Birliyimiz 90 milyondan çox azərbaycanlı və türkün gücüdür
"Dost çətin gündə tanınar. Yaxşı günlərdə özünü dost və qardaş kimi göstərən ölkələr bəzən biri bir az çətinliyə düşəndə kənara çəkildiyini görmüşük. Amma bundan fərqli olaraq Azərbaycan-Türkiyə dostluğu və qardaşlığı tarixin sınaqlarından çıxıb, özünü təsdiq edib. Bu, yüz illər əvvəl də belə olub. Hazırda dövlət başçılarımızın şəxsi dostluq və qardaşlıq münasibətləri üzərində belə davam etməkdədir".
Bu fikirləri "Azərbaycan" qəzetinə Milli Məclisin deputatı Azər Badamov deyib. O bildirib ki, yüz il əvvəl baş vermiş müharibədə Azərbaycan Türkiyənin yanında olub, Türkiyə də 107 il əvvəl ölkəmizə qardaşlıq dəstəyini göstərib. Mustafa Kamal Atatürkün "Azərbaycanın acısı acımız, sevinci sevincimizdir" müdrik kəlamı dillər əzbəri olub. Bu münasibətlərimizi yaşadığımız tarix daha da möhkəmləndirdi. İkinci dəfə müstəqilliyə qovuşmuş Azərbaycanın çətin günündə Türkiyə yenə də yanında oldu. 28 may 1992-ci ildə Azərbaycan və Türkiyənin sərhədində Araz çayı üzərində Ümummilli Lider Heydər Əliyev və Türkiyənin keçmiş baş naziri Süleyman Dəmirəlin açılış etdiyi "Ümid körpüsü" çətin dövrünü yaşayan naxıçıvanlıların ümid yerinə çevrildi. "Ümid körpüsu"nün açılışını gerçəkləşdirmək üçün Naxçıvana gələn Süleyman Dəmirəl bütün dünyanın diqqətini Türkiyə-Azərbaycan birliyinin sarsılmazlığına yönəldərək dedi: "Azərbaycan özünün ədalətli mübarizəsində tək deyil. Biz dünyanın Azərbaycan haqqında həqiqətləri bilməsi üçün özümüzdən asılı olan hər şeyi edirik və edəcəyik. Sizi əmin etmək istəyirəm ki, Türkiyə həmişə Azərbaycanla birlikdə olub və olacaq. Biz kədəri və sevinci birlikdə bölüşəcəyik".
Deputat qeyd edib ki, Ümummilli Lider Heydər Əliyevin "Bir millət, iki dövlət" kəlamı həyatda təsdiqləndi. Yenicə müstəqilliyə qovuşmuş Azərbaycanın karbohidrogen resurslarının dünya bazarlarına çıxarılmasında dostluq və qardaşlığımız yenə özünü göstərdi. Bakı-Tiblisi-Ceyhan neft və Bakı-Tiblisi-Ərzurum qaz kəmərləri Azərbaycanın müstəqilliyini möhkəmlətməklə yanaşı, Türkiyəyə də böyük gəlirlər gətirməyə başladı.
"27 sentyabr 2020-ci ildə başladığımız Vətən müharibəsində Türkiyənin ölkəmizin yanında olduğunu bəyan etməsi respublikamıza zillənən mənfur qüvvələrin müdaxiləsindən bizi qorudu. Türkiyə ölkəmizə mənəvi və siyasi dəstək verdi. Bu, haqq işimizi qısa zamanda görməyimizdə, Şuşada üçrəngli dövlət bayrağımızı dalğalandırmağımızda müəyyən rol oynadı. Qələbəmizi Bakıda qeyd edəndə sevincimizə şərik olan Türkiyə Prezidenti qələbə paradındakı çıxışında Bəxtiyar Vahabzadənin şeirini səsləndirərək Azərbaycan və Türkiyənin bir bədənin iki qolu olduğunu bəyan etdi", - deyə deputat bildirib.
A.Badamov xatırladıb ki, Qarabağda erməni separatçılarının yuvası hələ də qalmaqda davam etdiyi vaxtda Türkiyə Prezidenti Rəcəb Tayyib Ərdoğan Şuşaya səfər etdi və iki ölkə arasında müttəfiqlik haqqında tarixi Şuşa Bəyannaməsi imzalandı. Dövlət başçıları bu bəyannaməni imzalamaqla Azərbaycanla Türkiyənin hərtərəfli müttəfiq olduğunu dünyaya rəsmən bəyan etmiş oldu. Bu da Qarbağda separatçıların yuvasını darmadağın etməyimizdə bizə böyük mənəvi güc verdi.
Azərbaycanın torpaqlarını işğaldan azad etdikdən dərhal sonra yenidənqurma və bərpa işlərinə başladığını xatırladan deputat vurğulayıb ki, təbii ki, bu işlərin görülməsi üçün böyük maliyyə, güc və texniki imkanlar vacib idi: "Hətta maliyyə gücü olsa belə texniki imkanlara malik olmadan böyükhəcmli işləri görmək çox çətin idi. Türkiyə işğaldan azad olunmuş ərazilərin yenidən qurulub bərpası prosesində də yanımızda oildu. 8 ay ərzində Füzuli Beynəlxalq Hava Limanı istifadəyə verildi və bu limanın açılışında Türkiyə Prezidenti Rəcəb Tayyib Ərdoğan iştirak etdi. Sonradan Zəngilan və Laçın hava limanlarının açılışlarını da dövlət başçıları bir yerdə etdilər. Bu il 28 May Müstəqillik Günümüzdə Pakistanın Baş naziri Məhəmməd Şahbaz Şəriflə bir yerdə Laçında keçirilən tədbirlərdə iştirak edən Prezident Ərdoğan çıxışında Səməd Vurğunun "Azərbaycan" şeirini səsləndirərək "Ayrılarmı könül candan, Azərbaycan-Türkiyə" deməklə bir daha dünyaya yeni bir mesaj səsləndirdi".
Deputat qeyd etdi ki, Türkiyədə faciəvi zəlzələ baş verəndə Azərbaycan "qardaş qardaşdan soruşmadan çətin gündə yanında olmalıdır", - deyib ilk yardım göstərən ölkə oldu. Xalqımız zəlzələdən əziyyət çəkənlərə yardım göndərilməsi üçün gücünü səfərbər etdi. Hətta bir kişi öz köhnə avtomobilinə evindəki yorğan-döşəyi yükləyərək yardım göstərməyə tələsdi. Bu məsələni Kahramanmaraşda "Azərbaycan" məhəlləsinin açılışında çıxış edən Prezident Ərdoğan bir daha dilə gətirdi. Zəlzələ dönəmində Prezident İlham Əliyevin tapşırığı ilə Fövqəladə Hallar Nazirliyi Türkiyəyə yardım edilməsi üçün dərhal hərəkətə keçdi. Fövqəladə Hallar Nazirliyinin əməkdaşları dağıntıların altından 53 nəfəri sağ çıxartdı, həkimlərimiz səhra hospitallarında 3200 insana tibbi yardım göstərdi. Azərbaycan bu faciəni öz acısı kimi qəbul edərək xilasetmə və bərpa işlərində yaxından iştirak etdi.
A.Badamov bildirib ki, Azərbaycan qarşısında işğaldan azad olunmuş ərazilərin yenidən qurulması və bərpası, keçmiş məcburi köçkünlərin öz doğma yurdlarına qaytarılması kimi vacib bir vəzifə dayanmasına baxmayaraq, Türkiyədə zəlzələ nəticəsində dağılmış Kahramanmaraş şəhərinin yenidən qurulmasında da yaxından iştirak etməyi özünə borc bildi. "İyunun 19-da Prezident İlham Əliyev və Rəcəb Tayyib Ərdoğan zəlzələ nəticəsində dağılmış şəhərlərin açılışı mərasimində iştirak etdilər. O cümlədən "Azərbaycan" məhəlləsində tikilmiş mənzillərin açarları da sakinlərə təqdim olundu. Azərbaycan qısa zaman kəsiyində Kahramanmaraşda 1200-dən çox türkiyəli bacı-qardaşlarımızın yaşaması üçün müasir binalardan ibarət məhəllə saldı. Bu məhəllədə bütün sosial infrastruktur yaradıldı ki, bu da zəlzələdən əziyyət çəkmiş insanların firavan yaşamaları üçün qardaş yardımımız oldu", - deyə deputat əlavə edib.
Onun sözlərinə görə, 19 iyun Azərbaycan-Türkiyə qardaşlığının yeni bir səhifəsidir: "Biz bir daha dünyaya sübut etdik ki, "Bir millət, iki dövlət" olaraq kədərli və sevincli günlərdə bir yerdəyik. Gücümüz 90 milyondan çox azərbaycanlı və türkün gücüdür. Gücümüz Türkiyənin və Azərbaycanın siyasi, iqtisadi və hərbi gücüdür. Biz bir yumruq olaraq gələcəkdə də haqqı müdafiə etməyə, regionda sabitlik və əməkdaşlığın yaradılmasına və daha çox məsələləri həll etməyə qadirik. Dövlət başçılarının davam etdirdiyi bu yol gələcək nəsillər üçün bir örnəkdir".
Əsmər QARDAŞXANOVA,
"Azərbaycan"
