Salyanlı fermerlər aqrar sığortaya təşviq olunur
Zaman keçdikcə ölkəmizdə də kənd təsərrüfatı məhsulları istehsalçılarının aqrar sığortaya maraqları artır. Bu, bir tərəfdən son dövrlər təbiətin şıltaqlığının istehsalçılara vurduğu ziyanın artması ilə bağlıdırsa, digər tərəfdən Azərbaycanda aqrar sığorta şərtlərinin sərfəli olması ilə əlaqədardır. Təbii ki, bunların üzərinə Aqrar Sığorta Fondunun fermerlər arasında apardığı təbliğat və təşviqat tədbirlərini də gəlmək lazımdır.
Belə tədbirlərdən biri də bu günlər Salyanda keçirilib. Kənd təsərrüfatı heyvanları və bitkilərinin, xüsusən tərəvəz və meyvə bağlarının sığortası, bu sahədəki yeniliklər və fermerləri maraqlandıran məsələlər Aqrar Sığota Fondu və Salyan Rayon İcra Hakimiyyətinin təşkilatçılığı ilə keçirilən "Dayanıqlı fermer təsərrüfatı üçün aqrar sığorta" tədbirində müzakirə edilib.
Tədbiri giriş sözü ilə açan Salyan RİH-nin başçısı Sevindik Hətəmov rayonda kənd təsərrüfatının, o cümlədən əkinçiliyin və heyvandarlığın inkişafı üçün böyük imkanlar olduğunu bildirib. Qeyd olunub ki, rayonda 41 min hektardan artıq əkin sahəsinin 14 min hektarı taxıl, 10 min hektarı pambıq, təqribən 14 min hektarı yonca əkinlərinin payına düşür. Bunlardan başqa, Salyanda geniş meyvə bağları, tərəvəz, bostan bitkiləri, çəltik və şəkər çuğunduru da becərilir.
S.Hətəmov onu da nəzərə çatdırıb ki, rayondakı əkinlərin yalnız 5 min hektarı sığortalanıb və bu, qənaətbəxş sayıla bilməz. O, fermerləri dövlət tərəfindən yaradılan bu imkandan istifadə etməyə və təsərrüfatlarını sığortalamağa çağırıb.
Tədbirdə çıxış edən Aqrar Sığorta Fondu İdarə Heyətinin sədri Fuad Sadıqov ölkəmizdə dövlət tərəfindən yaradılan aqrar sığorta mexanizmi, onun iş prinsipi, fermerlər üçün əhəmiyyəti barədə məlumat verib. Bildirib ki, aqrar sığorta haqqına 50 faizlik dövlət dəstəyi sayəsində fermerlər cüzi məbləğ ödəməklə əkin sahələrini sığorta edə bilərlər. "Aqrar sığorta mexanizmi əkin sahələrini təbiət hadisələri, dolu, qasırğa, fırtına, leysan yağışları, sel-subasma, yanğın, vəhşi heyvanların hücumu, 3-cü şəxslərin hərəkətlərindən sığortalayır", - deyən F.Sadıqov məlumat verib ki, Şirvan-Salyan iqtisadi rayonunda indiyədək əkin sahələrinə dəymiş zərərlə bağlı ümumilikdə 686 min, heyvandarlıq sığortası üzrə isə 96 min manat sığorta ödənişi edilib. Payızlıq taxıl mövsümünün yaxınlaşdığını xatırladan fond sədri fermerləri əkin sahələrini çoxsaylı risklərdən qorumağa və sığorta olunmağa çağırıb.
Tədbirdə sığorta haqları və sığorta ödənişlərinin hesablanması, ayrı-ayrı məhsullar üzrə sığorta haqları, ödəniş prosesi barədə məlumat verilib. Qeyd olunub ki, Salyanda 1000 manatlıq buğda və pambığın sığortalanması fermerə cəmi 7, 1000 manatlıq arpa məhsulunun sığortası 9, eyni məbləğdə narın sığortası 8, xurmanın sığortası 11 manata başa gəlir. Salyanda geniş yayılmış bostan bitkilərinə gəlincə, 1000 manatlıq pomidorun sığortalanması üçün 10, eyni məbləğdə qarpızın sığorotalanması üçün 11 manat lazımdır. Əlavə ödənişlə məhsulu donvurmadan və dolu yağması nəticəsində görünüşünün korlanmasına görə ucuzlaşmadan da sığortalamaq mümkündür.
Sonra fermerlərin sığortanın əhatə etdiyi risklər, sığorta ödənişi prosesi, sığorta müqaviləsinin bağlanması və qüvvəyə minməsi, heyvandarlıq sığortası və sair hallarla bağlı çoxsaylı sualları cavablandırılıb.
Fuad Sadıqov tədbir çərçivəsində həmçinin Salyanın təsərrüfatlarında olub, fermerlərlə görüşüb, onların suallarını cavablandırıb.
Seyran CAVADOV,
"Azərbaycan"
jpg_1789895854.jpg)
