Azərbaycan İkinci Qarabağ müharibəsində düşmən ölkə olan Ermənistan üzərində qazandığı möhtəşəm Zəfər ilə regionda yeni reallıqlar yaradıb. Ən başlıcası isə 30 ilə yaxın davam edən erməni işğalına son qoyub, Ermənistan silahlı qüvvələrini diz çökdürüb. Azərbaycan qalib ölkə kimi müharibədən sonra bölgədə sülhün təmin olunması istiqamətində davamlı təşəbbüslər göstərib. Regiona əmin-amanlıq gətirmək üçün müəyyən şərtlər əsasında Ermənistana sülh təklif edib, bu istiqamətdə inamlı addımlar atıb.
Amma təəssüflər olsun ki, Avropa İttifaqı Cənubi Qafqazda sülhün, əmin-amanlığın olmasını istəmir. Buna görə də Azərbaycanla Ermənistan arasında aparılan danışıqlarda hansısa bir razılaşma məsələsində irəliləyiş nəzərə çarpan kimi bu qüvvələr çirkin məqsədlərinə çatmaq üçün müxtəlif yollarla regiona sabitlik və əmin-amanlıq gətirəcək sülhə mane olmağa çalışırlar. Avropa İttifaqı Ermənistana "mülki missiya" adı altında kəşfiyyatçılarını göndərib. Yalnız "binokl siyasəti" həyata keçirən bu gərəksiz missiyasını dövriyyəyə buraxıb, təxribatlar törətməklə, reallıqdan uzaq yalan açıqlamalar verməklə sülh prosesinin reallaşmasına əngəllər yaratmağa çalışıb. Bu isə Qərbin konstruktivlikdən çox uzaq olduğunu göstərən başlıca amillərdən biridir.
Bütün bunlarla kifayətlənməyən Qərb ölkələri başda Fransa olmaqla Ermənistanı daim silahlandırır, müxtəlif adlar altında hərbi yardımlar edirlər. Rəsmi İrəvan da verilən bu silahları həvəslə alır, İkinci Qarabağ müharibəsində şanlı Azərbaycan Ordusunun darmadağın etdiyi silahlı qüvvələrini bərpa etməyə çalışır. Avropadan göndərilənlərlə kifayətlənməyən İrəvan Hindistandan da silahlar alır. Ermənistan ikiüzlü siyasət yürüdərək bir tərəfdən sülh sazişi imzalamağa hazır olduğunu nümayiş etdirir, digər tərəfdən müharibəyə hazırlaşır. Rəsmi İrəvan bu addımı ilə sülhə yox, revanşizmə üstünlük verdiyini göstərir.
Avropa İttifaqı yalnız indi deyil, əvvəlki dövrlərdə də müxtəlif yollarla ölkəmizdə vəziyyəti gərginləşdirməyə cəhdlər göstərib. Qərb mediasında tez-tez yalanlarla dolu olan anti-Azərbaycan təbliğatı təşkil olunub. Artıq bu gün Azərbaycan maliyyə sisteminə tam nəzarət edir, ölkəmizə qarşı çirkin niyyət güdən xarici qüvvələrin əl-ayağı yığışdırılıb. Yerli QHT-lərə, əslində, müxalifətin qollarına verilən bütün qrant adlanan vəsaitlər indi qeydiyyatdan keçməlidir. Bütün bunlarla barışmaq istəməyən Qərb təşkilatlarının "yaradıcı" fəaliyyəti və müxtəlif kuryerlər vasitəsilə Gürcüstandan Azərbaycana pul daşınmasını təşkil edir. Bütün bunlar ifşa olunduqdan sonra isə Qərb mediasında ölkəmiz əleyhinə yalanlar, uydurmalar yer alır. Qərbin məqsədi Ermənistan vasitəsilə Cənubi Qafqazda gizli məqsədlərinə çatmaqdır.
Azərbaycan daim sülhün və sabitliyin tərəfdarıdır. Hansısa mübahisəyə və münaqişəyə səbəb ola biləcək məsələlərin danışıqlar yolu ilə həll olunmasına üstünlük verir. Azərbaycan müharibə başa çatandan sonra dərhal Ermənistanı sülhə, əmin-amanlığa dəvət edib. Amma Fransanın və başqa Qərb ölkələrinin diktəsilə oturub-duran rəsmi İrəvan sülh sazişi imzalamağa tələsmir. Havadarlarına arxalanaraq danışıqlar prosesini uzatmağa çalışır. Ümid edir ki, əgər gələcəkdə hər hansı bir müharibə olarsa, Fransa və başqa Qərb ölkələri onun yanında olacaq. Amma Ermənistan ciddi yanılır.
Aprelin 9-da ADA Universitetində "Yeni dünya nizamına doğru" mövzusunda keçirilən beynəlxalq forumda Azərbaycan Prezidenti İlham Əliyev iştirakçıların suallarına cavab verərkən bu vacib mövzuya da toxunaraq demişdir ki, Ermənistan və onun arxasında duran bəzi xarici qüvvələr onlara düzgün məsləhət vermirlər: "Əslində, 2020-ci il noyabrın 10-da Ermənistan kapitulyasiya aktına imza atdı və tarixdən hamımız bilirik ki, bir ölkə kapitulyasiya edəndə onun başına nə gəlir. Lakin bu, baş vermədi. Beləliklə, Ermənistan sanki Azərbaycan xalqının 30 illik işğal iztirabı olmamış, 44 günlük müharibə olmamış kimi davranmağa davam etdi və öz dırnaqarası dostlarından pis məsləhətlər aldı. Yeri gəlmişkən, bu proses hələ də davam edir. Baxmayaraq, biz dəfələrlə onlara xəbərdarlıq etmişik ki, onlar istər köhnə, istərsə də yeni dostları hesab etdikləri dairələrə bel bağlamamalıdırlar. Çünki onlar burada bizimlə üz-üzə qalacaqlar. Bizim maraqlarımızı, beynəlxalq arenada olan siyasi maraqlarımızı müdafiə etmək üçün kifayət qədər siyasi iradəmiz var və bizi siyasətimizdən döndərəcək hər hansı bir beynəlxalq təzyiqə məruz qoymaq mümkün deyil".
Dövlətimizin başçısı Minsk qrupunun hələ də ləğv edilməməsindən və Avropa İttifaqının tutduğu mövqedən əl çəkmədiyindən bəhs edərək demişdir ki, bizim hamımızın bildiyi kimi, Minsk qrupu Qarabağ münaqişəsi ilə bağlı olan məsələləri həll etmək üçün yaradılmışdır. Əgər Ermənistan hökuməti bəyan etdikləri kimi münaqişənin bitdiyini və Qarabağın Azərbaycanın bir hissəsi olduğunu hesab edirsə, Minsk qrupunun hüquqi olaraq buraxılmaması üçün heç bir səbəb yoxdur. De-fakto olaraq qrup fəaliyyət göstərmir, lakin rəsmi olaraq Minsk qrupunun buraxılması üçün Azərbaycanla birlikdə birgə müraciəti imzalamaqdan imtina etmək onların öz vaxtını gözləməsinə işarə edir. Ola bilsin onlar bəzi dəyişiklikləri, onlara üstünlüklər verən müəyyən beynəlxalq vəziyyəti gözləyirlər. Onlar Amerikada seçkilərdən sonra demokratların administrasiyada qalacaqlarına çox güvənirdilər. Lakin Prezident Trampın qələbəsi onları çox məyus etdi. Biz hamımız bunu bilirik. Buna baxmayaraq, Ermənistanın siyasi isteblişmenti Azərbaycan məsələsində parçalanmayıb. Onlar konsolidasiyalı mövqeyə malikdirlər. Bu, sadəcə, terminologiya, davranış və taktikadan asılı olan bir məsələdir. Beləliklə, biz buna hazır olmalıyıq, həm hərbi nöqteyi-nəzərdən, həm də siyasi nöqteyi-nəzərdən. Beləliklə, sülh sazişi imzalanana və Ermənistan konstitusiyasında hələ də mövcud olan Azərbaycana qarşı bütün ərazi iddialarından imtina edənə və Azərbaycanla münasibətlərin normallaşması üçün səmimi davranış sərgiləyənə qədər haylar təxribatlarını davam etdirəcəklər. "Burada sonuncu məqam odur ki, 2020-ci ildən bəri artıq beş il ötüb, biz hələ də Azərbaycanın Ermənistana qarşı yeni təcavüz planlaşdırdığına dair tamamilə əsassız olan mülahizə və ittihamlarla üzləşirik. Beləliklə, artıq beş il ötüb, lakin hələ də əsasən Fransa hökuməti və Avropa İttifaqında onların siyasətinə əməl edənlər və Blinken vəzifədə olarkən Dövlət Departamenti tərəfindən yaradılmış qara propaqanda davam edir".
Ermənistan və onu himayə edən Avropa İttifaqı sülh sazişinin imzalanmasını yubadaraq vaxt qazanmağa, hansısa bir bəhanə ilə regionda yeni süni münaqişə ocağı yaratmağa çalışırlar. Görünən odur ki, Avropa İttifaqının Ermənistandakı müşahidə missiyasının fəaliyyəti sülhə zərbə vurmağa, Cənubi Qafqazda sabitliyi pozmağa hesablanıb. Bu missiya Azərbaycan əleyhinə iş aparır, kəşfiyyat məlumatları toplayır. Ermənistan da bu şəraitdən istifadə edərək sülh danışıqları pərdəsi altında silahlı qüvvələrini gücləndirməyə çalışır. Bu prosesdə Avropa İttifaqının canfəşanlıq etməsi həm beynəlxalq, həm də yerli müşahidəçilərin diqqətindən yayınmır. Bütün bunlar isə Avropa İttifaqının iç üzünü açıb dünyaya göstərir, nüfuzunu aşağı salır.
Vahid MƏHƏRRƏMOV,
"Azərbaycan"
