Peru Jurnalistlər İttifaqının sədr müavini Rikardo Sançes Serranın müəllifliyi ilə “Azərbaycanda 20 Yanvar faciəsinin 35-ci ildönümü” sərlövhəli məqalə İttifaqın rəsmi portalında və ölkənin ən məşhur mətbu orqanlarından “La Razon” qəzetində, o cümlədən Kolumbiyanın “Al Press” xəbər agentliyinin internet səhifəsində “Qara Yanvardan zəfərə doğru” başlıqlı məqalə dərc edilib.
Səfirlikdən AZƏRTAC-a verilən məlumata görə, məqalələrdə Azərbaycanda müstəqillik hərəkatını yatırmaq üçün sovet qoşunlarının Bakıya daxil olmasından və yüzlərlə dinc insanın ölümünə, yaralanmasına səbəb olan qanlı 20 Yanvar faciəsindən 35 il ötdüyü qeyd olunur, həmçinin ozamankı SSRİ rəhbərliyinin qanlı əməllərinin nəinki Azərbaycan xalqının azadlıq arzusunun qarşısını almağa nail olduğu, əksinə bu qətliamdan sonra azadlıq ideyalarının daha geniş vüsət aldığı və nəticədə azərbaycanlıların tarixə yenilməz, müzəffər xalq kimi düşdükləri vurğulanır.
Yazılarda həmin dövrdə yaranmış anarxik vəziyyətdən sui-istifadə edən Ermənistanın silahlı təcavüzü nəticəsində Azərbaycanın əzəli torpaqlarının işğal altına düşməsinə baxmayaraq, ölkəmizin tarixi ədaləti, eləcə də öz ərazi bütövlüyünü və suverenliyini tam bərpa etdiyi bildirilir.
Bundan başqa materiallarda bu gün Azərbaycanın regionun lider ölkəsinə çevrildiyinə, çoxşaxəli və güclü iqtisadiyyata malik olduğuna, Qoşulmama Hərəkatına uğurlu sədrliyinə və COP29 kimi mötəbər beynəlxalq tədbirlərə möhtəşəm ev sahibliyi etdiyinə diqqət çəkilir.
Eyni zamanda, Ulu Öndər Heydər Əliyevin Fərmanı ilə 20 Yanvarın Ümumxalq Hüzn Günü elan edildiyi, Azərbaycan xalqının şəhidlərini milli azadlıq hərəkatının daha da gücləndiyi bu gündə dua və ehtiramla yad etdiyi bildirilir.
677jpg_1790033437.jpg)
