Azərbaycan Prezident İlham Əliyevin rəhbərliyi ilə son illərdə siyasi, iqtisadi, sosial və mədəni sahələrdə mühüm uğurlar əldə edib. Bu nailiyyətlər Prezident İlham Əliyevin Azərbaycan xalqı arasında yüksək ictimai dəstəyə malik olmasını şərtləndirən əsas amillərdən biridir.
Bu fikirləri AZƏRTAC-a açıqlamasında beynəlxalq münasibətlər üzrə ekspert Halit Hamzaoğlu deyib.
Onun sözlərinə görə, Azərbaycan bu gün diplomatiya sahəsində etibarlı və nüfuzlu dövlət kimi tanınır. Xüsusilə Qarabağ Zəfərindən sonra ölkənin həm regional, həm də qlobal miqyasda siyasi çəkisi və nüfuzu daha da artıb ki, bu da Azərbaycan cəmiyyəti tərəfindən böyük məmnunluqla qarşılanır.
“Azərbaycan hazırda Cənubi Qafqazın aparıcı dövləti kimi regional proseslərdə öncül rol oynayır və regional və qlobal bağlantı layihələrinin əsas iştirakçılarından biridir. Eyni zamanda, zəngin enerji ehtiyatlarına malik olması Azərbaycanın beynəlxalq münasibətlər sistemində mühüm tərəfdaş kimi mövqeyini daha da gücləndirir.
Azərbaycan Şərqlə Qərb arasında strateji körpüdür. Burada həlledici amil yalnız ölkənin coğrafi mövqeyi deyil, Prezident İlham Əliyevin uğurla həyata keçirdiyi çoxşaxəli xarici siyasət kursudur. Məhz bu siyasət Azərbaycanın beynəlxalq tərəfdaşlar üçün etibarlı dövlət kimi qəbul olunmasına imkan yaradır. Azərbaycan, eyni zamanda, Türk dünyasına açılan əsas qapıdır. Türk dünyasının inkişafı və gələcək inteqrasiyası baxımından Azərbaycanda baş verən müsbət proseslər xüsusi əhəmiyyət daşıyır. Azərbaycanın inkişafı və sabitliyi Türkiyənin, eləcə də bütövlükdə Türk dünyasının sabitliyi və inkişafı deməkdir. Prezident İlham Əliyevin rəhbərliyi ilə Azərbaycanın regionda və beynəlxalq münasibətlər sistemində artan gücü Türkiyədə böyük məmnunluq və sevinc hissi ilə qarşılanır. Çünki Azərbaycanın uğuru eyni zamanda Türkiyənin də uğurudur”.
H.Hamzaoğlunun sözlərinə görə, hazırda beynəlxalq münasibətlər sistemində ciddi geosiyasi qeyri-müəyyənliklər müşahidə olunur: “Belə mürəkkəb beynəlxalq şəraitdə etibarlı müttəfiqlik və hərtərəfli əməkdaşlıq xüsusi əhəmiyyət kəsb edir. Türkiyə və Azərbaycan bu mürəkkəb geosiyasi mühitdə vahid strateji baxışa malik iki qardaş dövlətdir. Bu strateji baxış mövcud təhdid və çağırışlara qarşı güclü və koordinasiyalı cavab verməyə imkan yaradır”.
Ekspert sonda bildirib ki, iki qardaş ölkə arasında formalaşmış münasibətlərin mahiyyəti qarşıya çıxan risk və çağırışlara operativ və səmərəli şəkildə cavab verilməsini asanlaşdırır. Türkiyə və Azərbaycanın sabitliyə əsaslanan siyasəti Cənubi Qafqazda sülhün təmin olunmasında həlledici rol oynayır. 2020-ci ildən sonra regionda yaranmış yeni geosiyasi reallıq Azərbaycan və Türkiyəni Cənubi Qafqazın əsas siyasi oyunqurucu dövlətlərinə çevirib. Həm Türkiyə, həm də Azərbaycan Cənubi Qafqazın sabit, proqnozlaşdırılan və sülh şəraitində inkişaf etməsində maraqlıdır. Bu baxımdan, Türkiyə–Azərbaycan qardaşlığı regionda sülhün, rifahın, sabitliyin və təhlükəsizliyin əsas təminatlarından biridir.
jpg_1785587612jpg_1785738592jpg_1787763249.jpg)
