Azərbaycan Asiyada Qarşılıqlı Fəaliyyət və Etimad Tədbirləri üzrə Müşavirəyə (AQEM) sədrliyi çərçivəsində inklüziv inkişafa, o cümlədən Qadınlar Şurasının yaradılmasına diqqət yetirir.
AZƏRTAC xəbər verir ki, bu sözləri AQEM baş katibi Kayrat Sarıbay qurumun Bakıda keçirilən Biznes Şurasının 8-ci plenar sessiyasında çıxış edərkən deyib.
O bildirib ki, qadınların hüquq və imkanlarının genişləndirilməsi təkcə ədalət məsələsi deyil, həm də davamlı inkişaf üçün strateji zərurətdir.
“AQEM Qadınlar Şurasının yaradılması institusional qarşılıqlı fəaliyyət platforması olacaq. Bundan başqa, AQEM-in məşvərət orqanları - Biznes Şurası və Gənclər Şurası arasında sinergiyanı inkişaf etdirmək də vacibdir, çünki gənclər innovasiyaların əsas mənbəyidir”, - deyə K.Sarıbay bildirib.
Baş katib vurğulayıb ki, AQEM Azərbaycanın kiçik və orta biznes (KOB), investisiya, biznes və ticarət məsələlərinə göstərdiyi diqqəti yüksək qiymətləndirir. Bununla yanaşı, o, inkişafla bağlı altı prioritet istiqamət və addımın müəyyən edildiyini vurğulayıb: KOB-un inkişafı üçün rəqəmsallaşmaya dəstək, qadın sahibkarlığın inkişafı, KOB-un "yaşıl keçid”inə dəstək, “ağıllı şəhər”lərdə KOB-un rolu və dövlət stimulları, transsərhəd ticarət və elektron ticarət, KOB-un qlobal əlavə dəyər zəncirlərində iştirakı.
Baş katib üzv dövlətləri AQEM Fondu çərçivəsində yeni layihələr təklif etməyə və fonda töhfə verməyə çağırıb: “2022-ci ildə yaradılmış AQEM Fondu çərçivəsində bu yaxınlarda Mərkəzi Əfqanıstanda ilk layihəyə - Qazaxıstanın təklifi və İraqın maliyyə dəstəyi ilə, davamlı buğda istehsalı layihəsinə start verilib. Fond şəffaflıq, könüllülük və konsensus prinsipləri əsasında fəaliyyət göstərir”.
jpg_1749076194.jpg)
