ABŞ-ın “Brookings” analitik mərkəzinin məlumatına görə, Birləşmiş Ştatlarda bütün iş yerlərinin təxminən 30 faizi avtomatlaşdırma riski altındadır.
AZƏRTAC xarici mediaya istinadla bildirir ki, həmin məlumata görə, bu gün generativ süni intellektin (AI) ən böyük təsirinə məruz qalan sənayelərin əksəriyyəti cəmi bir neçə il əvvəl avtomatlaşdırma riskinin ən aşağı olduğu sahələrdir. Generativ süni intellekt bir neçə il əvvəl mütəxəssislərin kompüterlər üçün qeyri-mümkün hesab etdiyi qeyri-adi bacarıqları və interaktiv xüsusiyyətləri, o cümlədən proqramlaşdırma, proqnozlaşdırma, yazı, yaradıcılıq, ünsiyyət, təbliğ və təhlil fəaliyyətlərini əvəz edə bilir. Bu dəyişikliklər özü ilə həm imkanlar, həm də risklər gətirir. Bir tərəfdən, generativ süni intellekt milyonlarla mütəxəssisin bacarıqlarını inkişaf etdirərək onları daha məhsuldar, yaradıcı, informativ, səmərəli və ağıllı edə bilər. Digər tərəfdən, işəgötürənlər menecerlərinin işlərinin bir qismini və ya hətta hamısını avtomatlaşdırmağa qərar verə bilər ki, bu da potensial iş yerləri itkilərinə və əvvəllər axtarılan ixtisas sahiblərinə tələbin zəifləməsinə səbəb olacaq.
“OpenAI” şirkətinin məlumatları göstərir ki, generativ süni intellekt ABŞ-dakı iş yerlərinin 30 faizindən çoxuna təsir göstərərək, bu sahələrdəki peşələrin yarısını əvəz edə bilər. Artıq işçilərin 85 faizi öz vəzifələrinin azı 10 faizinin bu prosesdən təsirləndiyini hiss edir.
Əvvəllər gündəlik işlərə təsir edən avtomatlaşdırma texnologiyalarından fərqli olaraq, generativ süni intellekt çox güman ki, müxtəlif “idrak” və “qeyri-müntəzəm” tapşırıqları, xüsusən də orta və yüksək maaşlı peşələri əvəz edə bilər. STEM, maliyyə və hüquq kimi yüksəkmaaşlı sektorlar ofis və inzibati dəstək peşələri ilə birlikdə ən çox təsirə məruz qalan sahələrdir.
AI təhsil və səhiyyə sahələrinə orta dərəcədə təsir göstərə bilər. İbtidai məktəb müəllimləri və qeydiyyatdan keçmiş tibb bacıları süni intellekt dəstəyi ilə vaxta qənaət edə bilərlər. Müəllimlər qiymətləndirmə, testin idarə edilməsi və qeydlərin aparılmasına daha az vaxt sərf edəcək, tibb bacıları isə diaqnostika, xəstə qeydlərinin idarə edilməsi və müalicə düzəlişlərini daha çevik şəkildə həyata keçirəcəklər. Bununla belə, süni intellekt fiziki imtahanlar və laboratoriya işləri kimi praktiki tapşırıqlara minimal təsir göstərir və şəxsi idarəetmə ehtiyacını qoruyur. Əl əməyinə ehtiyac olan sektorlar AI-nin təsirinə daha az məruz qalır, aşağı ödənişli xidmət sektorunda da generativ süni intellektı ehtiyac az olacaq.
