Ukrayna Prezidenti  Vladimir Zelenski “Xalqın xidmətçisi” fraksiyasının iclasında hökumətdəki son istefa  və rotasiyaları izah edib. O, xüsusən də xarici işlər naziri Dmitri Kulebanın istefasını şərh edərək, nazirin “silah təminatını təşviq etmək üçün kifayət qədər enerjiyə malik olmadığını” söyləyib.
İclasda keçmiş ədliyyə naziri Denis Malyuskanın hara gedəcəyi ilə bağlı heç bir müzakirə aparılmayıb, lakin dövlət başçısı qeyd edib ki, onun özü çoxdan vəzifəsini dəyişmək istəyirdi.
Zelenski qeyd edib ki, o, baş nazirin Avropa və Avro-Atlantika inteqrasiyası üzrə keçmiş müavini Olqa Stefanişinanın işindən məmnundur və buna görə də onun vəzifəsini artırmağı  və “daha çox imkanlar təqdim etməyi” təklif edir.
Mövzular arasında ölkəni tərk edən ukraynalıların geri qaytarılması ilə məşğul olacaq yeni nazirliyin yaradılması da olub. Lakin mənbənin sözlərinə görə, nazir hələ seçilməyib - müsahibələr davam edir.
Bu günlərdə bir sıra nazirlər gözlənilmədən istefa ərizəsi verib. Onların arasında Ukraynanın müvəqqəti işğal olunmuş ərazilərinin reinteqrasiyası naziri İrina Vereşşuk, Ədliyyə Nazirliyinin rəhbəri Denis Malyuska, Strateji Sənaye Nazirliyinin rəhbəri Aleksandr Kamışin, həmçinin Ətraf mühitin mühafizəsi və təbii sərvətlər naziri Ruslan Strelets də var.
“The Telegraph” qəzeti  yazır ki, Kulebanın istefası ən böyük şok olub: "Dmitri Kuleba kabinetin ən tanınmış üzvlərindən biri idi, lakin onun hava hücumundan müdafiə sistemləri və Qərb raketlərinə qoyulan məhdudiyyətlərin yumşaldılması ilə bağlı tələbləri son aylarda diqqətdən kənarda qalıb".

 “Azərbaycan”