Cari ilin yanvar-noyabr ayları üzrə respublikada elektrik enerjisinin istehsalı 2,1 faiz azalaraq 25 milyard 932,5 milyon kilovat-saat olub.
Energetika Nazirliyindən AZƏRTAC-a bildirilib ki, 11 ay ərzində elektrik enerjisi istehsalı İES-lərdə 22 milyard 351,9 milyon kilovat-saat, SES-lərdə 2 milyard 780,9 milyon kilovat-saat, digər mənbələr üzrə isə 799,7 milyon kilovat-saat təşkil edib. Bu dövrdə külək elektrik stansiyalarında 48,6 milyon kilovat-saat, günəş elektrik stansiyalarında 540,1 milyon kilovat-saat, Bərk Məişət Tullantılarının Yandırılması Zavodunda isə 211 milyon kilovat-saat elektrik enerjisi istehsal edilib.
Yanvar-noyabr ayları ərzində yaşıl enerji mənbələri üzrə elektrik enerjisi istehsalı ötən ilin müvafiq dövrünə nisbətən 1 milyard 617,8 milyon kilovat-saat, yəni 80 faizdən çox artaraq 3 milyard 580,6 milyon kilovat-saat təşkil edib.
Hesabat dövründə elektrik enerjisinin istehsalı “Azərenerji” ASC üzrə 22 milyard 908,1 milyon kilovat-saat (İES-lərdə 20 314,7 milyon kilovat-saat, SES-lərdə 2 milyard 593,4 milyon kilovat-saat), Naxçıvan MR Dövlət Energetika Xidməti üzrə 454,7 milyon kilovat-saat (İES-lərdə 227,7 milyon kilovat-saat, SES-lərdə 169,5 milyon kilovat-saat, GES-də 57,5 milyon kilovat-saat), “Azərişıq” ASC üzrə külək elektrik stansiyalarında 36,8 milyon kilovat-saat, müstəqil elektrik stansiyaları üzrə isə 2 milyard 532,9 milyon kilovat-saat təşkil edib.
Bu müddətdə elektrik enerjisinin ixracı 2,2 dəfə azalaraq 1 milyard 255,3 milyon kilovat-saat, idxalı isə 1,3 dəfə azalaraq 159,8 milyon kilovat-saat olub.
Qeyd edək ki, 2024-cü ilin noyabr ayında respublika üzrə elektrik enerjisinin istehsalı ötən ilin müvafiq dövrü ilə müqayisədə 14,8 faiz azalaraq 2 milyard 89,7 milyon kilovat-saat olub. Bu dövrdə elektrik enerjisinin ixracı kəskin azalaraq 7,9 milyon kilovat-saat, idxalı isə 1,2 dəfə azalaraq 9,1 milyon kilovat-saat təşkil edib.
jpg_1734342221.jpg)
