Vətən yalnız coğrafi məkan deyil, soykökümüzlə, qəlbimizlə bağlı olduğumuz, əsrlərin yaddaşını daşıyan məmləkətdir. Vətən milli kimliyimiz, qürur mənbəyimizdir.
Vətəni sevmək yalnız onun gözəl təbiətinə - başıqarlı dağlarına, sıx meşələrinə, göz işlədikcə uzanan yamyaşıl çöllərinə, saf bulaqlarına, çaylarına, göllərinə, dənizinə… vurğun olmaq, tərənnüm etmək, fərəhlənmək deyil. İşinlə, əməlinlə onun adına, ünvanına layiq olmağı da bacarmaqdır. Azərbaycan xalqı da tarix boyu öz Vətənini məhz bu cür sevib. Övladları ona dar günündə arxa, dayaq olublar. Çünki şair Cabir Novruzun dediyi kimi:
Vətəni sevmək azdır,
Onu qorumaq gərək.
Vətən uca Yaradanın bizə bəxş etdiyi elə şirin bir nemətdir ki, onun bir qarış torpağı üçün yolunda candan keçməyə dəyər. Şairin bu misraları ulularımızın bizə çağırışı kimi səslənir:
Bilir ərlər, ərənlər,
Vətənə tay olmayır,
Ömürdən pay verərlər,
Vətəndən pay olmayır
Məmləkətimiz nə zaman dara düşübsə, işğalçıların hücumlarına məruz qalıbsa, yurd sevgisi, təəssübkeşliyi vətənsevər övladlarının ən böyük gücü, ən qüdrətli silahı olub. Azərbaycanın qəhrəman övladları əsrlər boyu yadellilərin basqınlarından, savaşlarından bu sevgi sayəsində alnıaçıq, üzüağ çıxıblar. Yenilsələr də, düşmənə boyun əyməyiblər. Vətəni qorumaq, azad və abad görmək arzusundan, amalından əl çəkməyiblər. Əsrlər dəyişdikcə hər nəsil öz payına düşən çətinliklərə sinə gərərək bu torpağı qorumaq, onu gələcək nəsillərə əmanət etmək kimi müqəddəs bir vəzifəni yerinə yetirib.
XX əsrin sonlarında müstəqilliyimizə aparan yol da bu sevgidən keçdi. Sovet hakimiyyətinin yetmiş il davam edən basqılarından, əsarətindən qurtulduğu vaxtda Azərbaycanın başının üstünü yenidən qara buludlar aldı. 1980-ci illərin sonları, 1990-cı illərin əvvəllərində məkrli ermənilər havadarlarının verdikləri silahları azərbaycanlılara yönəltdilər. Azğınlaşmış ermənilər Qarabağı və Şərqi Zəngəzuru azərbaycanlılara qarşı dəhşətli cinayətlər, qırğınlar, qətliamlar, soyqırımıları törədərək işğal etdilər. Azərbaycan xalqının sinəsinə dağ çəkdilər. Qarabağı və Şərqi Zəngəzuru talan etdilər, abad yurdlarını xarabalıqlara çevirdilər. Bir milyon azərbaycanlı evindən, elindən baş götürüb qaçmaq məcburiyyətində qaldı.
Qarabağın və Şərqi Zəngəzurun işğal müddəti uzun çəkdi. Otuz ilə yaxın erməni quldurları həmin yerlərdə at oynatdılar. Azərbaycanlılar isə dədə-baba yurdlarına həsrət qaldılar. Neçə-neçə azərbaycanlı bu nisgillə dünyadan köçdü.
Ancaq hər bir azərbaycanlının qəlbində işığı sönməyən bir ümid vardı. Hər kəs o yerlərin düşmən işğalında əbədi qalmayacağına inanırdı.
Zaman keçir. Yaşları Qarabağın və Şərqi Zəngəzurun işğalından kiçik olan Azərbaycan övladları böyüyürdü. Və onlar da heç zaman ayaq basmadıqları Qarabağı və Şərqi Zəngəzuru yolunda canlarını qurban verəcək qədər sevirdilər. Çünki o yerlər doğma məmləkətin bir parçası, vətən torpaqlarıdır.
2020-ci il sentyabrın 27-də Ermənistan silahlı qüvvələrinin təxribatı nəticəsində müharibə başladı. Prezident, Silahlı Qüvvələrin Ali Baş Komandanı İlham Əliyevin qismən səfərbərlik elan etməsini Azərbaycan xalqı böyük ruh yüksəkliyi ilə qarşıladı. Səfərbərlik çağırışına cavab olaraq ölkəmizin bütün bölgələrindən minlərlə vətəndaş hərbi komissarlıqlara üz tutdu. Bu, xalqımızın Vətən sevgisinin, dövlətinə və Ali Baş Komandanına olan sarsılmaz inamının bariz nümunəsi idi.
Hamını bir amal birləşdirirdi - işğal altında qalmış torpaqlarımızı azad görmək. Vətən müharibəsində bütün Azərbaycan Xalq şairi Məmməd Arazın illər əvvəl yazdığı bu misralardakı kimi milli ruha, Vətən eşqinə kökləndilər:
Bu gün gərək
Hər anımız Vətən! - desin.
Qılıncımız, qalxanımız
Vətən! - desin
Təxminimiz, gümanımız,
Vətən! - desin!
Ölənlərin əvəzinə
Qalanımız - Vətən! - desin.
Cəbhədə döyüşən əsgər və zabitlərimizin şücaəti, cəsurluğu sayəsində 44 gün davam edən Vətən müharibəsinin hər günü tariximizin bir qəhrəmanlıq səhifəsinə çevrildi. Azərbaycan Ordusu Qarabağda və Şərqi Zəngəzurda düşmənə ağır zərbələr endirdi. Prezident, Ali Baş Komandan İlham Əliyevin rəhbərliyi ilə Azərbaycan Ordusu tarixi ədaləti bərpa etmək, işğal altındakı torpaqlarımızı azad etmək uğrunda şərəfli missiyasını yerinə yetirdi.
Arxa cəbhədə də hər kəs döyüşən oğullara dəstək üçün səfərbər oldu. Bu sarsılmaz birlik - dövlət-xalq birliyi Azərbaycanı Zəfərə çatdırdı. Ölkəmizin qüdrətini bütün dünyaya göstərdi.
2023-cü ilin sentyabrında isə Azərbaycan Ordusu lokal xarakterli antiterror əməliyyatları nəticəsində ölkəmizin suverenliyini tam bərpa etdi. 2020-ci ildə baş verən Vətən müharibəsi və 2023-cü ildə həyata keçirilən antiterror əməliyyatları bir daha sübut etdi ki, Azərbaycanın gənc nəsli milli dəyərlərinə, torpağına və dövlətinə sadiqdir. Onların igidliyi, fədakarlığı, şücaəti sadəcə, hərbi qələbə deyil, eyni zamanda xalqımızın gələcəyinə inamın, birliyin və mübarizə ruhunun təcəssümüdür.
Zöhrə FƏRƏCOVA,
"Azərbaycan"
