Prezident İlham Əliyevin tapşırıqları əsasında 2018-2025-ci illərdə 5 böyük sosial islahat paketi reallaşdırılıb. Bu islahatların əhatə dairəsi 4 milyon nəfərdir. Ardıcıl sosial islahatlar nəticəsində 2018-2025-ci illərdə minimum əməkhaqqı 3,1 dəfə, minimum pensiya 3 dəfəyədək, orta aylıq əməkhaqqı 2 dəfə, yaşayış minimumu 65 faiz, ehtiyac meyarı 2,2 dəfə artırılıb. Orta aylıq pensiya 2,6 dəfə, yaşa görə orta aylıq pensiya 2,5 dəfə, müavinət və təqaüd ödənişləri üçün illik vəsait 5 dəfə, ünvanlı sosial yardımın orta məbləği 2,7 dəfə artıb. 2018-2025-ci illərdə 5 böyük sosial islahat paketi üçün ayrılan illik əlavə vəsait isə 7,6 milyard manat təşkil edir.
Bu barədə AZƏRTAC-ın sorğusuna cavab olaraq Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən məlumat verilib.
Bildirilib ki, əhalinin 1 milyon 100 min nəfərini əhatə edən pensiya təminatı üzrə illik xərclər 2018-ci illə müqayisədə 2 dəfə artaraq 2025-ci il üzrə 7,2 milyard manatdan çox olub. Bu da pensiyaçıların sosial müdafiəsinin daim diqqət mərkəzində olduğunu təsdiq edir. Dövlət Sosial Müdafiə Fondunun 2026-cı il üzrə ümumi xərclərinin 8 milyard 483 milyon manat həcmində olması proqnozlaşdırılır. Bu vəsaitin 96,6 faizi və ya 8 milyard 196 milyon manatının əhaliyə ödənişlərin payına düşəcəyi gözlənilir. Ümumilikdə, gələn il üzrə pensiyaların maliyyələşdirilməsi üçün ayrılan vəsaitin bu ilin təsdiqlənmiş xərcləri ilə müqayisədə 782,4 milyon manat və ya 10,9 faiz çox olması nəzərdə tutulub. Eyni zamanda, proqnoz göstəricilərə əsasən 2026-cı ildə orta pensiyanın 9,2 faiz artaraq 590 manata, yaşa görə orta pensiyanın isə 629 manata çatması proqnoz edilir.
İndeksləşdirmə əsasında pensiya artımına gəldikdə isə, bildirilib ki, qanunvericilik əsasında hər il bütün pensiyalar Dövlət Statistika Komitəsinin təqdim etdiyi məlumata əsasən, əvvəlki ilin orta aylıq əməkhaqqı artımı ilə bağlı rəsmi statistik göstərici əsasında indeksləşdirilərək artırılır. Bu artım ilin əvvəlindən hesablanır. Həmçinin hər ilin əvvəlində dövlət tərəfindən vətəndaşların fərdi hesablarındakı pensiya kapitalları da artırılır, yəni pensiya kapitalında artım təkcə onların əməkhaqqından ayırmalar hesabına baş vermir, bu artıma dövlət tərəfindən də hər il dəstək verilir.
677jpg_1790033437.jpg)
