Dünyada təbii ehtiyatların tükəndiyi bir vaxtda əhalinin ərzaq təhlükəsizliyi məsələsi özünü daha kəskin göstərir. Belə bir vaxtda daxili bazarın idxaldan asılılığının aradan qaldırılması üçün dövlət yerli istehsalın inkişafını önə çəkir.
Mayın 25-də Prezident İlham Əliyevin sədrliyi ilə kənd təsərrüfatı məslələrinə həsr olunmuş müşavirənin keçirilməsi, eləcə də "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı"nın təsdiq edilməsi bir daha onu göstərir ki, ölkədə kənd təsərrüfatının inkişafı dövlət siyasətinin prioritet istiqamətlərindən biridir. Hazırda regionlarda həmin proqramın icrası istiqamətində müvafiq tədbirlər görülməsi üçün planlar, layihələr hazırlanır, müşavirədə səsləndirilən məsələlərin və qarşıya qoyulan vəzifələrin icrası istiqamətində bütün qüvvələr səfərbərliyə alınır.
Ağstafa rayonunun iqtisadiyyatını əsasən aqrar sahə təşkil edir. Rayon fermerləri yaxşı bilirlər ki, etibarlı ərzaq təminatı ölkədə iqtisadi sabitliyin və sosial dayanıqlılığın başlıca şərtidir. Bu baxımdan kənd təsərrüfatı məhsulları istehsalının artırılması rayonda strateji hədəf kimi diqqətdə saxlanılır.
Kənd təsərrüfatı məhsulları istehsalında yüksək göstəricilərə nail olmaq üçün rayonda müxtəlif tədbirlər həyata keçirilir. Mövcud əkin sahələrindən səmərəli istifadə olunması, torpağın əkilib becərilməsində qabaqcıl texnologiyalara üstünlük verilməsi diqqətdə saxlanılır. Bunların sayəsində taxılçılıqda müsbət irəliləyişlər müşahidə edilir. Cari mövsüm 8187,2 hektarda taxıl səpini aparılmışdır ki, onun da 4812,3 hektarı buğda, 3374,9 hektarı arpadır. Səpinə rayonda fəaliyyət göstərən "Aqroservis"in və ayrı-ayrı fermerlərin şəxsi texnikaları cəlb edilmişdir. Qısa vaxt ərzində 10 hektara yaxın sahənin arpası biçilmişdir. Hər hektardan 27 sentner məhsul götürülmüşdür. Həmişə olduğu kimi, cari ildə də Göycəli, Köçəsgər, Eynallı, Dağ Kəsəmən və Qıraq Kəsəmən kəndlərində fəaliyyət göstərən fermerlər fərqlənmişlər.
Rayonda kənd təsərrüfatının digər sahələri üzrə göstəricilər də pis deyil. Hazırda 1619,3 hektar meyvə bağında becərmə işləri aparılır. Bağlara üzvi və mineral gübrələr verildikdən sonra ağacların dibinin yumşaldılmasına və budama işlərinə başlanılmışdır. Onu da qeyd edək ki, rayonda intensiv bağların salınmasına diqqət xeyli artmışdır. Bu hesaba Kolxəlifəli kəndində 55, Aşağı Göycəlidə 6, Zəlimxanda 1,49 hektar intensiv fındıq bağı salınmışdır. Hazırda bağlarda ziyanvericilərə qarşı kimyəvi mübarizə tədbirləri görülür.
Rayonun üzüm bağlarında da qızğın iş gedir. 508 hektar bağda şumlama aparılmaqla cərgə aralarında təmir-bərpa işləri aparılır. Keçən il hər hektardan 153 sentner üzüm götürən bağbanlar bu il daha çox məhsul gözləyirlər.
Fermerlər söhbət zamanı onu da bildirdilər ki, havaların əlverişsiz keçməsi kənd təsərrüfatına ziyansız ötüşməyib. Tez-tez yağışların yağması, dolu düşməsi məhsuldarlığı xeyli azaldıb. Odur ki, fermerlər çalışırlar ki, əldə qalan məhsulu vaxtında və itkisiz toplasınlar.
Sabir ƏLİYEV,
"Azərbaycan"
