Baş nazirin müavini: Azərbaycan Cənubi Qafqazın ən açıq və əlverişli biznes mühitinə malik dövlətidir  

Çin Xalq Respublikasının Sədri Si Cinpinin himayəsi ilə Şanxayda 8-ci Çin Beynəlxalq İdxal Sərgisi işə başlayıb.

AZƏRTAC xəbər verir ki, xarici məhsulların və xidmətlərin Çin bazarına girişini təşviq etmək məqsədi daşıyan nüfuzlu beynəlxalq sərgidə bir neçə ölkənin hökumət rəhbəri, nazirlər, beynəlxalq və regional təşkilatların rəhbərləri, iri şirkətlərin idarəediciləri iştirak edir. Baş nazirin müavini, Azərbaycan-Çin Hökumətlərarası Ticarət-İqtisadi Əməkdaşlıq Komissiyasının həmsədri Şahin Mustafayevin rəhbərliyi ilə dövlət qurumlarının rəhbər şəxslərindən ibarət nümayəndə heyəti sərgiyə qatılıb.

Tədbirin açılış mərasimində çıxış edən Çinin Dövlət Şurasının Sədri (Baş nazir) Li Çian sərginin Çini dünya ilə birləşdirən əhəmiyyətli bir körpü olduğunu deyib. Dünyanın 150-dən çox ölkəsindən 4100-dən çox şirkətin iştirak etdiyini, bu cür rekord göstəricilərin Çinin nəhəng bazarının canlılığını və dinamizmini tam nümayiş etdirdiyini deyən Li Çian əlavə edib ki, Çin 1,4 milyardlıq böyük bir bazarın potensialını tam ortaya çıxarmaq üçün daxili tələbatı, xüsusilə istehlakı artırmaqdan ötrü daha çox səy göstərəcək.

Sərgi çərçivəsində “Dünya Açıqlıq Hesabatı 2025”in təqdimat mərasimində çıxış edən Baş nazirin müavini Şahin Mustafayev bildirib ki, ölkəmizdə Prezident İlham Əliyevin rəhbərliyi ilə həyata keçirilən siyasət açıq, rəqabətqabiliyyətli və dayanıqlı iqtisadi modelin qurulmasına yönəlib. “Azərbaycan 2030: sosial-iqtisadi inkişafa dair Milli Prioritetlər” sənədində rəqabətqabiliyyətli iqtisadiyyat, təhlükəsiz cəmiyyət, yaşıl artım, müasir idarəetmə və insan kapitalının inkişafı əsas istiqamətlər kimi müəyyən olunub.

Bildirib ki, Prezident İlham Əliyevin rəhbərliyi ilə aparılan islahatlar ölkəmizi Cənubi Qafqazın ən açıq və əlverişli biznes mühitinə malik dövlətinə çevirib. Son illərdə sahibkarlığın dəstəklənməsi və rəqabət mühitinin təkmilləşdirilməsi istiqamətində mühüm addımlar atılıb.

Rəqəmsal iqtisadiyyat və sənaye transformasiyasının Azərbaycanın əsas prioritetlərindən biri olduğunu vurğulayan Ş.Mustafayev “Sənaye 4.0 Hazırlıq Proqramı” çərçivəsində müəssisələrin modernləşdirilməsi, rəqəmsal transformasiya və startap ekosisteminin formalaşdırılması istiqamətində real nəticələr əldə olunduğunu, vergi sahəsində aparılan islahatların şəffaflığı artırdığını, kölgə iqtisadiyyatının miqyasını azaltdığını, könüllü vergi ödəmələrini stimullaşdırdığını söyləyib.

Baş nazirin müavini investisiya təşviqi və sənayeləşmə siyasəti nəticəsində minlərlə yeni iş yerinin yaradıldığını, Ələt Azad İqtisadi Zonası və sənaye parklarının ölkə iqtisadiyyatına yeni dinamika gətirdiyini diqqətə çatdırıb. O, “Yaşıl artım” siyasəti çərçivəsində 2030-cu ilə qədər bərpaolunan enerji gücünün 30 faizə çatdırılmasının hədəfləndiyini vurğulayıb, bu istiqamətdə xarici tərəfdaşlarla, o cümlədən Çin şirkətləri ilə əməkdaşlıqdan söz açıb.

Azərbaycanın beynəlxalq iqtisadi əlaqələrdə açıq və qarşılıqlı faydalı əməkdaşlığın tərəfdarı olduğunu bildirən Ş.Mustafayev ölkəmizin Şərq–Qərb və Şimal–Cənub nəqliyyat dəhlizlərinin inkişafında mühüm rol oynadığını, yaradılmış infrastrukturun Çindən Avropaya qədər uzanan ticarət əlaqələrinin etibarlı qovşağı olduğunu deyib.

“Prezident İlham Əliyev və Sədr Si Cinpin arasında formalaşmış etimad münasibətləri əməkdaşlığı yeni mərhələyə yüksəldib. Cari ilin aprelində Pekində iki ölkənin liderləri tərəfindən imzalanmış “Azərbaycan Respublikası ilə Çin Xalq Respublikası arasında hərtərəfli strateji tərəfdaşlıq əlaqələrinin qurulması haqqında Birgə Bəyanat” dövlətlərarası münasibətlərimizin strateji mahiyyətini gücləndirib”, -deyən Baş nazirin müavini əlavə edib ki, Azərbaycan Çin ilə hərtərəfli strateji tərəfdaşlığın güclənməsini prioritet hesab edir. Son illərdə həm dövlət rəsmilərinin, həm də özəl sektor nümayəndələrinin qarşılıqlı səfərlərinin və görüşlərinin sayının artması ikitərəfli əlaqələrdə dinamizmin, eləcə də müxtəlif sahələrdə əməkdaşlıq gündəliyinin zəngin olmasının göstəricisidir.

Ş.Mustafayev Azərbaycanın “Invest in Azerbaijan” platforması və ticarət evləri vasitəsilə öz məhsullarını tanıtdığını, Çin şirkətləri isə ölkəmizin sənaye və enerji layihələrində fəal iştirak etdiklərini deyib.

Baş nazirin müavini Ş.Mustafayevin rəhbərlik etdiyi nümayəndə heyəti sərginin ekspozisiya sahəsindəki Azərbaycanın vahid ölkə və kommersiya stendləri ilə tanış olub.