Ərazi bütövlüyümüzün və suverenliyimizin təmin olunması ilə müstəqil Azərbaycanın tarixində yeni bir mərhələ başlayıb. Yeni dövr isə yeni çağırışlar deməkdir. Yeni strateji mərhələdə Azərbaycan dövlətinin gündəliyində dayanan əsas prioritetlərdən biri işğaldan azad edilmiş ərazilərə Böyük qayıdışın təmin olunmasıdır.
Milli Məclisin deputatı Sevinc FƏTƏLİYEVA qəzetimizə açıqlamasında deyib ki, güclü Azərbaycan dövləti keçmiş qaçqın və məcburi köçkün vətəndaşlarımızın işğaldan azad olunmuş ərazilərə qayıdışını layiqli şəkildə təmin etmək əzmini nümayiş etdirir. Prezident İlham Əliyevin 22 iyul 2022-ci ildə imzaladığı müvafiq sərəncamla təsdiqlənən "Azərbaycan Respublikasının 2022-2026-cı illərdə sosial-iqtisadi inkişaf Strategiyası"nda Böyük qayıdış üzrə strateji çərçivə müəyyənləşdirilib. Sənəddə vurğulanır ki, işğaldan azad edilmiş ərazilərə Böyük qayıdış məqsədinin reallaşdırılması üçün əhalinin dayanıqlı məskunlaşması təmin olunacaq. Əhalinin dayanıqlı məskunlaşması ərazilərdə planlaşdırılan zəruri ilkin şərtlərin yaradılması ilə dəstəklənəcək. Ötən illər ərzində görülən işlər dövlətimizin bu istiqamətdə siyasi iradəsini nümayiş etdirir. Eləcə də Böyük Qayıdış üzrə I Dövlət Proqramı da uğurla icra olunur.
Deputatın sözlərinə görə, Prezident İlham Əliyevin işğaldan azad edilmiş ərazilərə mütəmadi səfərləri artıq dövlət idarəçiliyinin formalaşmış siyasi ənənəsinə çevrilib: "Bu səfərlər yalnız yeni infrastruktur layihələrinin istifadəyə verilməsi və ya tikinti işlərinin gedişi ilə tanışlıq məqsədi daşımır. Hər bir səfər Azərbaycanın postmünaqişə inkişaf strategiyasının əsas istiqamətlərini, dövlətin uzunmüddətli prioritetlərini və regional təhlükəsizlik konsepsiyasını özündə əks etdirən mühüm siyasi mesajlar verir. Prezidentin Şuşa, Xocavənd və Laçına son səfəri də bu baxımdan xüsusi əhəmiyyət daşıyır. Yeni sosial və turizm obyektlərinin, enerji layihələrinin istifadəyə verilməsi, yaşayış məntəqələrində aparılan bərpa işləri ilə tanışlıq, Böyük qayıdış çərçivəsində doğma yurdlarına qayıdan sakinlərlə görüşlər bir daha göstərdi ki, Qarabağ və Şərqi Zəngəzurun inkişafı vahid dövlət proqramının ardıcıl mərhələləridir. Qarabağ artıq bərpaolunan deyil, inkişaf edən regiondur. Şuşada yeni turizm infrastrukturu, Laçında enerji və kommunal layihələr, Xocavənddə yaşayış məntəqələrinin bərpası dövlətin strateji məqsədinin bu əraziləri ölkənin iqtisadi inkişaf mərkəzlərindən birinə çevirmək olduğunu göstərir. Burada "ağıllı şəhər" və "ağıllı kənd" konsepsiyaları, "yaşıl enerji" təşəbbüsləri və müasir şəhərsalma prinsipləri tətbiq edilir".
Böyük qayıdış proqramının icrasının artıq praktik mərhələyə keçdiyini deyən S.Fətəliyeva qeyd edib ki, yeni evlər, məktəblər, bağçalar, səhiyyə və sosial xidmətlər insanların doğma torpaqlarına təhlükəsiz və ləyaqətli şəkildə qayıdışını təmin edir. Prezidentin sakinlərlə görüşləri dövlət siyasətinin mərkəzində insan amilinin dayandığını bir daha nümayiş etdirir.
Deputat qeyd edib ki, Qarabağ və Şərqi Zəngəzurda reallaşdırılan möhtəşəm işlər Azərbaycanın güclü dövlət olduğunu bir daha təsdiqləyir: "Bu fakt göstərir ki, bundan sonra heç bir qüvvə dövlətimizə qarşı hansısa iddialarla çıxış edə bilməz. Bu baxımdan Xocavənddə sakinlərlə görüş zamanı Prezident İlham Əliyevin "İnanıram ki, daha lazım olmayacaq. Amma lazım olanda hamı bilməlidir ki, "Dəmir yumruq" yerindədir və yerində olacaq" fikri mühüm siyasi mesaj kimi qiymətləndirilməlidir. Bu bəyanat müharibə çağırışı deyil, Azərbaycanın sülhə sadiqliyini qorumaqla yanaşı, milli təhlükəsizliyini və suverenliyini qətiyyətlə müdafiə etmək əzmini ifadə edir".
S.Fətəliyeva bildirib ki, son illərin təcrübəsi davamlı sülhün yalnız etibarlı təhlükəsizlik təminatları ilə mümkün olduğunu göstərir. Məhz buna görə də iqtisadi inkişaf, quruculuq və güclü müdafiə potensialı Azərbaycanın postmünaqişə inkişaf modelinin ayrılmaz hissələridir. Prezident İlham Əliyevin növbəti səfəri bir daha təsdiqlədi ki, Qarabağ artıq keçmiş münaqişənin simvolu deyil. Bu gün region Azərbaycanın modernləşmə siyasətinin, Böyük qayıdış proqramının icrasının və uzunmüddətli inkişaf strategiyasının əsas platformasına çevrilir. Quruculuq və təhlükəsizliyin vəhdəti isə regionda davamlı sülhün və sabitliyin əsas təminatıdır.
Əsmər QARDAŞXANOVA,
"Azərbaycan"
