Fransada hökumətin 2026-cı il büdcə layihəsinə qarşı sosial şəbəkələrdə yaranan və sürətlə yayılan “Hər Şeyi Bloklayaq” hərəkatı çərçivəsində keçirilən etiraz aksiyaları sentyabrın 10-da daha da intensivləşib. Blokadalar, yolların bağlanması və strateji infrastrukturlara müdaxilələr ölkə üzrə ciddi narahatlıq yaradıb.
AZƏRTAC xəbər verir ki, ölkə üzrə 50-dən çox bloklama əməliyyatı həyata keçirilib. Aksiyalar əsasən şəhərlərin kənar yollarında, əsas magistrallarda, həmçinin tramvay və avtobus depolarında baş verib.
Magistral avtomobil yolları, çaylar üzərindəki körpülər yandırılan barrikadalarla bağlanıb.
Fransanın daxili işlər naziri vəzifəsindən istefa vermiş Brüno Rötayo bu hadisələrlə bağlı sərt mövqe bildirib. “Bu dəqiqəyə qədər təxminən 200 nəfər saxlanılıb. Bu hadisələri qətiyyətlə pisləyirəm, bunlar qəbuledilməzdir”, - deyə o vurğulayıb.
Brüno Rötayo səhər saatlarında ölkə üzrə 80 min polis və jandarmın səfərbər olunduğunu, onlara dronlar, helikopterlər və zirehli texnikalar vasitəsilə dəstək verildiyini deyib. O qeyd edib ki, blokadaların qarşısı sürətli və çevik şəkildə alınmalıdır: “Hüquq-mühafizə orqanlarına dəqiq göstəriş verilib: müdaxilə edin, sürətli və çevik olun. Strateji infrastrukturların bloklanmasına yol verilməyəcək”.
O, bəzi siyasi qüvvələrin qiyam yaratmaq cəhdlərini də sərt tənqid edib.
Qeyd edək ki, Fransanı bürüyən etiraz aksiyasının səbəbi büdcə layihəsi, bayramların ləğvi və sosial kəsintilərdir. “Hər Şeyi Bloklayaq” hərəkatı 2025-ci ilin yayında sosial şəbəkələrdə formalaşaraq genişlənib. Etirazçılar, istefa vermiş Baş nazir Fransua Bayru hökumətinin planlaşdırdığı 2026-cı il büdcəsini hədəf alırlar. Bu hərəkatın hər hansı bir siyasi partiya və ya həmkarlar ittifaqı ilə əlaqəsi yoxdur. Təşkilatçılar iştirakçıları vətəndaş itaətsizliyi və simvolik məkanlara nəzarətin ələ alınması ilə etirazları davam etdirməyə çağırırlar.
Sentyabrın 18-də isə ölkədə kütləvi etiraz aksiyalarının keçirilməsi və müxtəlif müəssisələrdə tətil elan olunması nəzərdə tutulub.
