Ümumi sərhədləri olmasa da Azərbaycan Qırğızıstan üçün çox əhəmiyyətli ölkədir. Azərbaycan Cənubi Qafqaz və Xəzəryanı regionda mühüm coğrafi mövqeyə malikdir və Qırğızıstan üçün Türkiyə və Avropa bazarlarına çıxışı təmin edir.
AZƏRTAC xəbər verir ki, bu sözləri qırğızıstanlı politoloq, siyasət elmləri namizədi Ulanbek Asanaliyev yerli mətbuata açıqlaması zamanı bildirib.
Onun sözlərinə görə, Azərbaycan ilə əməkdaşlıq Qırğızıstan üçün nəqliyyat əlaqələrini genişləndirmək, yeni bazarlara çıxmaq və sərmayə cəlb etmək üçün faydalıdır.
“Azərbaycan Prezidenti İlham Əliyevin Qırğızıstana səfəri zamanı yükdaşımalar, gəmiçilik, neft, enerji və kibertəhlükəsizlik sahələrində əməkdaşlıq haqqında sənədlərin imzalanması təqdirəlayiqdir. Bunlarla yanaşı “AzerGold” ilə “Qırğızaltın” şirkətləri arasında əməkdaşlığı əks etdirən sənəd, eləcə də, Şuşa ilə Çolpon-Ata, Qəbələ ilə Qaqaqol, Gəncə il Oş şəhərlərinin qardaşlaşması onu deməyə əsas verir ki, səfər zamanı səslənən bəyanatlar yalnız kağız üzərində qalmayacaq real işlərin təməlini təşkil edəcək”, - deyə Ulanbek Asanaliyev qeyd edib.
Politoloq bildirib ki, Çolpon-Ata şəhərində Mərkəzi Asiya və Azərbaycan dövlət başçılarının qeyri-formal görüşünün keçirilməsi Qırğızıstanın regionda daha fəal siyasət yürütmək istəyini, region dövlətləri ilə yanaşı Azərbaycan vasitəsilə dünyaya iqtisadiyyatına inteqrasiya olunmaq niyyətini ortaya qoyur: “Qırğızıstan çoxvektorlu və ikitərəfli əlaqələrin inkişafı istiqamətində siyasət yürütməyə başlayıb. Qırğızıstan ilə Azərbaycan artıq mədəni əlaqələrin inkişafı ilə kifayətlənmir və əlaqələri iqtisadi müstəviyə keçirib nəqliyyat, tranzit, enerji, sərmayə və digər sahələrdə yaxın əməkdaşlıq üçün addımlar atırlar. Bu iki dövlətin yaxınlaşması Türk Dövlətlər Təşkilatının da güclənməsinə təsir edəcək. Azərbaycan Qırğızıstanın Yaxın Şərqə çıxışını da təmin etmək imkanına malikdir. Dənizə çıxışı olmayan Qırğızıstan üçün bu istiqamət olduqca əhəmiyyətlidir. Bu Qırğızıstana iqtisadiyyatını şəxaləndirmək, yeni texnologiyalara çıxış imkanı verəcək”.
