Qərbin insan haqlarını və demokratiyanı qorumağa çalışması ilə bağlı iddiaları reallıqla ziddiyyət təşkil edir. Qərb ölkələrinin “yüksək idealları”, əslində, geosiyasi məqsədlərə çatmaq üçün bir vasitədir. Buna misal olaraq, Fransanın Yeni Kaledoniyadakı müstəmləkəçilik siyasətini göstərmək olar. Azərbaycanın bu məsələdə mövqeyi dünyaya Parisin əsl simasını görməyə imkan verib.
AZƏRTAC xəbər verir ki, bu barədə Türkiyənin “TimeTürk” nəşri “Fransa, Yeni Kaledoniya və seçki vicdanı” sərlövhəli məqaləsində yazır.
Məqalənin müəllifi Şakir Kurter xatırladır ki, Fransa hələ 1853-cü ildə Yeni Kaledoniyanı ələ keçirib və bu ərazi qurumu bu günə kimi “dünyada müstəmləkəçiliyin ən rüsvayçı nümunələrindən biri” olaraq qalır.
“Paris uzun illərdir ki, Yeni Kaledoniyanın müstəqilliyi ilə bağlı referendumu təxirə salır, seçki proseslərinin nəticələrini manipulyasiya edir və bölgənin etnik tərkibini yerli əhalinin - kanakların zərərinə dəyişməyə çalışır. XXI əsrin Yeni Kaledoniyasında, əslində, Parisin XIX əsrdəki Əlcəzair ssenarisi olduğu kimi təkrarlanmır. Onlar digər ölkələrin daxili işlərinə qarışaraq mühazirə oxuyurlar, xüsusən də fransızlar Türkiyədə “kürd məsələsi”ni aktiv şəkildə müzakirə edir və ya Azərbaycanla bağlı ermənipərəst bəyanatlar verirlər. Elə həmin Paris Suriyada terrorçuları dəstəkləyir”, -deyə nəşr vurğulayır.
Kurter daha sonra yazır ki, söhbət Fransanın özündən və ya dənizaşırı ərazilərdəki vəziyyətdən gedəndə, Paris yerli əhalinin, o cümlədən Korsika sakinlərinin hüquqlarını pozmaq üçün sistemli addımlar ataraq “maskasını kənara atır”.
Məqalədə deyilir: “Azərbaycanın Yeni Kaledoniya sakinlərinin hüquqlarını müdafiə edən hərəkatı dəstəkləməsi Parisin “seçki vicdanına” güclü zərbə vurdu. Yeni Kaledoniyada keçirilən mitinqlərdə Azərbaycan Bayrağının qaldırılması Parisdə ciddi narahatlığa səbəb olub, satın alınmış Qərb mediası isə Bakını “təxribatlarda” ittiham etməyə başlayıb. “Azadlıq lövhəsi” və Qərbin mənəvi üstünlüyü iddiaları artıq ədalətin tələblərinə uyğun gəlmir”.
Məqalənin müəllifi Azərbaycanın Yeni Kaledoniya ilə bağlı mövqeyini “Qərbin seçkilərə yanaşmasını məhv etməyə yönəlmiş manifest” adlandırır. “Ədalət Qərbin ikiüzlülüyünün deyil, ümumbəşəri dəyərlərin təzahürüdür”, - deyə Kurter vurğulayır.
