Astaranın Təxtənəkəran kəndi Siyaki kənd inzibati ərazisinə daxildir. Son illər kənddə və bütövlükdə nümayəndəliyin ərazisində xeyli işlər görülmüşdür.
Avtomobil yolları asfaltlaşdırılmış, elektrik xətt təsərrüfatında 90 faiz kabelləşmə aparılmış, sahilbərkitmə işləri görülərək avtomobil körpüləri tikilmiş, sürətli internet şəbəkəsi yaradılmışdır. Kəndə magistral qaz xətti çəkilsə də, bu işlər hələ tamamlanmamışdır. Amma işlərin yekunlaşdırılması üçün tədbirlər görülür.
Kənd sakinləri əsasən sitrus əkininə üstünlük verməklə ildən-ilə təsərrüfatlarını genişləndirirlər. Özü də bu zaman yeni sitrus meyvə tinglərinin əkilməsinə daha çox üstünlük verirlər. Bununla da daha keyfiyyətli və daha çox məhsul əldə edirlər.
Bu dağ kəndi turizmin inkişafı üçün olduqca əlverişli imkana və şəraitə malikdir. Kəndin yolları asfaltlaşdırılandan sonra burada yeni obyektlər açılmış və nəticədə Təxtənəkərana gələn turistlərin sayı xeyli artmışdır.
Bu günlər Astara Rayon İcra Hakimiyyətinin başçısı Q.Ağayev kənddə səyyar görüş keçirmişdir. RİH başçısı dünyada baş verən qlobal hadisələr barədə əhalini məlumatlandırmış, belə bir dövrdə birlik nümayiş etdirməklə dövlətçiliyimizi qorumaq, ölkə rəhbəri ətrafında daha da sıx birləşməyin vacibliyini vurğulamışdır.
Görüş iştirakçıları ölkəmizdə, o cümlədən Astarada aparılan genişmiqyaslı tikinti-quruculuq və abadlıq işlərindən danışaraq əhalinin rifah halının yaxşılaşdırılması üçün göstərdiyi diqqət və qayğıya görə Prezident İlham Əliyevə minnətdarlıqlarını bildirmişlər. Onlar həmçinin fürsətdən istifadə edib kənddə yeni elektrik transformatorunun qoyulmasına, evlərə qaz xəttinin çəkilməsi üçün sənədləşmə işlərində olan problemlərin həllinə, Rinə kəndinin yuxarı məhəlləsinə gedən yolun 700 metr hissəsinin asfaltlaşdırılmasına, kəndin elektrik xətt təsərrüfatının SİP kabelləşməsinə, elektrik xəttində ayırıcı açarın qoyulmasına, qəzalı vəziyyətdə olan elektrik dirəyinin dəyişdirilməsinə kömək göstərilməsini xahiş etmişlər. RİH başçısı vətəndaşların irəli sürdükləri məsələlərin həlli ilə əlaqədar aidiyyəti üzrə tapşırıqlar vermişdir.
Seyran CAVADOV,
"Azərbaycan"
jpg_1771314832.jpg)
