Azərbaycan Vahid sağlamlığın tətbiqi sahəsinə çox böyük maraq göstərir və 2024-cü ilin noyabrında Bakıda keçiriləcək COP29 tədbirinə hazırlıq məqsədilə Ümumdünya Səhiyyə Təşkilatının (ÜST) Azərbaycandakı Ölkə Ofisi “Vahid Sağlamlıq: sektorlararası dialoqla COP29-a hazırlıq” simpoziumunun həyata keçirilməsi də məhz bu marağın bariz nümunəsidir. Vahid Sağlamlıq yanaşması, insan, heyvan və ətraf mühit sağlamlığının bir-biri ilə əlaqəli olduğunu nəzərə alaraq, bu üç sahə arasında əməkdaşlığı və koordinasiyanı təşviq edir. Bakıda keçiriləcək COP29 tədbiri üçün hazırlıqlar çərçivəsində təşkil edilən bugünkü simpozium bu konseptin Azərbaycanda tətbiqi üçün əhəmiyyətli bir addımdır.

AZƏRTAC xəbər verir ki, bu fikirləri BMT-nin Azərbaycandakı rezident əlaqələndiricisi Vladanka Andreeva jurnalistlərə açıqlamasında söyləyib.

V.Andreeva xatırladıb ki, simpozium çərçivəsində müxtəlif sektorların nümayəndələri bir araya gələrək, ölkədə Vahid Sağlamlıq yanaşmasının tətbiqi, qarşılaşılan çətinliklər və bu sahədə əldə edilən uğurları müzakirə edir: “ÜST-nin Azərbaycan Ölkə Ofisi tərəfindən dəstəklənən bu təşəbbüs, həm də Azərbaycanın beynəlxalq səviyyədə Vahid Sağlamlıq yanaşmasının tətbiqi sahəsində liderlik iddiasını gücləndirir. Azərbaycan beynəlxalq səviyyədə Vahid Sağlamlıq yanaşmasının tətbiqi sahəsində güclü liderlik iddiasını davam etdirir. Bu yanaşma, sağlamlıq xidmətlərinin qlobal səviyyədə inteqrasiya olunmasına və daha effektiv idarə olunmasına şərait yaradır. Azərbaycanın bu sahədəki təşəbbüsləri, regional və beynəlxalq əməkdaşlığı artırmaq, qlobal sağlamlıq problemlərinə cavab vermək məqsədini daşıyır”.

“Azərbaycan Vahid sağlamlığı tətbiq edə bilmək üçün bu yanaşmanı öz milli tədbirlər planının hazırlanmasında, eyni zamanda, qanunvericiliyin hazırlanmasında da nəzərə almalıdır. Amma düşünürük ki, ən yaxşı nümunələrdən biri də qurumlararası İşçi qrupunun yaradılması ola bilər. Həmin İşçi qrupunda həm Səhiyyə Nazirliyi, həm Kənd Təsərrüfatı Nazirliyi, həm də Ekologiya və Təbii Sərvətlər Nazirliyi, o cümlədən digər aidiyyəti qurumlar və vətəndaş cəmiyyəti olacaq. Bu da Azərbaycanın səhiyyə sahəsində Vahid sağlamlıq sisteminin tətbiq olunmasına olan marağını və həvəsinin daha bir bariz nümunəsi ola bilər. Bu il COP29-da səhiyyə sahəsinə aid mövzular da əlavə olunub. Aparılacaq müzakirələrdə, sessiyalarda Azərbaycan Vahid sağlamlığa olan yanaşmasını nümayiş etdirə bilər”, - deyə Vladanka Andreeva əlavə edib.