Süni intellekt texnologiyaları gündən-günə nəinki iqtisadi inkişafın əsas hərəkətverici qüvvələrindən birinə, hətta gündəlik həyatımızın ayrılmaz tərkib hissəsinə çevrilir. Son illər bu texnoloji yeniliyin nəzərəçarpacaq inkişafı və qlobal miqyasda bütün sahələrə təsirləri göz önündədir.
AZƏRTAC xəbər verir ki, bunu DOST Agentliyinin təşkilatçılığı ilə “SOCGOV 2025: Süni intellekt - insan və transformasiya üçün” mövzusunda keçirilən beynəlxalq konfransda çıxışı zamanı Kiçik və Orta Biznesin İnkişafı Agentliyinin (KOBİA) İdarə
Heyətinin sədri Orxan Məmmədov deyib.
Onun sözlərinə görə, yeni texnologiyaların sürətli inkişafı iqtisadi və sosial sektorlarda daha səmərəli qərarların qəbulunu sürətləndirir və süni intellektin analiz bacarıqları şirkətlərə və dövlət orqanlarına müştəri və vətəndaşların davranışlarını daha yaxşı anlamağa və buna uyğun strategiyalar hazırlamağa imkan verir. Bu baxımdan, beynəlxalq səviyyədə süni intellekt texnologiyaları ilə bağlı baş verən inkişaflardan və proseslərdən geri qalmaq bir müddət sonra iqtisadiyyatımız və bütövlükdə ölkəmiz üçün əhəmiyyətli çağırışlar və ciddi təhlükəsizlik riskləri yarada bilərdi: “Ona görə də artıq dövlət tərəfindən bu sahəyə diqqətin bir qədər də artırılmasına ehtiyac yaranmışdı və müvafiq addımlar da atıldı. “Azərbaycan Respublikasının 2025-2028-ci illər üzrə süni intellekt Strategiyası”nın qəbul olunması buna əyani misaldır. KOBİA olaraq, proseslərdən kənarda qala bilməzdik və bu baxımdan, fəaliyyətimizi iki mühüm istiqamət üzrə qurmuşuq. Birinci istiqamət, süni intellektə əsaslanan həll yollarının daxili biznes proseslərimizə və KOB-lara yönələn xidmət alətlərinə inteqrasiya edilməsi ilə bağlıdır. Bu məqsədlə e-KOB evi portalı layihəsi çərçivəsində işlər aparılır. Rəqəmsal mühitdə süni intellekt üzərindən biznes bələdçisi alətinin yaradılması nəzərdə tutulur. Yaxın gələcəkdə, həmçinin KOB sektoru üzrə qiymətləndirmənin aparılması və daha effektiv strateji qərarların qəbulu üçün süni intellektə əsas biznes analitikası sisteminin inkişafı barədə düşünürük. Mövcud və inkişaf etməkdə olan süni intellekt alətləri vasitəsilə biznes analitikasının məzmunu sürətlə inkişaf edir. Biz də fəaliyyətimizin optimallaşdırılması və KOB sektorunun daha effektiv dəstəklənməsi üçün yeni dövrün resurslarından geniş şəkildə istifadə etməyi hədəfləyirik. İkinci istiqamət isə süni intellekt texnologiyalarının KOB sektorunda tətbiqinin təşviq edilməsi ilə bağlıdır. Bu istiqamət üzrə həm mövcud dəstək mexanizmləri çərçivəsində, həm də tərəfdaş qurumlar ilə birgə layihə və proqramlar vasitəsilə müvafiq tədbirlər həyata keçiririk”.
Orxan Məmmədov vurğulayıb ki, KOB sektorunun digər bir əhəmiyyətli rolu onun cəmiyyətin süni intellekt texnologiyalarına hazırlıq səviyyəsini və ondan istifadə bacarıqlarını artıra bilməsi ilə bağlıdır. “Mövcud son statistikaya əsasən ölkədə muzdlu işçi qüvvəsinin 44 faizi KOB sektorunda çalışır. Potensial müştəri bazasını da nəzərə alsaq, bu o deməkdir ki, KOB-lar geniş əhali kütləsinə çıxış və təsir imkanına malikdir. Düşünürəm ki, sektoral bölgüdən asılı olmayaraq, süni intellekt təşəbbüslərinin həyata keçirilməsi zamanı bu amilin nəzərə alınması vacibdir. KOBİA olaraq biz dövlət və özəl tərəfdaşlar ilə birgə fəaliyyətə hazırıq. Çünki fəaliyyətimizin ilk dövrlərindən KOB subyektləri davamlı və sistemli kommunikasiya kanalları yaratmışıq. KOBİA yanında Biznes Şuranın dəstəyi ilə sektoral müzakirələr keçirir, KOB dostları vasitəsilə regional görüşlər təşkil edir və daxili resurslarımız, eləcə də ixtisaslaşmış şirkətlər cəlb etməklə müxtəlif mövzularda sorğular aparırıq. Qeyd edilən alətlər yeni texnoloji həll yollarının hazırlanması və biznes sektoru üzrə kütləviliyin təmin edilməsi baxımından tərəfdaşlarımız üçün faydalı ola bilər. Bütövlükdə cəmiyyətin süni intellekt texnologiyaları üzrə transformasiyana effektiv şəkildə nail olmaq üçün ölkə üzrə bütün səylərin birləşdirilməsi vacibdir. Burada dövlət, özəl sektor, akademik dairələr və geniş ictimaiyyət arasında faydalı iş birliyinin yaradılması mühüm əhəmiyyət kəsb edir. Bu baxımdan, hazırkı beynəlxalq konfrans da bir çox maraqlı tərəfləri bir araya gətirməklə unikal platforma rolunu oynayır", - deyə İdarə Heyətinin sədri diqqətə çatdırıb.
