“Formula 2”nin təsnifat mərhələsi trasda aparılan işlər səbəbindən müəyyən gecikmə ilə başlayıb. Ardınca isə bütün bolidlər eyni vaxtda bokslardan çıxıb ki, bu da hər zamankı kimi sıxlığa gətirib çıxarıb.
AZƏRTAC xəbər verir ki, ilk olaraq protokola Cek Krouford başçılıq edib, amma Qabriele Mini və Roman Stanek dərhal onu üstələyib. Lakin Amori Kordilin 13-cü döngədə ağır qəzası səbəbindən sessiya demək olar dərhal qırmızı bayraqlarla dayandırılıb.
Yarış dayandırılmadan əvvəl Aleks Dann sürətli dövrəsini tamamlamağa macal tapdı və 1:55.846 nəticə ilə liderliyə yüksəldi. Təbii ki, bu, hələ başlanğıc idi. Məsələn, ötən il Riçard Fersxor Bakıda təsnifatı 1:54.857-lik nəticə ilə qazanmışdı.
Yarış bərpa olunandan sonra ilk cəhddə Krouford fərqləndi, belə ki, “DAMS” komandasının amerikalı pilotu Fersxorun ötənilki göstəricisini 0.066 saniyə qabaqlayaraq 1:54.791 nəticə göstərdi. Bu vaxt nə Dann, nə də gənclər seriyasının lideri Leonardo Fornaroli səhvlərinə görə nəticələrini yaxşılaşdıra bilmədilər.
Bununla belə, italiyalı pilot növbəti cəhddə səhvini düzəltdi və Krouforddan cəmi 0.019 saniyə geri qalaraq ikinci yeri tutdu.
Daha sonra bütün pilotlar yeni şinlər üçün pit-leynə qayıtdılar və sessiyanın bitməsinə 10 dəqiqədən az qalmış trasa çıxdılar. Vaxt az olduğundan “Invicta” komandası Fornaroliyə tıxacdan minimal itki ilə çıxmağı və asta bolidlərlə çıxış dövrəsindən keçməyi məsləhət gördü.
Amma nəticələri yaxşılaşdırmaq ümidləri boşa çıxdı. Əvvəlcə Viktor Marten ağır qəza törətdi, belə ki, 3-cü döngədə bolidinə nəzarəti itirdi və böyük sürətlə maneələrə çırpıldı. Zərbə o qədər güclü idi ki, maşının sağ ön asqısı tamamilə dağıldı, hətta “Dallara”nın ön hissəsi alovlandı və marşallar yanğını söndürmək üçün dərhal işə qarışmalı oldular. Görünür, təcrübəsinə baxmayaraq, Marten bu mövsüm ard-arda uğursuzluqlarla üzləşir. Yoxsa problemlərinin kökü başqa yerdədirmi?
Sessiyanın bitməsinə dörd dəqiqədən az qalmış hələ bir cəhd etmək mümkün idi. Amma Bakı marşalları trasın baryerlərini bərpa edib pilotlara son şans verdikdən sonra sessiya yenidən qırmızı bayraqlarla dayandırıldı. Bu dəfə səbəb Stanek və “Van Amersfoort Racing” komandasının britaniyalı pilotu Con Bennettin iştirak etdiyi insident oldu.
Stanek birinci döngəyə düzgün daxil ola bilmədi və çıxış zonasına düşdü. Ancaq təhlükəsizliyə əmin olmadan dərhal trasa qayıtmağa çalışdı. Elə həmin an yüksək sürətlə oradan keçən Bennett onunla toqquşdu. Karbon qalıqları hər yana səpələndi, hər iki bolid baryerə çırpıldı və yarış rəhbərliyi sessiyanı dərhal dayandırdı, bərpa etməyin isə artıq mənası yox idi.
Beləliklə, bazar günü keçiriləcək əsas yarışda pouldan Cek Krouford start götürəcək. Bu, onun ən yaxşı təsnifat nəticəsinin təkrarıdır. İlk dəfə ən yaxşı vaxtı isə apreldə cümə günü Ciddədə baş tutan yarışdan əvvəl göstərmişdi. Qeyd edək ki, Səudiyyə Ərəbistanının şəhər trası uzun düz yolları ilə müəyyən mənada Bakı trekini xatırladır.
Bazar günü birinci sıradan Leonardo Fornaroli start götürəcək. İkinci sırada isə Qabriele Mini və bu günün əsas uğursuz pilotlarından biri olan Viktor Marten yer alacaq. Ümid edək ki, onun bolidi ciddi zədə almayıb və “ART” mexanikləri sabahkı sprintə qədər onu bərpa edə biləcəklər.
Şənbə günü keçiriləcək qısaməsafəli sprint yarışında isə nəzəri baxımdan Sebastyan Montoya pouldan start götürməlidir, təbii ki, əgər bugünkü təsnifat nəticələri mümkün cərimələr səbəbindən dəyişdirilməsə. Hazırda o, protokolda 10-cu pillədə qərarlaşıb.
Bundan başqa, “Trident” komandasının iki debütantından biri olan Martinius Stenshorn 8-ci yeri tutaraq kifayət qədər yaxşı nəticə göstərib. Onun niderlandlı komanda yoldaşı Lorens van Hupen isə yalnız 20-ci olub.
