Ağsaqqallar Şurasının dövlət başçılarına və hökumətlərə təqdim etdiyi tövsiyə qərarları Türk Dövlətləri Təşkilatı (TDT) zirvələrinin yekun bəyannamələrində və dövlət rəhbərlərinin çıxışlarında yüksək qiymətləndirilib. Bu fakt Şuranın fəaliyyətinə verilən dəyərin göstəricisi olmaqla yanaşı, gələcək işlər üçün motivasiyanı və məsuliyyəti daha da artırır.
AZƏRTAC xəbər verir ki, bu sözləri noyabrın 4-də TDT-nin Ağsaqqallar Şurasının 18-ci iclasında çıxış edən Türkiyə Ağsaqqallar Şurasının sədri Binəli Yıldırım deyib.
“Budapeşt və Qəbələ zirvələrində bu ənənə davam etdirilib, Ağsaqqallar Şurasının 17-ci iclasında qəbul edilən bəyanat dövlət başçıları tərəfindən məmnuniyyətlə qarşılanıb”, - deyə Binəli Yıldırım bildirib.
O qeyd edib ki, bəyanat bu gün keçirilən iclasda da ətraflı şəkildə müzakirə olunacaq. Onun sözlərinə görə, Ağsaqqallar Şurasının təşəbbüsü ilə həyata keçirilən ortaq türk əlifbası və ortaq türk tarixi layihələri TDT-nin ən mühüm inteqrasiya təşəbbüslərindən biridir: “Bu iki layihə ortaq mədəni irsimizin möhkəmləndirilməsi, Türk dünyasının elmi və mənəvi inteqrasiyasının dərinləşdirilməsi baxımından strateji əhəmiyyət daşıyır. Ortaq mədəni kimliyimizin gələcək nəsillərə ötürülməsi baxımından bu qərarlar tarixi xarakter daşıyır”.
Binəli Yıldırım qeyd edib ki, Bişkek zirvəsində dövlət başçıları bu prosesə tam dəstək ifadə edib və layihələrin reallaşmasını məmnuniyyətlə qarşıladıqlarını bildiriblər. O, həmçinin Qəbələ Zirvə Bəyanatında Azərbaycan Prezidenti İlham Əliyevin təşəbbüsü ilə mühüm bir qərarın qəbul edildiyini diqqətə çatdırıb:
“Prezident İlham Əliyevin təklifi ilə üzv dövlətlər və türk əməkdaşlıq təşkilatları 1926-cı ildə Bakıda keçirilmiş Türkoloji Qurultayın 100 illiyinin qeyd olunmasına dəvət olunub. Bu tədbir türk dilləri üçün ortaq latın qrafikalı əlifbanın qəbuluna doğru ilk addım kimi böyük tarixi əhəmiyyət kəsb edir”.
O vurğulayıb ki, Türk Dövlətləri Təşkilatının Ağsaqqallar Şurası Türk dünyasında elmi, mədəni və mənəvi birliyin möhkəmləndirilməsində mühüm strateji missiya daşıyır və Şuranın fəaliyyəti bu istiqamətdə ardıcıl şəkildə davam etdiriləcək.
