Almaniyada peşə təhsili olmayan gənclərin sayı getdikcə artır.
AZƏRTAC “Zeit” qəzetinə istinadla xəbər verir ki, Əmək Bazarı və Peşə Araşdırmaları İnstitutunun (IAB) apardığı araşdırmanın nəticələri 20-34 yaşlı işləyən şəxslər arasında rəsmi ixtisasa sahib olmayanların sayının 2013-cü ildən etibarən 460 min nəfər artaraq 1,6 milyona çatdığını göstərir. Bu artım müəyyən dərəcədə miqrasiya ilə bağlıdır.
IAB-yə görə, rəsmi ixtisası olmayanların nisbətinin artmasının əsas səbəblərindən biri əmək bazarında əhali tərkibinin dəyişməsidir. Belə ki, gənc almanların ümumi sayı azalarkən miqrantların, xüsusilə Avropa İttifaqı (Aİ) ölkələrindən və digər sığınacaq ölkələrindən gələnlərin sayı əhəmiyyətli dərəcədə artıb. Məsələn, Aİ-yə üzv ölkələrdən gələn şəxslər arasında ixtisası olmayan gənclərin nisbəti 22 faizi keçib. Əfqanıstan və Suriya kimi ölkələrdən olan qaçqınlar arasında isə bu nisbət təxminən 45 faizdir.
Eyni zamanda, Almaniya vətəndaşı olan gənclər arasında da bu nisbət cüzi şəkildə artaraq 9,6 faizə yüksəlib. IAB-nin hesablamalarına əsasən, əgər 2013-cü ildən etibarən əhalinin strukturu dəyişməsəydi belə, ixtisassız gənclərin payı 9,9 faizdən 10,8 faizə qədər artacaqdı. Bu artımın səbəbləri arasında peşə təhsilini yarımçıq qoyma hallarının artması və gənclərin qərarvermə davranışındakı dəyişikliklər göstərilir.
IAB-yə görə, vakant iş yerlərinin 75 faizindən çoxu peşə ixtisası tələb edir. Rəsmi ixtisası olmayan şəxslər arasında işsizlik səviyyəsi 20 faizdən çoxdur. Araşdırmanın müəllifləri həll yolu kimi təhsil sisteminə daha çox diqqətin artırılmasını, eləcə də asan çıxışlı təkliflər, hədəflənmiş məsləhət xidmətləri, miqrantların daha yaxşı inteqrasiyası və digər məsələləri tövsiyə edirlər.
jpg_1765706081.jpg)
jpg_1765704801.jpg)
