Fransada kriminal gərginlik 

Həbsxana işçilərinə qarşı hücumlar getdikcə çoxalır

Fransanın müxtəlif şəhərlərində həbsxana işçilərinə qarşı hücumlar baş verib. İstintaqın bir versiyasına görə, bir həftə əvvəl başlanmış hücumlar narkotik mafiyasının ölkədə xüsusilə təhlükəli kartel üzvləri üçün iki ciddi rejimli həbsxana yaratmaq qərarı ilə əlaqəli ola bilər.

Əvvəllər məlum olmayan "DDPF" qrupu Fransa penitensiar sisteminin əməkdaşlarının əmlaklarının dağıdılması (əsasən avtomobillərin yandırılması) aktlarına görə məsuliyyəti öz üzərinə götürüb.

Aprelin 21-də səhər saatlarında Fransanın ədliyyə naziri Jerald Darmanen X sosial şəbəkəsi vasitəsilə hücumlar barədə məlumat verib: "Dünən gecə penitensiar xidmətin əməkdaşlarına və islah müəssisələrinə yenidən hücumlar edilib.  Heç bir itki olmayıb, lakin həbsxanalarımızda hakimiyyətin və asayişin bərpa olunduğu bir vaxtda bu hərəkətlər respublika üçün təhdiddir. Bu, dövlət və onun işçiləri üçün çətin, lakin zəruri məqamdır". 

Ədliyyə naziri həmçinin ümid etdiyini bildirib ki, Daxili İşlər Nazirliyi bu hücumları təşkil edən şəxsləri tez bir zamanda həbs edib iğtişaşlara son qoyacaq.

Lion prokurorluğunun verdiyi açıqlamaya görə, gecə yarısı Korbes rayonundakı həbsxananın mühafizə olunan  dayanacağında iki avtomobil yandırılıb və daha iki avtomobilə zərər verilib. Bir neçə saatdan sonra azyaşlı şübhəli şəxs həbsxananın yaxınlığında saxlanılaraq nəzarətə götürülüb, lakin prokurorlar onun hadisədə əli olduğunu hələlik müəyyən etməyiblər.

Həmkarlar ittifaqı və polis mənbələrinin AFP agentliyinə verdiyi məlumata görə, həmin gecə Villefranche-sur-Saone həbsxanasının yaxınlığındakı dayanacaqda mühafizəçilərdən birinə məxsus avtomobil yandırılıb.

Bundan əlavə, Villefontendə, Sen-Kventin-Fallavier şəhərindəki həbsxananın yaxınlığında  bir evin qapısı yandırılıb və fasadda güllə izləri aşkar edilib.

Milli Terrorla Mübarizə Prokurorluğunun (PNAT) press-relizində qeyd edilib ki, odlu silahlardan bir neçə atəş açılıb və "Molotov kokteylləri" həbsxana xidmətinin bir neçə əməkdaşının yaşadığı İsere departamentindəki yaşayış massivində olan evlərə atılıb.

Prokurorluq "şəxslərə qarşı cinayət törətmək məqsədilə terrorçu qruplaşmada iştirak etmə", "terror fəaliyyəti ilə əlaqədar vəzifəli şəxsi öldürməyə cəhd", "mütəşəkkil dəstə tərəfindən terror fəaliyyəti ilə əlaqədar təhlükəli vasitələrdən istifadə etməklə əmlaka ziyan vurma və ya məhv etmə" kimi halların istintaqını öz üzərinə götürdüyünü açıqlayıb.

"DDPF" qraffitisi Saint-Quentin-Fallavierdəki daha bir evdə tapılıb və bu xüsusiyyət, son bir həftə ərzində həbsxana işçilərinin avtomobillərinə və ya evlərinə, eləcə də Tulondakı həbsxanaya edilən demək olar ki, hər hücumda görünüb. Qrupun iddia edilən üzvləri adından sosial şəbəkələrdə yayılan xəbərlərə görə, abbreviatura "Defense des droits des   français" ("Fransız məhbusların hüquqlarının müdafiəsi") mənasını verir. Eyni zamanda Fransa mediasına müsahibə verən çoxsaylı ekspertlər bu abreviatura haqqında əvvəllər heç bir şey eşitmədiklərini bildiriblər.

Aprelin 15-də prokurorluq "həbsxana əleyhinə" hücumların təhqiqatını öz üzərinə götürdüyünü və onu Terrorla Mübarizə Şöbəsinə (SDAT), Milli Polisin müvafiq zona müdirliklərinə və Daxili Təhlükəsizlik Baş İdarəsinə (DGSI, daxili kəşfiyyat) həvalə etdiyini açıqlayıb.

Rizvan CƏFƏROV,

"Azərbaycan"