Avropa Şurası Parlament Assambleyasının və Aİ-nin ölkəmizə qarşı qərəzli mövqeyini heç də təsadüfi hesab etmək olmaz.
Özlərini dünyada "demokratiya"nın, insan hüquqlarının "qoruyucu mələy"i kimi təqdim etmək istəyən bu təşkilatlar əslində qlobal güc mərkəzlərinin geosiyasi maraqlarını təmin etməkdədir. Belə ki, AŞPA bəzi dövlətlərə qarşı istifadə edilən təsir aparatına çevrilib.
30 il Ermənistanın işğalçılıq siyasətini görmək istəməyən AŞPA və Aİ öz işlərini soyuqqanlılıqla "siyasi məsələlərə qarışmırıq" kimi bəyanatlar verməklə bitmiş hesab edirdilər. Elə ki Azərbaycan 2020-ci ildə öz torpaqlarını azad etdi, elə ki Azərbaycanın 2023-cü ilin sentyabrında keçirdiyi 23 saatlıq lokal xarakterli antiterror tədbirləri nəticəsində Qarabağda suverenliyini tam təmin etdi, "siyasətə qarışmayan" bu təşkilatlar əllərinə dəsmal alıb az qala siyasi mərsiyələr oxuyub ölmüş artsaxa göz yaşı tökdülər. Erməni lobbisinin maliyyələşdirdiyi bəzi avropa dövlətlərini təmsil edən deputatlar dərhal köhnə bayatılarını yenidən səsləndirməyə başladılar. Öz korporativ maraqları naminə bəşəri dəyər olan insan haqları mövzusundan yapışaraq ölkəmizə qarşı çirkin kampaniyaya start verdilər. Hazır ssenari əsasında görünməyən bir dirijor çubuğu ilə ittihamlar işə düşdü. Guya Azərbaycan Qarabağda erməni əhaliyə qarşı etnik təmizləmə aparıb. Halbuki hər hansı zorakılıqdan söhbət belə gedə bilməzdi. Lokal xarakterli antiterror tədbirlərindən sonra ermənilər Xankəndidən könüllü qaydada köç etdilər. Onların köçdükləri zaman lentə alınan videogörüntüləri bütün dünya seyr edə bilirdi. Ermənistandan, Qarabağdan məcburi zorakılıqla köçürülən, döyülən, şikəst edilən, hər cür müsibətlərə tuş gələn azərbaycanlı qaçqın və məcburi köçkünlərdən fərqli olaraq dövlətimiz onları qayğı ilə yola saldı. Köç zamanı heç bir erməni onlara zor tətbiq edildiyini demədi.
Silahlı Qüvvələrimizin 2023-cü ilin sentyabrında keçirdiyi 23 saatlıq lokal xarakterli antiterror tədbirləri nəticəsində Qarabağda suverenliyimizi tam təmin etməsini qısqanclıqla qarşılayan AŞPA Azərbaycana qarşı sanksiya xarakterli qətnamə qəbul etdi.
2024-cü il yanvarın 24-də AŞPA-nın plenar iclası Azərbaycanın nümayəndə heyətinin etimadnaməsinin substantiv əsaslarla qəbul edilməməsinə çağıran qətnamənin lehinə səs verdi. Öz növbəsində Azərbaycan Respublikasının Avropa Şurası Parlament Assambleyasındakı nümayəndə heyəti yanvarın 24-də qurumun iclasında bəyanatla çıxış etdi. Azərbaycanın heç vaxt adıçəkilən qurumla əlaqələrini kəsmək kimi bir niyyəti olmayıb. Əksinə, bu qurumla əməkdaşlıqda maraqlı olub. Hətta Avropa konvensiyalarının əksəriyyətinə qoşulub. Bununla belə, AŞPA-da mövcud olan dözülməz irqçilik, Azərbaycanofobiya və İslamofobiya mühiti fonunda Azərbaycan nümayəndə heyəti AŞPA ilə əməkdaşlığı və təşkilatda iştirakını qeyri-müəyyən müddətə dayandırmaq qərarına gəldiyini bildirən bəyanatla çıxış etdi. Bundan başqa, rəsmi Bakı AŞPA-nın Azərbaycan nümayəndə heyətinin səlahiyyətlərinin məhdudlaşdırılmasının lehinə səs verən üzvlərinin ölkəmizə girişinin qadağan edilməsi haqqında qərar çıxardı...
Müstəqil siyasət yürüdən, milli və dövlət maraqlarını hər şeydən üstün tutan Prezident İlham Əliyev aprelin 9-da ADA Universitetində "Yeni dünya nizamına doğru" adlı forumda çıxış edərkən bildirmişdir: "Azərbaycan Avropa Məhkəməsinin çıxardığı qərarları tanımayacaq". Dövlətimizin başçısı onu da qeyd etdi ki, əgər nümayəndə heyəti assambleyanın iclaslarında iştirak etmirsə və Avropa İnsan Hüquqları Məhkəməsinin (AİHM) hakimlərinin seçimində səs verə bilmirsə, məhkəmənin Azərbaycan haqqında çıxardığı qərarlar da etibarsız sayılacaq. Dövlətimizin başçısı fikirini belə izah etmişdir: "Biz səsvermə hüququndan məhrum olunmuşuq. O hakimlərə səs verməmişik, kim olduqlarını bilmirik".
Bu günlərdə Avropa Şurası Parlament Assambleyasının milliyətcə yunan olan prezidenti Teodoros Rusopulosun "Alpha News" qəzetinə müsahibəsi zamanı Azərbaycan əleyhinə heç bir əsası olmayan iddialar səsləndirib.
Xarici İşlər Nazirliyinin mətbuat katibi Ayxan Hacızadə Teodoros Rusopulosun Azərbaycan əleyhinə qəbuledilməz fikirlərinə münasibət bildirərkən qeyd edib ki, Avropa Şurası nizamnaməsinin pozulması, AŞPA tərəfindən səlahiyyətlərin aşılması nəticəsində Azərbaycan əleyhinə addımdan sonra belə, Azərbaycan tərəfinin dialoqa açıqlığını nümayiş etdirməsinə baxmayaraq, Rusopulos, Şvabe və onlar kimi bir sıra şəxslərin davamlı şəkildə ölkəmizin beynəlxalq hüquqa və ədalətə söykənən mövqeyinə kölgə salmağa çalışdıqları məlumdur. AŞPA bu illər ərzində ikili standartlar əsasında apardığı anti-Azərbaycan siyasəti ilə Azərbaycan xalqının haqlı nifrətini qazanıb.
Diplomat daha sonra qeyd edərək demişdir: "Ölkəmizin rəhbərini təhqir etmək, "diktator" adlandırmaq isə ümumiyyətlə heç bir çərçivəyə sığmır, siyasi mədəniyyətsizlik və nadanlıqdır. Assambleyada hazırkı isterik vəziyyət və onun başında duran diktator Rusopulos AŞPA-dakı acınacaqlı vəziyyətin təzahürüdür. Eyni vəziyyət Avropa Parlamentində də mövcuddur".
Elşən QƏNİYEV,
"Azərbaycan"
