Ticarət və tarif müharibələrinin qalibi olmayacaq. AZƏRTAC xarici mediaya istinadla xəbər verir ki, bu bəyanatı Çin Xalq Respublikasının (ÇXR) Sədri Si Cinpin Vyetnama səfəri zamanı deyib. O əlavə edib ki, proteksionizm heç bir tərəf üçün müsbət nəticə verməyəcək.
Si Cinpinin bu bəyanatı dünyanın iki iqtisadi lideri olan Pekin ilə Vaşinqton arasında tarif yarışması – Donald Tramp administrasiyasının Çindən idxala 145 faizlik tariflər tətbiq etdiyi və qarşı tərəfin 125 faizlik rüsumlarla cavab verdiyi bir şəraitdə verilib. ABŞ administrasiyası, həmçinin Vyetnamdan idxal olunan mallara 46 faiz rüsum tətbiq edib.
Bazar ertəsi Vyetnamın paytaxtı Hanoyda olan ÇXR Sədri 2025-ci ilin ilk xarici səfərinə - Cənub-Şərqi Asiyada üç ölkədən ibarət turuna başlayıb. Bu, həm də onun 2012-ci ilin noyabrında Çin Kommunist Partiyasının Baş katibi olduqdan sonra Vyetnama dördüncü səfəridir.
Vyetnama ikigünlük dövlət səfərindən sonra Si Cinpin Kral Sultan İbrahimin dəvəti ilə Malayziyaya yollanacaq və cümə günü Kambocaya səfəri ilə bu turu yekunlaşdıracaq.
Səfər artan regional gərginlik və ABŞ ilə şiddətli ticarət müharibəsi fonunda baş verir. Belə ki, hər iki iqtisadi güc mərkəzi cavab tarifləri ilə məşğuldur.
Çin iyirmi ildən artıqdır ki, Vyetnamın ən böyük ticarət tərəfdaşı olaraq qalır və keçən il ikitərəfli ticarət həcmi 260 milyard dolları ötüb. ÇXR Sədri Hanoya gəlişindən əvvəl verdiyi açıqlamada diplomatiya və regional əməkdaşlığın əhəmiyyətini vurğulayıb. O deyib: “Biz fikir ayrılıqlarını düzgün idarə etməli və regionumuzda sülh və sabitliyi qorumalıyıq. Sərhədlərimizin quruda və Beibu körfəzində uğurlu delimitasiyası göstərir ki, biz uzaqgörənliklə dəniz məsələlərini məsləhətləşmələr və danışıqlar yolu ilə düzgün şəkildə həll etməyə tam qadirik”.
Çinin hər üç ölkə ilə güclü iqtisadi əlaqələri olsa da, həm Vyetnam, həm Malayziya, həm də regional təhlükəsizlikdə uzun müddətdir davam edən mübahisəli Cənubi Çin dənizində ASEAN-ın digər üzv dövlətləri ilə rəqabət fonunda ciddi fikir ayrılıqları var.
jpg_1745260093.jpg)
