Almaniyanın NATO və Avropa İttifaqında (Aİ) hərbi liderlik roluna ictimai dəstək ötən illə müqayisədə artıb və indiyədək görünməmiş səviyyəyə çatıb. Rusiya təhlükəsi və ABŞ-a etimadın azalması fonunda almanların əksəriyyəti təkcə Almaniya Silahlı Qüvvələrinin - Bundesverin gücləndirilməsini deyil, həm də Avropanın daha dayanıqlı olmasının vacibliyini ifadə edib.
AZƏRTAC “Spiegel” qəzetinə istinadla xəbər verir ki, bu, Bundesverin Hərbi Tarix və Sosial Elmlər Mərkəzinin əhali arasında apardığı illik sorğunun nəticələrində əksini tapıb.
Sorğunun nəticələrinə əsasən, almanların üçdə ikisi artıq Rusiyanı birbaşa təhlükə kimi görür. Bu narahatlıq bütün siyasi spektrdə, o cümlədən AfD və Sol Partiyanın tərəfdarları arasında da müşahidə edilib. Eyni zamanda, ABŞ-a etimadın kəskin şəkildə azaldığı müəyyən edilib. Belə ki, respondentlərin cəmi 37 faizi ABŞ-ı etibarlı tərəfdaş hesab etdiyini bildirib. Respondentlərin əksəriyyəti NATO-ya sadiqliyini ifadə edib.
Geosiyasi qeyri-müəyyənlik fonunda əhalinin böyük əksəriyyəti Bundesverin gücləndirilməsi siyasətini dəstəklədiyini bildirib. Respondentlərin 64 faizi müdafiə xərclərinin, 65 faizi isə şəxsi heyətin artırılmasını dəstəkləyib. Sorğuya qatılanların 80 faizdən çoxu Bundesverə müsbət yanaşma ifadə edib, 50 yaşadək kişilərin yarıdan çoxu fövqəladə vəziyyətdə ölkəni silahla müdafiə etməyə hazır olduğunu bildirib. Yeni hərbi xidmətin tətbiqi ideyası bütün yaş qruplarında geniş dəstək tapıb.
Sorğuda iştirak edənlərin əksəriyyəti vahid Avropa təhlükəsizlik və müdafiə siyasətini, Avropa silahlanma layihələrinə maliyyə dəstəyini, Aİ-nin müstəqil təhlükəsizlik və müdafiə aktoru kimi çıxış etməsini, eləcə də vahid Avropa ordusunun yaradılmasını dəstəkləyib. Almaniyanın Aİ daxilində hərbi liderlik rolu ideyasını dəstəkləyənlərin sayı əvvəlki sorğularla müqayisədə əhəmiyyətli dərəcədə artaraq 44 faizə çatıb.
Bundesverin Hərbi Tarix və Sosial Elmlər Mərkəzinin 1996-cı ildən etibarən keçirilən illik sorğusu ordu ilə cəmiyyət arasındakı münasibətləri təhlil etmək məqsədilə aparılır.
