Avropa ölkələrinin, Qərb dünyasının, eləcə də ermənipərəst beynəlxalq təşkilatların Azərbaycana qarşı soyuq münasibətləri "isinmək" bilmir. Bu ölkələrin, bəzi beynəlxalq təşkilatların anti-Azərbaycan mövqeyinin xalqımız üçün böyük Zəfərlə başa çatan İkinci Qarabağ müharibəsindən sonra daha da gücləndiyi aydın şəkildə hiss olunmaqdadır. Bunlar rəsmi Bakının zaman keçdikcə dünyada nüfuzunun artmasından, eləcə də beynəlxalq arenada nail olduğu uğurlara qısqanclıqla yanaşılmasından irəli gəlir. Avropa ölkələrindən, Qərb dünyasından, eləcə də ermənipərəst beynəlxalq təşkilatlardan Azərbaycana əsən soyuq küləklərin isə Fransadan start götürdüyü heç kimdə şübhə doğurmur.
İllərdən bəridir erməni lobbisinin təsiri altından çıxa bilməyən, anti-Azərbaycan bəyanatları ilə çıxış edən Avropa Parlamentinin ardınca Avropa Şurası Parlament Assambleyası (AŞPA) da ölkəmizə qarşı qərəzli, ikili standartlarla çıxış edir. Ölkəmizin əleyhinə həqiqətin heç yaxınlığına getməyən iddialar qaldırır, uydurma və əsassız bəyanatlar verir. Bu qurum heç bir tutarlı səbəb olmadan ötən ilin fevral ayında bədxahcasına Azərbaycanın səsini dondurmaq təşəbbüsü ilə çıxış etdi. Bu əməldən aydın görünən odur ki, AŞPA müstəqil xarici siyasət yürüdən dövlətləri hədəfə alır. 30 il Azərbaycan torpaqlarının işğalına göz yuman, heç bir sülh təşəbbüsü göstərməyən bu təşkilat İkinci Qarabağ müharibəsində Ermənistanın məğlubiyyətindən sonra ölkəmizə qarşı qərəzini daha da artırıb.
Xatırladaq ki, Azərbaycan 2001-ci ildə bu təşkilata üzv olub. Ermənipərəst, islamofob qüvvələr daim ondan Azərbaycana qarşı vasitə kimi istifadə ediblər. Hadisələrin belə qərəzli gedişindən, münasibətlərin soyuqluğundan belə bir fikir formalaşır ki, təkcə AŞPA deyil, Avropa Parlamenti də islamofob və türkofob təfəkkürlü nümayəndələrin düşərgəsindən başqa bir şey deyil. Onların atdığı qərəzli addımlar, sərgilədiyi mövqelər suverenliyini və ərazi bütövlüyünü bərpa etmiş Azərbaycana qarşı böyük haqsızlıq və ədalətsizlik kimi qiymətləndirilməlidir.
Rəsmi Bakı bütün beynəlxalq təşkilatlar kimi, AŞPA ilə də əməkdaşlığa hər zaman böyük maraq göstərib. Təbii ki, bu zaman ölkəmiz qarşılıqlı hörmət və etimad prinsipinin gözlənilməsini istəyib. Bunu görməyəndə isə müstəqil və suveren ölkə kimi AŞPA ilə adekvat davranıb. 2024-cü il fevralın 24-də AŞPA Azərbaycanın qurumda səsvermə hüququna veto qoydu. Bu ədalətsiz və qərəzli qərar, təbii ki, cavabsız qala bilməzdi. Bundan sonra Azərbaycan nümayəndə heyəti qurumdakı fəaliyyətini dondurdu və geri döndü. Artıq bir ildən çoxdur ki, Azərbaycan ilə bu təşkilat arasında soyuq münasibət yaranıb.
Bəzi ekspertlərin fikrincə, Avropa İttifaqında, Avropa Şurasında, eləcə də parlamentində postsovet məkanında yaranmış müstəqil respublikalara yuxarıdan-aşağı baxılır. Yəqin ki, ölkəmizə qarşı olan soyuq münasibət də buradan qaynaqlanır. İndiyə qədər rəsmi Bakı bu cür soyuq münasibəti, dini ayrı-seçkiliyi Brüsselin ermənilərə olan xüsusi rəğbətinin nümunəsində çox görüb. Dünyada hər şey dəyişilir, yenilənir. Yəqin ki, zaman gələcək AŞPA anti-Azərbaycan qüvvələrdən təmizlənəcək, onların yerini daha demokratik, haqqı-ədaləti müdafiə edən insanlar tutacaq.
Bu günlərdə Avropa Şurası Parlament Assambleyasının prezidenti Teodoros Rusopulos ölkəmiz əleyhinə ədalətdən, həqiqətdən uzaq olan qərəzli fikirlər səsləndirib. Onun əsassız fikirlərinə Xarici İşlər Nazirliyinin münasibəti gecikməyib. Nazirliyin mətbuat katibi Ayxan Hacızadə Avropa Şurası Parlament Assambleyası prezidentinin Azərbaycan əleyhinə qəbuledilməz fikirlərinə dair şərhində bildirib ki, Avropa Şurası Parlament Assambleyasının prezidenti Teodoros Rusopulosun "Alpha News" qəzetinə müsahibəsi zamanı Azərbaycan əleyhinə səsləndirdiyi iddiaları qətiyyətlə rədd edir və pisləyirik. Avropa Şurası nizamnaməsinin pozulması, AŞPA tərəfindən səlahiyyətlərin aşılması nəticəsində Azərbaycan əleyhinə addımdan sonra belə, Azərbaycan tərəfinin dialoqa açıqlığını nümayiş etdirməsinə baxmayaraq, Rusopulos, Şvabe və onlar kimi bir sıra şəxslərin davamlı şəkildə ölkəmizin beynəlxalq hüquqa və ədalətə söykənən mövqeyinə kölgə salmağa çalışdıqları məlumdur. AŞPA bu illər ərzində ikili standartlar əsasında apardığı anti-Azərbaycan siyasəti ilə Azərbaycan xalqının haqlı nifrətini qazanıb.
AŞPA-nın sədri Teodoros Rusopulos miliyyətcə yunandır. Xeyli müddət öz ölkəsində jurnalist kimi fəaliyyət göstərib. Həmin dövrlərdə ermənilərlə yaxından dostluq edib, sıx əlaqə qurub. Ermənilərin uydurduğu saxta tarix, yalanlar onda Azərbaycanofobiya yaradıb. Özü də hiss etmədən yalan fikirlərin əsirinə çevrilib. Təbiidir ki, onun ölkəmiz əleyhinə söylədiyi həqiqətdən uzaq olan fikirlər də həmin azərbaycanofobiyanın təsirindən yaranıb. AŞPA-nın sədri Teodoros Rusopulos həqiqəti əks etdirməyən qərəzli fikirləri ermənilərə xoş getmək üçün səsləndirib.
Prezident İlham Əliyevin iştirakı ilə aprelin 9-da ADA Universitetində "Yeni dünya nizamına doğru" mövzusunda beynəlxalq forum keçirilib. Dövlətimizin başçısı forum iştirakçılarının suallarını cavablandırarkən Avropa Şurasının ölkəmizə qarşı olan soyuq münasibətindən də söz açaraq demişdir ki, biz 2001-ci ildən bu təsisatın üzvü idik və bu vaxtadək Azərbaycan nümayəndə heyətinin mandatı şübhə altına alınmırdı. Məhz suverenliyimizi və ərazi bütövlüyümüzü bərpa etdikdən bir neçə ay sonra onlar bizi səsvermə hüququndan məhrum etdilər. Yaranmış şəraitdə bizim orada fəaliyyətimizi dayandırmaq qərarını verdik. Həmin vaxtdan etibarən biz onların iclaslarında iştirak etmirik: "Yeri gəlmişkən, Azərbaycan Avropa İnsan Haqları Məhkəməsinin hakimlərinin seçilməsində iştirak etmədiyindən, biz bu məhkəmənin qərarlarını tanımırıq. Bu, bizim mövqeyimizdir və fürsətdən istifadə edərək bəyan edirəm ki, Avropa Məhkəməsinin heç bir qərarının bizim üçün hüquqi qüvvəsi yoxdur. Çünki biz səsvermə hüququmuzdan məhrum edilmişik. Biz bu hakimlərə səs verməmişik. Biz onların kim olduğunu bilmirik. Zənnimcə, Avropa Şurası "üzərində oturduğu budağı" kəsdi. Onlar Azərbaycana qarşı ayrı-seçkilik etdilər, bizi təcrid etməyə cəhd göstərdilər, lakin bununla özlərini Qafqazdan məhrum etdilər. Gürcülər də eyni addımı atdılar. Mən Gürcüstanın orada təmsil olunmasının dayandırılması ilə bağlı hökumətin qərarını tam dəstəkləyirəm. Çünki bu, növbəti ayrı-seçkilik halı idi".
Azərbaycan demokratik, müstəqil, güclü dövlətdir. Dünyanın heç bir ölkəsinin və heç bir beynəlxalq təşkilatının dediklərini yerinə yetirmir, dövlət və milli maraqlarını özündə əks etdirən müstəqil siyasət yürüdür. Həm AŞPA, həm də başqa təşkilatlar bunu görür və dərk edirlər. Ona görə də ölkəmizə qarşı təzyiqləri artırmağa, bu yolla müstəqil siyasət yürütməyimizə əngəllər yaratmağa çalışırlar. Onlar anlamalıdırlar ki, Azərbaycanı yürütdüyü müstəqil siyasət yolundan heç bir beynəlxalq təşkilat, heç bir dövlət nə döndərə, nə də təzyiq göstərə bilər. Bu aspektdən yanaşanda AŞPA sədrinin mənasız, əsassız bəyanatı da Azərbaycan üçün heç bir əhəmiyyət daşımır.
Vahid MƏHƏRRƏMOV,
"Azərbaycan"
