyyətlər də daxil ediləcək. Klinikanın xidmətləri hazırda pilot proqram çərçivəsində ödənişsiz təqdim olunur. Bu proqram Səudiyyə Ərəbistanının tənzimləyici orqanlarından gələcəkdə rəsmi təsdiq almaq məqsədilə məlumat toplanmasına yönəlib. Dr. Hua süni zəka sistemi regionun tibbi terminologiyasına, dillərinə və mədəni xüsusiyyətlərinə uyğunlaşdırılmış lokallaşdırılmış dil modelləri əsasında qurulub. Bu, pasientlərlə daha dəqiq və uyğun qarşılıqlı əlaqəni təmin edir. Daxili sınaqlar diaqnostikada 0,3 faizdən az səhv payı ilə yüksək dəqiqlik göstərib.

Səudiyyə Ərəbistanı səhiyyə sahəsində innovativ texnologiyaların tətbiqini fəal şəkildə dəstəkləyir. Ölkədə rəqəmsal həllərin, o cümlədən süni zəkanın, 3D çapın və biotexnologiyaların sınaqdan keçirilməsi üçün “tənzimləyici sandbox” adlı xüsusi mühit yaradılıb. “Synyi AI” şirkəti toplanmış məlumatlardan istifadə edərək, növbəti 18 ay ərzində bu cür süni zəka həkimlərinin geniş miqyasda tətbiqi üçün hökumətdən tam təsdiq almağı planlaşdırır. Süni zəkanın ilkin tibbi yardıma inteqrasiyası səhiyyə sisteminə düşən yükü, xüsusilə ixtisaslı həkim çatışmazlığı olan bölgələrdə, əhəmiyyətli dərəcədə azalda bilər. Lakin hüquqi məsuliyyət, şəxsi məlumatların qorunması və pasientlərin süni zəkaya olan etibarı ilə bağlı məsələlər hələ də açıq qalır.

Ülkər XASPOLADOVA,

“Azərbaycan”