Qarabağ və Şərqi Zəngəzurun zəngin turizm potensialı bölgənin Azərbaycanın əsas turizm zonalarından birinə çevrilməsinə imkan verir. Bərpa-quruculuq işlərinin aparılması və sakinlərin doğma yurda qayıdışı ilə paralel olaraq bu ərazilərin turizm potensialının səmərəli istifadəsi, regionun rəqabət qabiliyyətli turizm məkanına çevrilməsi üçün də tədbirlər görülür.
Dövlət Turizm Agentliyindən AZƏRTAC-ın bölgə müxbirinin sorğusuna cavab olaraq bildirilib ki, işğaldan azad edilmiş əraziləri daxili turizm üçün əlçatan və keyfiyyətli destinasiyaya çevirmək, perspektiv imkanlardan səmərəli istifadəyə nail olmaq əsas strateji baxış kimi müəyyənləşdirilib.
“Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”nın məqsədlərindən biri kimi, “Turizm sektorunun perspektiv inkişaf imkanlarından effektiv istifadəyə nail olmaq” müəyyən edilib. Bu baxımdan Qarabağ və Şərqi Zəngəzurda strateji çərçivənin müəyyənləşdirilməsi, institusional inkişaf, turizm destinasiyalarının inkişafı, turistlər üçün zəruri infrastruktur layihələrinin icrası, turizm məhsullarının inkişafı, turizm və rekreasiya zonalarının formalaşdırılması, turizm əhəmiyyətli tədbirlərin keçirilməsi, marketinq və kommunikasiya tədbirlərinin həyata keçirilməsi əsas istiqamətlərdir.
Bütövlükdə, bölgənin iqtisadi rayonları üzrə turistik ərazilərin potensialı qiymətləndirilib və burada diqqətçəkən resurslar üzərində konsepsiyalar hazırlanıb, turizm və rekreasiya zonalarının yaradılması ilə bağlı təkliflər təqdim edilib. Daşaltı və Tuğ kəndlərinin, Hadrut və Suqovuşan qəsəbələrinin, Şuşa şəhərinin turizm inkişaf konsepsiyaları hazırlanıb, azad edilmiş ərazilərin mədəni irsi araşdırılaraq mədəni turizmyönümlü inkişafı qiymətləndirilib.
Turizm infrastrukturunun yaradılması istiqamətində görülən işlər çərçivəsində 2023-cü ilin oktyabrında Suqovuşan qəsəbəsində su anbarının ətrafında yaradılan parkda əhalinin asudə vaxtının səmərəli təşkili üçün sahilboyu gəzinti cığırları salınıb, oturacaqlar, söhbətgahlar, uşaqlar üçün əyləncə meydançası, idman qurğuları quraşdırılıb. Ərazisi 7,5 hektar olan parkda, həmçinin turist informasiya mərkəzi, kafe, üzən estakada, nəqliyyat vasitələri üçün avtodayanacaq yaradılıb.
Həmçinin Füzuli rayonundan başlayaraq “Zəfər yolu” turizm marşrutu üzrə səfər proqramı hazırlanıb.
Dövlət Turizm Agentliyinin tabeliyində “Tuğ” Dövlət Tarix-Memarlıq və Təbiət Qoruğunun yaradılmasını, Qarabağ Regional Turizm İdarəsinin formalaşdırılmasını institusional çərçivədə bölgənin turizm imkanlarının səmərəli istifadəsi üzrə əhəmiyyətli tədbirlərdən hesab etmək olar.
Ölkəmizin təmsil olunduğu bütün beynəlxalq tədbirlərdə, onlayn platformalarda Qarabağın turizm potensialı geniş şəkildə marketinq və kommunikasiya tədbirləri keçirilir, beynəlxalq ictimaiyyətə tanıdılır.
“2022-ci ilə Şuşada keçirilən I Beynəlxalq Kulinariya festivalı, 2023-cü ildə Ağdamda “İşğaldan azad olunmuş ərazilərdə turizmin bərpası və inkişafı” mövzusunda I elmi-praktiki konfrans, “Türk dünyasının mədəni turizm perspektivləri” mövzusunda beynəlxalq elmi konfrans, Şuşa şəhərində təşkil olunan beynəlxalq qastronomiya günü, həmçinin “Azərbaycan sağlamlıq turizmi konfransı: inkişaf imkanları” mövzusunda beynəlxalq konfrans kimi tədbirlər də Qarabağın turizm potensialının tanıdılması işinə dəstək olub. Bu kimi tədbirlər həm də bölgənin gələcəkdə işgüzar turizm imkanlarını tanıdılması işinə töhfədir”, - deyə Agentlikdən bildirilib.
jpg_1767944415.jpg)
