Tovuzda kütləvi xurma yığımına başlanıb. Bu il hava şəraiti qeyri-sabit və yağıntılı keçsə də, məhsuldarlığa elə də ciddi təsir etməyib. Odur ki, məhsulun vaxtında yığılması və tədarük edilməsi üçün bütün qüvvələr səfərbərliyə alınıb.
Xurmanın əsas alıcıları Rusiya bazarlarında olduğundan bağbanlar yığılan məhsulun çox hissəsini anbarlara vururlar. Bağ sahibləri yaxşı bilirlər ki, qonşu ölkədə dekabr və yanvarda xurma yaxşı qiymətə satılır. Fermerlər həm də onu deyirlər ki, yerli bazarlarda xurma az satıldığından qazanc aşağı olur. Hazırda yerli bazarlarda xurmanın bir kiloqramı 80-90 qəpikdir ki, bu da məhsulun heç maya dəyəri deyil. Ona görə də bağbanlar xurmanın ixracına daha çox üstünlük verirlər.
Məhsulun qısa vaxt ərzində anbarlara daşınması üçün hazırda çoxlu sayda texnika işləyir. Əl əməyi ilə yığılan və qablaşdırılan xurma daha sonra həmin texnikalar vasitəsilə soyuducu anbarlara daşınır. Anbarlarda çeşidlənib qablaşdırılandan sonra kameralara vurulur.
Hazırda Tovuz rayonunda 324 hektar xurma bağı var ki, onun da 17,5 hektarı bu il salınıb. Son məlumata görə, barverən bağların hər hektarından 264,6 sentner olmaqla 6350 ton məhsul toplanıb. Artıq məhsulun bir hissəsi Rusiya, Belarus, Moldova və Qazaxıstana göndərilib, qalanı isə soyuducu anbarlara yığılıb.
Rayonda əkilən xurma sortları əsasən "şişburun", "yastı karalyok", "yaponka", "Şərq xurması"nın müxtəlif sortları, "şokoladlı xurma", "Paşa", "Seyfəli", "xiekume", "tampoan" və sair sortlardır ki, onlara da tələbat çoxdur.
Rayonda xurma yetişdirməklə hər il çoxlu qazanc əldə edən çoxlu sayda fermer təsərrüfatı var. Qovlar şəhərindən Mətanət Məmmədovanın 33, Dönük Qırıqlı kəndindən Elnarə Abbasovanın 6, Düz Qırıqlı kəndindən Amil Zülfüqarovun 5 hektar xurma bağı var. Həmin bağlardan hər il yüksək məhsul götürülür.
Sabir ƏLİYEV,
"Azərbaycan"
