Ermənistan sülh prosesinə təxribatla cavab verir

Son günlərdə Azərbaycan Ordusunun mövqelərinin Ermənistan ərazisindən atəşə tutulması davamlı hal alıb. Müdafiə Nazirliyinin məlumatlarına əsasən, martın 16-dan Ermənistanın Basarkeçər, Gorus, Qarakilsə, Keşişkənd rayonları istiqamətindən ordumuzun mövqeləri 9 dəfə atəşə tutulub.

Ermənistan Azərbaycan ərazilərini davamlı atəşə tutmağa başlayıb. Bu isə Azərbaycan və Ermənistan arasında sülh və dövlətlərarası münasibətlərin qurulması haqqında saziş layihəsinin mətni üzrə danışıqların yekunlaşdığı vaxtda baş verir. Xarici işlər naziri Ceyhun Bayramov martın 13-də jurnalistlərə müsahibəsində sülh sazişi layihəsi ilə bağlı danışıqlar prosesinin yekunlaşdığını bildirmişdi. "Biz bir neçə dəfə açıqlama vermişdik ki, son iki açıq maddə qalıb. Bu yaxınlarda Ermənistan tərəfi həmin açıq maddələr üzrə Azərbaycan tərəfinin təkliflərini qəbul edib, əlaqə kanalları vasitəsilə bizə çatdırıb. Ona görə mətn üzrə işlərin yekunlaşdırıldığını qeyd edə bilərik", - deyə nazir demişdi.

Ermənistanın kütləvi informasiya vasitələri də bu ölkənin Xarici İşlər Nazirliyinə istinad edərək sülh sazişi mətninin son iki bəndinin razılaşdırıldığı ilə bağlı məlumatlar yayıblar. Bir sıra dövlətlərdən gələn açıqlamalarda sülh sazişi ətrafında əldə olunan razılaşma alqışlanıb. 

Amma Ermənistanın ərazilərimizi atəşə tutmaqla təxribatlara yol verməsi sülh prosesinə kölgə salır. Ərazilərimizin atəşə tutulması həm də Ermənistanın ənənəvi davranışlarını xatırladır. Söhbət ondan gedir ki, hələ Vətən müharibəsindən əvvəl danışıqlar prosesinin hansısa mərhələsində Ermənistan dəfələrlə təxribatlar törədərək sülh danışıqlarını məqsədyönlü şəkildə tormozlamış, bununla da status-kvonun uzadılmasına çalışmışdı. Hansısa irəliləyiş məqamında və hansısa razılaşma üçün şərait yarananda İrəvan cəbhə xəttində təxribat törədirdi. Hətta işğalı davam etdirmək üçün danışıqlar zamanı Ermənistan prezidentinin tualet bəhanəsi ilə aradan çıxdığı vaxtlar da olub. 

44 günlük müharibədən sonra da sülh prosesinin uzanmasının səbəbkarı məhz Ermənistandır. Görünən odur ki, Ermənistan köhnə şakərindən əl çəkə bilmir və ya Paşinyan hökuməti də sələflərinin yürütdüyü siyasəti davam etdirir. Amma Ermənistan hakimiyyəti yenə də erməni xislətindən çıxış edərək ordumuzun mövqelərinin atəşə tutulduğunu inkar edir.  Belə ki,  bütün bunlardan sonra Ermənistan baş nazirinin ofisi Azərbaycana qarşı tamamilə əsassız iddialar irəli sürməklə yanaşı, yerdəki reallıqları və sərhədyanı bölgələrdə atışma faktlarını təhrif edib. 

Azərbaycan Xarici İşlər Nazirliyindən bununla bağlı verilən şərhdə bildirilib ki, Azərbaycan Müdafiə Nazirliyinin bəyan etdiyi atəş açılması hallarına, eləcə də Ermənistan tərəfinin də xəbərdar olduğu videoçəkilişlərdə görünən Ermənistan hərbi qulluqçularının açıq təxribatlarına son qoyulması sabitlik üçün zəruri şərtdir. Eyni zamanda Ermənistanın hələ bundan əvvəl də bütün vasitələrlə sülh prosesini pozduğu faktını xatırladıb: "İki ölkə arasında sülh və dövlətlərarası münasibətlərin qurulması haqqında sazişin mətninin yekunlaşdırılması ilə bağlı Ermənistanın guya xoşməramlı olmasına gəlincə, məhz Azərbaycanın sülh sazişi üzərində işləmək təklifi ilə ilk addımları hələ 2022-ci ilin əvvəlində atmasına baxmayaraq, Ermənistanın bütün vasitələrlə prosesi necə pozduğu faktını xatırlatmaq yerinə düşər". 

Sülhə gedən yol həm də Ermənistanın konstitusiyasına dəyişiklik edilməsindən keçir. Sülh sazişinin imzalanması üçün bu ölkə Azərbaycanın suverenliyi və ərazi bütövlüyünə qarşı iddiaları  konstitusiyasından çıxarmalıdır. Bu, Azərbaycanın prinsipial mövqeyidir.  Eyni zamanda Ermənistan fəaliyyətini faktiki dayandırmış ATƏT-in Minsk qrupunun və aidiyyəti strukturların da rəsmi şəkildə ləğv olunması üçün müraciət etməlidir.

Ermənistan əgər sülhün və münasibətlərin normallaşdırılmasının tərəfdarıdırsa, təxribatlara son qoymalı, Azərbaycanın prinsipial və beynəlxalq hüquq qaydalarına əsaslanan şərtlərinə əməl etməlidir.  Yalnız belə olduğu təqdirdə dayanıqlı sülhün əldə edilməsi mümkündür. Əgər bunlar olmazsa, sülh də olmayacaq, itirən isə yenə də Ermənistan olacaq.

Rəşad CƏFƏRLİ,

"Azərbaycan"