Görkəmli memar Sadıq Dadaşov qısa ömür yaşamasına baxmayaraq, Azərbaycan memarlıq sənətində parlaq iz buraxmışdır.
Bu barədə jurnalistlərə müsahibəsində Azərbaycan Memarlar İttifaqının İdarə Heyətinin sədri Elbay Qasımzadə deyib.
E.Qasımzadə qeyd edib ki, onun tanınmış memar Mikayıl Useynovla yaratdığı əsərlər bu gündə yaşayır və Azərbaycan milli memarlığının ən parlaq səhifəsi hesab olunur. O, həm də Azərbaycan memarlıq irsinin ilk tədqiqatçısıdır.
Korifey memarın 1937-ci ildə layihələndirdiyi “Nizami” kinoteatrının binası və onunla üz-üzə inzibati bina da memarlığımızın klassik əsərləri kimi öz dəyərini saxlamışdır. S.Dadaşov Bakı Musiqi Akademiyasının binasını layihələndirmiş, burada dahi Azərbaycan bəstəkarı Ü.Hacıbəylinin heykəlinin ucaldılması ilə memarlıqla heykəltəraşlığın həm məzmun, həm də sənətkarlıq nöqteyi-nəzərindən biri digərini tamamlayan bitkin bir kompozisiya həmahəngliyi yaratmışdır. Respublikada memarlıq sahəsində bir çox layihə məhz onun adı ilə bağlıdır.
Memarlar İttifaqının rəhbəri bildirib ki, S.Dadaşovun memarlıq sənəti respublikadan çox-çox uzaqlarda da tanınmış və şöhrət qazanmışdı. Onun böyük yaradıcılıq nailiyyətlərindən biri də Moskvada tikilmiş Xalq Təsərrüfatı Nailiyyətləri Sərgisi (XTNS) kompleksinin Azərbaycan pavilyonu olmuşdur. 1939-cu ildə hökumət tərəfindən həyata keçirilən S.Dadaşov və M.Useynov layihəsi keçmiş SSRİ məkanında memarlar tərəfindən yüksək maraqla qarşılanmış və bu layihəyə görə hər iki memar SSRİ Dövlət mükafatına layiq görülmüşdür.
E.Qasımzadə vurğulayıb ki, bu, dahi memarın Azərbaycan xalqına verdiyi töhfə ilə yanaşı, müasir memarlığa verdiyi istiqamətdir. Ondan sonra Azərbaycanda fəaliyyət göstərən Mikayıl Useynov və davamçıları Həsənağa Məcidov, Qəzənfər Əlizadə, Ənvər Qasımzadə və bir çox başqaları onların məktəbini keçmiş insanlardır.
