"Rusiya sülhməramlı qüvvələrinin Azərbaycandan çıxarılması iki ölkə arasında normal münasibətlərdən xəbər verir. 2020-ci ilin noyabrında sülhməramlıların ölkəmizin ərazisində yerləşdirilməsi zərurətdən doğurdusa, bu gün onların Azərbaycan torpaqlarında qalmasına heç bir lüzum yoxdur. Sülhməramlıların çıxarılması həmçinin Rusiya və Azərbaycan prezidentləri arasında yüksək etimadın göstəricisidir".
Bu fikirləri qəzetimizə açıqlamasında Milli Məclisin deputatı Musa Qasımlı deyib. Deputat bildirib ki, Azərbaycan xalqı tarixinin ən şərəfli və qürurverici dövrünü yaşayır: "Orta əsrlərdən bəri millətimizə və regionumuza qarşı yürüdülən siyasəti, təxminən 300 il əvvəl qurulan planları darmadağın edən Prezident İlham Əliyevin rəhbərliyi altında xalqımızın və dövlətimizin həyatında yeni mərhələ başlayıb. Dünya hər zaman Prezident İlham Əliyevin qətiyyətliliyinin və prinsipiallığının şahidi olub. Torpaqlarımız işğaldan azad edilib, ərazi bütövlüyümüz və suverenliyimiz tam bərpa olunub. Nəzərə almaq lazımdır ki, bu vaxta qədər dövlət müstəqilliyimiz bərpa edilsə də, Azərbaycan heç bir zaman dövlət sərhədlərinə nəzarəti həyata keçirə bilməmişdi. 2023-cü il aprelin 23-də bütün dövlət sərhədlərimiz üzərində nəzarətin qurulması tariximizdə bir ilk idi".
Deputat əlavə edib ki, ötən il həyata keçirilən lokal xarakterli antiterror tədbirləri nəticəsində separatçı rejim diz çökdü, ağ bayraq qaldırdı. Bu, Prezidentin hər şeyi dəqiq ölçüb-biçdiyini, əvvəlcədən planlaşdırdığını və dəqiqliklə həyata keçirdiyini göstərdi. Azərbaycan ərazisində separatçılığın kökü tamamilə kəsildi. Bu, Prezident İlham Əliyevin millət və dövlət qarşısında tarixi xidmətidir. 
Musa Qasımlı bildirib ki, sülhməramlıların ölkəmizdən çıxarılması da Azərbaycan Prezidentinin xüsusi bacarığının nəticəsidir: "Unutmaq olmaz ki, 10 noyabr üçtərəfli Bəyanatında sülhməramlıların 2025-ci ilə qədər müvəqqəti olaraq yerləşdirilməsi məhz Prezident İlham Əliyevin israrı hesabına yer almışdı. Sülhməramlıların Azərbaycandan getməsi, həm də vaxtından əvvəl tərk etməsi də qarşılıqlı etibar və etimadı göstərir. Elə bunu da dövlətimizin mehriban qonşuluq siyasətinin nəticəsi hesab etmək olar". Deputatın fikrincə, xüsusilə son 4 ilə yaxın müddətdə baş verən hadisələr Prezident İlham Əliyevin liderliyi altında dövlətimizin və millətimizin çox gözəl gələcəyinin olacağını təsdiq edir. 
 Müsahibimiz onu da vurğulayıb ki, Azərbaycan real siyasət yürüdür: "Bəzilərinin Vətən müharibəsində qazanılan qələbəyə, Xankəndidə bayrağımızın ucaldılmasına və ölkəmizin ərazisində separatizmin kökünün kəsilməsinə laqeyd yanaşmaları təəssüf doğurur. Bu, tamamilə anti-milli mövqedir. Hesab edirəm ki, millətin və dövlətin maraqlarını təmin edən, xəyallarını gerçəkləşdirən Prezident İlham Əliyevin səyləri yüksək qiymətləndirilməlidir".

N.QABİLQIZI,
"Azərbaycan"