Azərbaycanın xarici siyasəti beynəlxalq hüquq normalarına, mehriban qonşuluq, qarşılıqlı hörmət və əməkdaşlığa əsaslanır. Ölkəmiz qonşu dövlətlərlə bərabərhüquqlu və qarşılıqlı maraqlara əsaslanan əlaqələrə böyük önəm verir. İran ətrafında baş verən proseslərlə bağlı dövlətimizin mövqeyi də bunun göstəricisidir. Lakin İranın Azərbaycana münasibətdə siyasəti heç də birmənalı deyil.
Milli Məclisin deputatı Pərvin Kərimzadə "Azərbaycan" qəzetinə açıqlamasında bildirib ki, regionda sabitliyin təmin olunması, münaqişələrin dinc yolla həlli dövlətimizin prinsipial mövqeyidir. Yaxın regionda, qonşu dövlətlərin ərazilərində baş verən hərbi toqquşmalar ciddi narahatlıq doğurur: "Rəsmi Bakı tərəfləri maksimum təmkinli olmağa və problemləri danışıqlar yolu ilə həll etməyə çağırıb. Eyni zamanda Azərbaycan öz ərazisindən heç kimin İrana qarşı hərbi müdaxiləsi üçün icazə verməyəcəyini dəfələrlə bəyan edib. Çünki İran Azərbaycanın yaxın qonşusudur, bu ölkədə milyonlarla azərbaycanlı yaşayır. Belə olan halda, İranın Azərbaycanın Naxçıvan Muxtar Respublikasına dron hücumu anlaşılan deyil və qəbulolunmazdır. Bu hücum beynəlxalq hüquq normalarına zidd olmaqla yanaşı, İranın molla rejiminin riyakar mövqeyinin göstəricisidir. İran indiyədək dəfələrlə ölkəmizə qarşı təxribatlar edib, təhdidlər səsləndirib. Xüsusilə, dövlətimiz öz ərazi bütövlüyünü bərpa etdikdən sonra təhdidlər daha çox artıb. Çünki öz ərazilərini erməni işğalından azad edən Azərbaycan həm regionda, həm də dünyada mövqelərini gücləndirib. Eyni zamanda dövlətimiz regionda sülh və əməkdaşlıq müstəvisində önəmli təşəbbüslərlə çıxış edir. Bütün bunlar molla rejimini narahat edir. İranın ölkəmizə qarşı qərəzli, təhdid dolu münasibəti də bundan qaynaqlanır. Lakin molla rejimi Azərbaycan dövlətinin və onun liderinin qətiyyəti qarşısında geri çəkilməyə məcburdu".
Deputat bildirib ki, martın 5-də keçirilən Təhlükəsizlik Şurasının iclasında Prezident İlham Əliyev 2023-cü ilin yanvarında Tehranda Azərbaycan səfirliyinə edilən terror aktını da xatırladıb. Dövlətimizin başçısı demişdir: "O vaxt da bizdə şübhə yox idi ki, bunu törədən İran dövlətidir. Çünki bu terror aktı həm səfirliyin içində, həm səfirliyin ətrafında, təqribən 40 dəqiqəyə qədər davam edirdi. Bu 40 dəqiqə ərzində bir dənə də olsun nə təhlükəsizlik, nə polis nümayəndəsi səfirliyə yaxınlaşmayıb. Aydın məsələ idi ki, Azərbaycanı qorxutmaq, Azərbaycana qarşı çirkin əməllərini həyata keçirmək üçün bu terror aktı İranın dövlət qurumlarının ən rəhbər mərtəbələrindən sifariş edilmişdir. Bildiyiniz kimi, o vaxt Azərbaycan bu hadisəyə çox sərt reaksiya vermişdi, Azərbaycan səfirliyi İrandan təxliyə edilmişdi, bütün diplomatik əlaqələr dayandırılmışdı. İran tərəfi bizdən üzr istəməyə, öz günahını etiraf etməyə məcbur olmuşdu. O terror aktını törədənə bizim təkidimizlə ən ağır cəza da verilmişdi". Prezident bəyan edib ki, bu dəfə də cavab eyni olacaq. Azərbaycan bu terror aktı ilə, təcavüzlə heç vaxt barışmayacaq.
P.Kərimzadə xatırladıb ki, Azərbaycan Prezidenti İlham Əliyev İranın ali liderinin ölümü ilə bağlı başsağlığı verib, bu ölkənin səfirliyini ziyarət edib: "Halbuki Azərbaycan Prezidentindən başqa, heç bir dövlətin başçısı İran səfirliyinə gedərək başsağlığı verməyib. Ötən ilin iyun ayında İranla İsrail arasında 12 günlük hərbi toqquşma zamanı da Azərbaycan öz ərazisindən başqa ölkələrə İrana qarşı istifadə etməsi üçün icazə verməmişdi. Bu fakt göstərir ki, ölkəmiz mehriban qonşuluq siyasətinə hər zaman sadiqdir. Bunun müqabilində İranın Naxçıvana terror hücumu Azərbaycana qarşı düşmənçilik kimi qiymətləndirilə bilər. Bəs molla rejiminin bunları etməkdə məqsədi nədir? Bu sualın cavabını dövlətimizin başçısı çıxışı zamanı açıqlayıb. Cənab Prezident deyib: "İranın dövlət qurumlarının nəzarətində olan media resursları Azərbaycanı ləkələmək, İranda yaşayan soydaşlarımızın fikrini dəyişdirmək üçün Azərbaycana qarşı çirkin, şər-böhtan kampaniyası aparırdı. Çünki yaxşı bilirlər ki, bu gün müstəqil Azərbaycan dövləti İranda yaşayan bir çox azərbaycanlılar üçün də ümid yeridir. Yəni bizi ləkələmək, bizi şərləmək, gözdən salmaq İran ictimaiyyəti qarşısında bu məqsədi güdürdü".
Deputat deyib ki, İran tərəfindən Naxçıvan ərazisində mülki obyektlərin, mülki vətəndaşların istifadə etdiyi hava limanının hədəfə alınması dinc sakinlərə və mülki infrastruktura qarşı terror aktı kimi qiymətləndirilməlidir. Prezident İlham Əliyevin Təhlükəsizlik Şurasının iclasında dediyi kimi, Azərbaycana qarşı törədilmiş bu əsassız terror aktı ilə, təcavüzlə barışmayacağıq: "Silahlı Qüvvələrimizə təlimat verildi ki, cavab tədbirləri hazırlansın və həyata keçirilsin".
P.Kərimzadə vurğulayıb ki, Azərbaycan güclü dövlətdir və istənilən təhdidlərə qarşı qətiyyətlə cavab vermək iqtidarındadır. Ümid edirik ki, rəsmi Tehran bu insidentlə bağlı lazımi izahat verəcək, dövlətimizdən və xalqımızdan üzr istəyəcək. Eyni zamanda bu rejim soydaşlarımıza münasibəti dəyişməli, onların fundamental hüquqlarını təmin etməlidir. Milyonlarla soydaşımızın təməl hüquqlarının pozulması yolverilməzdir. Bundan əlavə, dünya ölkələrinin liderlərinin Azərbaycan Prezidentinə telefon zəngləri, verilən rəsmi bəyanatlar beynəlxalq birliyin İranın Naxçıvana hücumunu kəskin pislədiyini və ölkəmizlə həmrəy olduqlarını təsdiqləyir. Bu fakt, həm də Azərbaycanın və onun Liderinin yüksək beynəlxalq nüfuzunun göstəricidir. Ona görə də molla rejimi Azərbaycanın gücünü və qüdrətini unutmamalıdır.
Əsmər QARDAŞXANOVA,
"Azərbaycan"
jpg_1775472819.jpg)
