Qərbin Gürcüstanda planlaşdırdığı "strateji hədəf" iflasa uğradı
Gürcüstanda son bir ildə siyasi gərginlik müşahidə olunurdu. Ölkə iki qütbə bölünmüşdü. Birində Gürcüstanın müstəqilliyini, milli maraqlarını müdafiə edən hakim "Gürcü arzusu", digərində Avropadan gələn təlimatlarla Qərbə "inteqrasiya" olmaq istəyən parçalanmış müxalifət partiyaları.
Oktyabrın 26-da keçirilən parlament seçkilərində bu iki siyasi qüvvə arasında gedən mübarizəyə nöqtə qoyuldu: hakim "Gurcü arzusu - Demokratik Gürcüstan" Partiyası qələbə qazandı. Bu partiyanın qalib gəlməsi sözsüz ki, gürcü xalqının seçimidir və hamı buna hörmətlə yanaşmalıdır. Odur ki, nəticələrə Qərbin ədalətsiz münasibəti qəbul-edilməzdir. Dünya bir il ərzində ABŞ və Qərbin Gürcüstanın daxili işlərinə qarışmasının, özünə yaxın siyasi qüvvələrin hakimiyyətə gəlməsi üçün hansı təzyiq vasitələrindən istifadə etməsinin şahidi oldu - artıq indi söz və seçim gürcü xalqınındır və onun nəticələrini hamı qəbul etməlidir.
Gürcüstanda keçirilən parlament seçkilərində hakim partiya qələbə qazandıqdan sonra Prezident İlham Əliyev Baş nazir İrakli Kobaxidzeni ilk təbrik edənlərdən oldu. Dövlətimizin başçısının imzaladığı təbrik məktubunda deyilir: "Bu səsvermə vasitəsilə Gürcüstan vətəndaşları inkişafa, sabitliyə və ənənəvi dəyərlərə öz dəstəyini ifadə etdilər. İnanıram ki, seçkilərin nəticələri Gürcüstanın hərtərəfli inkişafına və çiçəklənməsinə xidmət edəcəkdir.
Eyni zamanda seçkilərin nəticələrinin tarixən dostluq, qardaşlıq və mehriban qonşuluq şəraitində yaşamış xalqlarımızın iradəsindən qaynaqlanan Azərbaycan-Gürcüstan dövlətlərarası əlaqələrinin davamlı inkişafına, Cənubi Qafqazda və daha geniş coğrafiyada ölkələrimizin mövqelərinin daha da möhkəmlənməsinə töhfə verəcəyinə inamımı ifadə edirəm.
Siyasi dialoqumuzu davam etdirmək üçün Sizi münasib vaxtda Azərbaycana rəsmi səfərə dəvət edirəm. Əminəm ki, ölkələrimizin və xalqlarımızın firavanlığı, regionumuzun rifahı və təhlükəsizliyi naminə strateji tərəfdaşlığımızın möhkəmləndirilməsi, ikitərəfli və çoxtərəfli qaydada qarşılıqlı faydalı fəaliyyətimizin müvəffəqiyyətlə davam etdirilməsi istiqamətində bundan sonra da birgə səylər göstərəcəyik".
Prezident İlham Əliyevin təbrik məktubundan da aydın görünür ki, hakim partiyanın qələbə qazanması ölkələrimiz arasında yaranan strateji əməkdaşlığın dərinləşməsi, gələcəkdə daha böyük layihələrin icra edilməsi üçün mühüm hadisədir. Bir də unutmayaq ki, qonşu ölkədə 300 min soydaşımız yaşayır və orada sabitliyin olması bizim üçün çox önəmlidir. Yeri gəlmişkən, qeyd edək ki, Gürcüstandakı seçkilərdə hakim partiyanın qələbə qazanmasında oradakı azərbaycanlıların xüsusi rolu oldu. Gürcüstandakı soydaşlarımız bu mövqeləri ilə Azərbaycan dövlətinin və Prezidentinin regional siyasətinə, Azərbaycan-Gürcüstan münasibətlərinin möhkəmlənməsi və inkişafına yönəlmiş siyasətinə tərəf çıxmış oldular. Eyni zamanda onlar Gürcüstanda hakim partiyanı dəstəkləməklə sülhlə müharibə, ənənəvi və amoral dəyərlər arasında prinsipial seçimlərini etdilər. Soydaşlarımız həmçinin digər Gürcüstan vətəndaşları kimi Qərbin regionu parçalamaq və müharibə ocağına çevirmək siyasətinə yox dedilər. Bu, Azərbaycan və Gürcüstanın Ermənistanın regiondakı pozucu siyasətinə qarşı ortaq mövqedən çıxış etdiklərini göstərir. Gürcüstan-Azərbaycan birliyi göstərdi ki, həmrəylik olanda hər iki dövlət güclü olur, öz maraqlarını müdafiə edir və beynəlxalq səviyyədə eyni mövqedən çıxış etmək imkanı qazanırlar. O ki qaldı Ermənistana, o, gec-tez məcbur olub regiondakı digər iki dövlətin apardığı məqsədyönlü siyasi xətti qəbul etməli olacaq.
Sual oluna bilər ki, nə üçün Cənubi Qafqazın kiçik bir ölkəsi olan Gürcüstanda keçirilən seçkilər Qərb üçün bu qədər əhəmiyyətli idi. Sualın cavabını hazırda dünyada baş verən qlobal geosiyasi proseslər kontekstində axtarmaq lazımdır. Hazırda Qərbin strateji planında Cənubi Qafqaz xüsusi yer tutur. Məqsəd bölgədən təkcə Rusiyanı sıxışdırıb çıxarmaq deyil. Qərbin strateji planı daha böyük hədəflərə hesablanıb.
Amerika dünya hegemonluğunu bərpa etmək üçün Rusiya ilə yanaşı, Çini də öz təsiri altına almaq istəyir. Bunun üçün ilk növbədə "Asiya əjdahası"nın iqtisadiyyatını nəzarətə götürmək lazımdır ki, o, iqtisadi təsir dairəsini genişləndirə bilməsin. Məlumdur ki, Çinin nəhəng "Bir yol, bir kəmər" layihəsi ona Orta Asiya, Avropa, Yaxın Şərq və Şimali Afrika ilə ticarəti daha da genişləndirməyə imkan verir. Bu ticarət zəncirində isə iki mühüm ölkə var - Azərbaycan və Gürcüstan. Son dövrlər Qərbin Cənubi Qafqazın iki ölkəsinə göstərdiyi təzyiqlər məhz həm də bununla bağlıdır.
Rusiyanın Kazan şəhərində keçirilən BRICS-nin XVI sammiti Qərbin ciddi narahatlığına səbəb oldu. Artıq Qərbdə bu istiqamətdə aparılan siyasətin yanlış olduğunu anlamağa başlayıblar. Xüsusən ölkələrə dini mənsubiyyətinə görə "qiymət" vermə siyasətinin əks təsirini görürlər. Bu yaxınlarda Avropa İttifaqının prezidenti Şarl Mişelin Türkiyənin, Misir və Birləşmiş Ərəb Əmirliklərinin BRICS platformasında yer almasını özlərinin apardığı yanlış siyasətin nəticəsi olduğunu etiraf etməsi təsadüfi deyil. Çünki bu ölkələr Avropa İttifaqına daxil olan ölkələrin iri ticarət tərəfdaşlarıdır.
Qərbin Rusiya-Çin İttifaqı ilə rəqabət apardığı platformadan biri də Orta Asiya regionudur. Çin üçün Orta Asiya ölkələrinin xüsusi əhəmiyyəti var. Çünki qonşuluqda yerləşən bu ölkələr Çinin artan karbohidrogen tələbatının ödənilməsində vacib rol oynayır. Bölgə həmçinin digər faydalı qazıntılarla da zəngindir. Üstəlik, ÇXR-in dünya ticarətini genişləndirmək üçün faydalanmaq istədiyi Orta dəhlizdə həmin ölkələr əsas rol oynayır. İndi bu ölkələr Çin, Rusiya və Türkiyə ilə əməkdaşlığa üstünlük verirlər. Orta dəhlizin Avropaya çıxışı isə Gürcüstan üzərindəndir. Qərbin həmin region ölkələrinin daxili işlərinə qarışmaq, mövcud iqtidarları devirmək üçün qeyri-legitim qüvvələrlə əməkdaşlıq etməsi də bu səbəbdəndir. Elə Ermənistanın Zəngəzur dəhlizi ətrafında siyasi oyunbazlığının səbəbi də Qərbdən gələn təlimatla bağlıdır. Məqsəd açılacağı halda dəhlizə nəzarəti ələ keçirməkdir. Gürcüstanda keçirilən parlament seçkilərinin nəticələri göstərdi ki, Qərbin bu məqsədi hələlik baş tutmur. Amma onun bununla asanlıqla razılaşacağına da əmin olmaq olmaz. Çünki Qərb ikiüzlü olduğu qədər də məkrlidir. Bir də unutmayaq ki, Günəş Qərbdə batır.
Rüstəm KAMAL,
"Azərbaycan"
