Rusiya və Azərbaycan prezidentlərinin görüşünün yekunlarına dair ekspertlər tərəflərin strateji tərəfdaşlığı daha da gücləndirməyə hazır olduqlarını qeyd ediblər.
AZƏRTAC xəbər verir ki, Rusiyanın Avropa-Asiya Araşdırmalar Mərkəzinin direktoru Andrey Rusakov 2022-ci il sazişində təsbit olunmuş əməkdaşlıq ruhunun tam qorunduğunu və daha yenidən inkişaf etdirildiyini qeyd edib.
Onun fikrincə, dövlətlər arasındakı münasibətlərdə yaranan problemlər və çətinliklər təbiidir: “Hər bir ölkənin öz milli maraqları var və bu, tamamilə normaldır. Əsas odur ki, bu məsələlər açıq şəkildə, bağlı qapılar arxasında deyil, iki lider arasında səmimi dialoq çərçivəsində müzakirə olunur. Bu kontekstdə prezidentlər bütün mövzuları müzakirə edə bildilər və bütün məsələlərə aydınlıq gətirdilər”.
A.Rusakovun sözlərinə görə, həm Rusiya, həm də Azərbaycan strateji tərəfdaşlıq ruhunu qoruyub saxlamağa və gücləndirməyə hazır olduğunu nümayiş etdirir: “Əminliklə demək olar ki, həm Moskva, həm də Bakı bütün sahələrdə, o cümlədən MDB və ŞƏT kimi inteqrasiya birlikləri çərçivəsində, eləcə də ikitərəfli səviyyədə qarşılıqlı ticarəti və əməkdaşlığı inkişaf etdirməyə hazırdır”.
O əlavə edib ki, mürəkkəb məsələlərlə yanaşı, iki ölkəni birləşdirən bir çox istiqamətlər də var: “Bu, ilk növbədə, ticarət-iqtisadi, humanitar sahələrdə əməkdaşlıqdır. Xəzər dənizinin ekologiyasının qorunub saxlanılması, ondan iqtisadi məqsədlər üçün səmərəli istifadə olunması istiqamətində birgə iş xüsusi əhəmiyyət kəsb edir. Bu barədə həm Azərbaycan, həm də Rusiya prezidentləri dəfələrlə deyiblər”.
“Biz ekspertlər kimi bu görüşü böyük maraqla gözləyirdik və açığını desəm, onun nəticələri təsir bağışlayandır. Onlar nümayiş etdirirlər ki, dövlətlərimiz imzaladıqları sazişlərə sadiq qalır, strateji tərəfdaşlıq ruhuna sadiqdir və yaranan çətinliklərin öhdəsindən birlikdə gəlməyə hazırdır. Bunun üçün bizim bütün imkanlarımız və mexanizmlərimiz var. Rusiya və Azərbaycan bundan sonra da qarşılıqlı əməkdaşlıq və etimad ruhunda irəliyə hərəkət edəcəklər”, - deyə ekspert sözlərini yekunlaşdırıb.
