Vətənin azadlığı uğrunda gedən döyüşlərdə son nəfəsinədək vuruşaraq canından keçmiş şəhidlər heç vaxt unudulmur, həmişə hörmətlə anılır, ehtiramla xatırlanır. Çünki onlar adlarını qanları ilə qəhrəmanlıq tariximizin səhifələrinə yazıblar. Bu cəsur oğullar igidlikləri ilə xalqımızın qəlbində əbədi olaraq yaşayacaqlar.
Xalqımızın, vətənimizin parlaq gələcəyi, torpaqlarımızın erməni işğalından azad olunması naminə həmişə borclu olacağımız vətənpərvər, cəsur oğullarımızdan biri də həmişə adı qürurla, iftixarla çəkilən gənc zabit, 24 yaşında şəhidlik zirvəsinə ucalmış Mirzağa Məmmədbağır oğlu Əliyevdir.
İki əsgərini xilas etdi, özü şəhid oldu
Doğmalarının, yaxınlarının igidliyi və qəhrəmanlığı ilə öyündüyü leytenant Mirzağa Əliyev qısa, amma şərəf dolu bir ömür yaşayıb. O, 1996-cı il iyunun 15-də Neftçala rayonunun Xıllı qəsəbəsində dünyaya göz açıb. 2002-2011-ci illərdə qəsəbədəki Rafiq Gözəlov adına 1 nömrəli tam orta məktəbdə oxuyub. Hələ kiçik yaşlarından hərbçi olmaq arzusu ilə yaşayan Mirzağa doqquzuncu sinfi bitirdikdən sonra valideynlərinin xeyir-duası ilə 2011-ci ildə Cəmşid Naxçıvanski adına Hərbi Liseyə üz tutub. Hazırlığı yüksək olduğuna görə ilk addımı uğurlu alınıb, arzusuna qovuşub. Liseyi uğurla başa vurduqdan sonra isə hərbi ali təhsil almaq istəyi ilə 2014-cü ildə Heydər Əliyev adına Azərbaycan Ali Hərbi Məktəbinə (indiki Heydər Əliyev adına Hərbi İnstitut) qəbul olub. Dörd il ərzində bu ali təhsil ocağında hərbçi peşəsinin sirlərinə dərindən yiyələnib. 2018-ci ildə hərbi təhsilini yüksək göstəricilərlə başa vuraraq "leytenant" hərbi rütbəsi alıb. Elə həmin il də "N" hərbi hissəsində taqım komandiri kimi xidmətə başlayıb. Gənc zabit üzərinə düşən tapşırıqların öhdəsindən bacarıqla gəlib.
27 sentyabr 2020-ci ildə erməni işğalçılarının təxribatı nəticəsində İkinci Qarabağ müharibəsi başlayanda leytenant Mirzağa Əliyevin də komandiri olduğu taqım döyüşlərə atılıb. Onlar Füzuli və Cəbrayıl rayonlarının işğaldan azad olunması uğrunda gedən döyüşlərdə iştirak ediblər. Torpaqlarımızın hər qarışı uğrunda cəsarətlə vuruşublar. Müharibənin onuncu günü - oktyabrın 7-də Füzuli rayonunun Şükürbəyli istiqamətində gərgin keçən əməliyyatdan geri qayıdarkən düşmən onların döyüş maşınını vurub. Özü də ağır yaralanan taqım komandiri leytenant Mirzağa Əliyev iki əsgəri yanan maşından çıxardıb, amma özü şəhid olub. Onun ölümü zabit yoldaşlarını, əsgərlərini dərindən sarsıdıb. Ürəyi arzu və istəklərlə dolu olan Mirzağa Əliyev döyüşçü yoldaşlarının, yaxınlarının və ictimaiyyət nümayəndələrinin iştirakı ilə doğulub boya-başa çatdığı Xıllı qəsəbəsində torpağa tapşırılıb.
Ucalıq zirvəsindən enməyən oğul
Gənc zabitin qəhrəmanlığı layiqincə qiymətləndirilib. Yurdumuzun azadlığı uğrunda gedən döyüşlər zamanı göstərdiyi igidliyə, qəhrəmanlığa görə leytenant Mirzağa Məmmədbağır oğlu Əliyev Azərbaycan Respublikasının Prezidenti İlham Əliyevin müvafiq sərəncamları ilə ölümündən sonra "Azərbaycan Bayrağı" ordeni, "Vətən uğrunda", "Cəbrayılın azad olunmasına görə", "Füzulinin azad olunmasına görə" medalları ilə təltif edilib.
Bu günlərdə şəhidin ailə üzvləri ilə görüşüb söhbət etdik. Cəsur zabitlə bağlı acılı-şirinli xatirələr dilə gəldi. Atası Məmmədbağır kişi kədərli notlara köklənsə də, Mirzağa haqqında qürurla, iftixarla danışdı:
- Xalqımız vətənini, torpağını canından da çox sevir. Tarixin bütün dövrlərində bir-birindən cəsur olan oğulların vətənpərvərliyi, mərdliyi, igidliyi gələcək nəsillərə nümunə olub. İnsanlara qürur və iftixar hissləri aşılayan tarixi ənənə indi də davam etməkdədir. Boyunu sevə-sevə böyütdüyüm oğlum da gələcək nəsillərə nümunə göstəriləcək belə cəsur oğullardan biri oldu. Torpaqlarımızın azadlığı uğrunda döyüşlər başlayan kimi erməni işğalçıları ilə vuruşmaq, yurdumuzu azad etmək üçün cəbhəyə yollandı. On gün erməni qəsbkarları ilə vuruşdu. Neçə-neçə yaşayış məntəqəsinin azad olunması uğrunda gedən döyüşlərdə iştirak etdi. Qəhrəmanlığı, igidliyi ilə ad çıxartdı. Bir payız günündə müdafiəsinə qalxdığı torpaq uğrunda şəhid oldu. Ondan təsəlli tapıram ki, Mirzağa bu gün yalnız mənim deyil, Azərbaycan xalqının övladıdır. Bir evin oğlundan bir elin oğluna çevrilib. Belə bir vətənpərvər övlad böyütdüyümə görə fəxr edirəm. Oğlum cəsarəti, qəhrəmanlığı ilə başımızı uca etdi. Mirzağa bu ucalıq zirvəsindən heç vaxt enməyəcək.
Səsində bir qucaq sevinc olan igid
Şəhidin atası Məmmədbağır Əliyev İkinci Qarabağ müharibəsinin davam etdiyi günləri xatırlayaraq dedi ki, Mirzağa ilə telefonla danışarkən o böyük ruh yüksəkliyi ilə, sevinə-sevinə döyüşlərin uğurla getdiyini, tezliklə ordumuzun düşmən işğalında olan Qarabağı, eləcə də onun ətrafındakı bütün əraziləri azad edəcəyini bildirirdi: "Bu xəbərlərə o qədər sevinirdim ki! Çox şükürlər olsun ki, oğlumun dediklərinin hamısı gerçəkləşdi. Qarabağ da, onun ətrafındakı rayonlar da erməni qəsbkarlarının tapdağından azad olundu. Bir şeyə çox təəssüfləndim ki, Mirzağa o xoşbəxt günü görmədi. Amma təskinliyi onda tapıram ki, oğlumun ruhu şaddır".
Şəhid övladından yadigar qalmış əşyalara sığal-tumar çəkən, şəkillərini əzizləyib oxşayan Səadət ana oğlu haqqında kövrək səslə danışaraq dedi ki, hələ kiçik yaşlarından övladlarına Vətənin, torpağın müqəddəs olduğunu deyiblər. Onları vətənpərvər igid kimi böyütməyə çalışıblar. Qarabağın ermənilər tərəfindən işğal olunması, insanların amansız işgəncələrə məruz qalması, yurdlarından didərgin salınması onun düşmənə qarşı qisas hissini artırırdı: "Bu onu hərb sənətinə çəkirdi. Ordu sıralarında xidmətini başa vurub geri dönmüş yaxınlarımızın söhbətlərinə qulaq asmaqdan doymurdı. Mirzağa çox inadkar, sözünün üstündə dayanan gənc idi. Məqsədinə çatmaq üçün əziyyətə qatlaşmaqdan belə çəkinməzdi. Özü böyüdükcə ürəyindəki arzuları da böyüyürdü. Arzularına çatmaq üçün hərbi məktəblərə üz tutdu, oxuyub zabit oldu. Onun təhsildə, həyatda qazandığı uğurlar hamımızı sevindirirdi. Riyaziyyatı başqa fənlərdən yaxşı bilirdi. Döyüşçü yoldaşları danışırdılar ki, onun verdiyi koordinatların heç biri hədəfdən yayınmazmış. Xatırlayıram ki, müharibə başlamazdan bir müddət əvvəl keçirilən təlimdən sonra mənə zəng eləmişdi. Aman Allah, onun səsində bol-bol sevinc var idi. Oğlum qürur və iftixar dolu səslə "Ana, bəyəndilər, atışım tam dəqiq oldu" dedi".
Mirzağa heç vaxt unudulmayacaq, həmişə xatırlanacaq
Bir az kövrələn şəhid anası daha sonra söhbətinə davam edərək dedi ki, ali hərbi təhsilini başa vuranda Mirzağanın buraxılış mərasimində iştirak ediblər. Həmin gün onun xəyalları reallığa çevrilmişdi.
Qardaşı Elçin Əliyev gözlərini Mirzağanın divardan asılmış şəklinə dikib fikrə gedir. Bu anlarda Elçinin gözlərinin dərinliyində qardaş itkisinin ağrı-acısını görməmək mümkün deyildi. Bu kədərli baxışlardan həm də bir məğrurluq və iftixar oxunurdu. Bu yerdə baxışlarımın ona dikildiyini hiss edən Elçin deyir ki, qardaş itirmək ağır dərddir, dözülməz ağrıdır. Yeganə təsəllimiz ondadır ki, Mirzağa torpaqlarımızın azadlığı uğrunda gedən döyüşlərdə şəhid olub. Erməni qəsbkarları üzərində qazanılan Zəfərdə o da iştirak edib, qan töküb. Canını Vətən uğrunda qurban verib.
Çox gözəl deyiblər ki, müqəddəs amallar uğrunda şəhid olanlar heç vaxt unudulmurlar. Mirzağa da, onun qəhrəmanlığı da heç vaxt unudulmayacaq, həmişə anılacaq, həmişə xatırlanacaq. Yaxınları, doğmaları şəhid Mirzağa Əliyevin qəhrəmanlığı ilə daim fəxr edir, adı ilə qürur duyurlar. Həm də deyirlər: "Cənab leytenant, sən qəlblərdə yaşayırsan".
Vahid MƏHƏRRƏMOV,
"Azərbaycan"
jpg_1767211798.jpg)
